Քաղաքական ուժերի ծրագրերը բազմաբնակարան շենքերի կառավարման խնդիրները լուծելու ուղղությամբ

Երևանի ավագանու առաջիկա ընտրություններին մասնակցելու հայտ ներկայացրած քաղաքական ուժերը իրենց նախընտրական ծրագրերում կարևորում են բազմաբնակարան շենքերի կառավարման ոլորտում առկա խնդիրների կարգավորումը: «Արմենպրես»-ը ներկայացնում է Երևանի ավագանու ընտրությունների մասնակից քաղաքական ուժերի` Հայաստանի հանրապետական կուսակցության, «Երկիր ծիրանի» կուսակցության և «Ելք» դաշինքի ծրագրերը Երևանում բազմաբնակարան շենքերի կառավարման խնդիրները վերացնելու ուղղությամբ:

Հայաստանի հանրապետական կուսակցությունն իր նախընտրական ծրագրում արձանագրում է, որ քաղաքացիների արժանապատիվ կյանքի համար բավարար պայմանների ստեղծումն ու ապահովումն այն կարևոր առաքելություններից են, որ իրենք ստանձնել ու պատասխանատվությամբ իրականացնում են։

Հայաստանի Հանրապետական կուսակցություն

Ընտրություններում հաջողություն արձանագրելու պարագայում ՀՀԿ-ն խոստանում է 2017-2022 թթ, ընթացքում իրականացնել հետևյալ առաջնահերթ քայլերը, ինչը կնպաստի բազմաբնակարան շենքերի կառավարման արդյունավետության բարձրացմանը.

1.Լուծել վերելակային տնտեսության հիմնահարցը։ Ապահովել վերելակային տնտեսության ամբողջական արդիականացումը և միջազգային չափանիշներին համապատասխան անվտանգ սպասարկումը։

2.Օրենսդրական փոփոխությունների միջոցով ներդնել համատիրությունների կառավարման նոր մոդել, որը կներառի գործառույթների հստակեցում, պատասխանատվության սահմանում և բնակչությանը հաշվետու լինելու մեխանիզմներ։

3.Վերանորոգել բոլոր բազմաբնակարան շենքերի հարթ տանիքները։

4.Մշակել և իրականացնել բազմաբնակարան շենքերի թեք տանիքների ամբողջական հիմնանորոգման հիմնախնդրի հայեցակարգ։

5.Ամբողջությամբ վերանորոգել բազմաբնակարան շենքերի վթարային պատշգամբները։

6.Ավարտին հասցնել բազմաբնակարան շենքերի շքամուտքերի վերանորոգման աշխատանքները։

7.Մաքրել և նորոգել շենքերի ճակատամասերը, վերականգնել ճարտարապետական տեսքը։ Վերանորոգել և գունազարդել կամարանցումները։

8.Պարբերական հետազոտությունների միջոցով հսկողություն իրականացնել վթարային շենքերի նկատմամբ և ապահովել դրանց անհրաժեշտ ամրացումը։

9.Մշակել և իրականացնել բազմաբնակարան շենքերի ջերմամեկուսացման և էներգետիկ արդյունավետության բարձրացման համալիր ծրագիր։

10.Իրականացնել բազմաբնակարան շենքերի ջրամատակարարման և ջրահեռացման ներքին ցանցի նորոգման աշխատանքներ։

11. Կոյուղատար համակարգ չունեցող թաղամասերում իրականացնել դրանց կառուցումը։

12.Ապահովել ջրամատակարարման և ջրահեռացման քաղաքային ցանցի հիմնանորոգման և արդիականացման երկրորդ փուլի աշխատանքների իրականացումը։

 «Ելք» դաշինք

Բազմաբնակարան շենքերի կառավարման խնդիրներին լուծում տալու սեփական մեխանիզմներն է առաջարկում նաև «Ելք» դաշինքը: Այդ խնդիրների լուծման ճանապարհներն ամրագրված են դաշինքի նախընտրական ծրագրում:

Բազմաբնակարան շենքերի կառավարման արդյունավետությունը բարձրացնելու համար բնակչությունը լայնորեն կիրազեկվի համատիրությունների ձևավորման սկզբունքների, այդ գործընթացում քաղաքացիների իրավունքների և հնարավորությունների մասին, տեղի կունենան համատիրությունների կառավարիչների իրական ընտրություններ: Նման փորձնական ծրագիր կիրագործվի նաև առանձնատներով թաղամասերի համար:

Դաշինքն առաջարկում է բնակիչների ընտրությամբ ներդնել բազմաբնակարան շենքերի կառավարումը մրցութային կարգով մասնավոր մասնագիտացված ընկերությունների հանձնելու համակարգ:

Երևանի բոլոր բազմաբնակարան շենքերի վրա կտեղադրվեն դրանց հասցեներով ցուցանակներ:

Մայրաքաղաքի տարբեր հատվածներում կտեղադրվեն Երևանի և մերձակա մարզերի տեսարժան վայրերի եռալեզու (հայերեն, ռուսերեն, անգլերեն) ինտերակտիվ քարտեզներ:

 «Երկիր ծիրանի»

«Երկիր ծիրանի» կուսակցությունն իր նախընտրական ծրագրում նախ ներկայացնում է, որ  Երևանում առկա են 4878 բազմաբնակարան շենքեր, որոնց կառավարումն իրականացվում է երեք եղանակով` համատիրության, լիազորագրային կառավարիչների և վարչական շրջանների ղեկավարների կողմից: Այնուհետև կուսակցությունը ներկայացնում է բազմաբնակարան շենքերի կառավարման հիմնական խնդիրները և դրանց լուծման ուղիները:

Բազմաբնակարան շենքի շահագործման և պահպանման հիմնական խնդիրները.

բազմաբնակարան շենքի ընղհանուր բաժնային սեփականության պահպանման` պարտադիր նորմերի վերահսկման մեխանիզմների պատշաճ իրականացում,

ֆինանսական միջոցների գանձման և ծախսման, ընդհանուր ժողովի հրավիրման, բյուջեների կազմման և հաստատման, կանոնադրական պահանջների կատարման նկատմամբ վերահսկողության իրականացման խոչընդոտների վերացում,

օրենսդրական փոփոխության միջոցով «Համատիրությունների մասին» և «Բազմաբնակարան շենքի կառավարման մասին» օրենքներում սահմանված վերահսկողության մեխանիզմների անհստակությունների և տարընթերցումների վերացում,

վերելակային տնտեսության կապիտալ վերանորոգման, շուրջօրյա համապատասխան ծառայության ստեղծման անհրաժեշտություն, թեք տանիքների վերանորոգման անհրաժեշտություն: