Կարեն Վրթանեսյան. «Չնայած մենք 25 տարուց ավելի է փաստացի պատերազմում ենք, բայց շատ վատ ենք ճանաչում Ադրբեջանին»

2012 թ. ստեղծված «Զորակն» գիտակրթական երիտասարդական հիմնադրամը պատրաստվում է հունիսին ադրբեջաներենի ուսուցման ու ադրբեջանական մամուլի ուսումնասիրման եռամսյա դասընթաց անցկացնել:

 

Դեռևս նախորդ տարի ապրիլյան պատերազմից առաջ «Զորակնը» «Ադրբեջան 1» կոչվող ներածական ծրագիրն էր իրականացրել, որի շրջանակներում նույնպես որոշակիորեն ուսուցանել են ադրբեջաներենը, ինչպես նաև բազային գիտելիքներ են մատուցել Ադրբեջանի մասին ռազմական տեսանկյունից:

 

«Այս տարի այդ նույն ծրագիրն ենք անելու ավելի խորացված մակարդակով՝ նպատակ ունենալով աշխատել ատաջին հերթին այդ ոլորտի մարդկանց, ռազմական, անվտանգության գերատեսչությունների հետ: Պատրաստվում ենք հունիսի սկզբին սկսել եռամսյա խորացված ծրագիրը, որի ընթացքում կուսուցանվի ադրբեջաներեն, մասնակիցները կծանոթանան Ադրբեջանի մեդիաոլորտի, ռազմական աշխարհագրության վերաբերյալ հարցերին: Լինելու են նաև ներածական դասախոսություններ Ադրբեջանի զինված ուժերի վերաբերյալ»,– պատմեց մեզ հիմնադրամի հիմնադիրներից ու հոգաբարձուներից՝ Կարեն Վրթանեսյանը:

 

«Զորակնը» դասընթացներ է կազմակերպում նաև լրագրողների համար, որից մեկը՝ «Ադրբեջանը լուրերում» անունը կրող դասընթացը, ավարտվել է մոտ մեկ շաբաթ առաջ: Դասընթացի ընթացքում Հայաստանի լրագրողներին ծանոթացնում էին ադրբեջանական մեդիադաշտի հետ, թե ինչպես ճիշտ ներկայացնել ադրբեջանական լուրերը, ծանոթացնում ադրբեջանական քարոզչության որոշ թեզերի ու հնարքների հետ: Նմանատիպ դասընթացները հնարավորություն են տալիս ավելի օբյեկտիվ ու սթափ դիտարկել ու ներկայացնել Ադրբեջանում տեղի ունեցող իրադարձությունները: Հիմնադրամի ծրագրերն ինքնաֆինանսավորվող են, կազմակերպած դասընթացները վճարովի են՝ մասնակիցները որոշակի գումար են վճարում մասնակցության համար: Հիմնադրամի կապիտալը հավաքագրվում է հիմնականում անհատական նվիրատվությունների, ինչպես նաև հոգաբարձուների կողմից կատարված ֆինանսավորման արդյունքում:

 

Հավելենք, որ հիմնադրամի հիմնական ու մշտական ծրագրերից է «Ռազմինֆո» լրատվական կայքը:

 

Կարեն Վրթանեսյանը խոսելով հունիսին կայանալիք դասընթացի մասին՝ նշում է, որ այդ ծրագրին կարող են մասնակցել ինչպես ռազմական ու հարակից ոլորտների հետ կապ ունեցող անձինք, այնպես էլ արտաքին քաղաքականության, ինչպես նաև՝ անվտանգության փորձագետներ, ովքեր այդ թեմաներով զբաղվում են և ցանկանում է՛լ ավելի խորացնել իրենց գիտելիքները, նաև լեզվական հիմք ստանալ, ինչը հնարավորություն կտա աշխատել ադրբեջանական աղբյուրների հետ ուղղակիորեն և ոչ թե թարգմանություններով ու վերաշարադրված տարբերակներով:

 

Ըստ նրա՝ ծրագիրը ադրբեջանական մեդիադաշտը, աղբյուրները մեր մասնագետների համար ավելի հասանելի դարձնելու նպատակ ունի:

 

Կարեն Վրթանեսյանը մեզ հետ զրույցում նշեց, որ հիմնադրամն ունի ընդհանուր գիծ, ուղղություն, որի հիման վրա էլ աշխատում են, այն ունի սկզբունքներ ու նպատակներ և հիմնական նպատակը առաջին հերթին ռազմական անվտանգության ոլորտի փորձագետների կրթումն է: Վերջինս իրենց վերջին ծրագրերից առանձնացրեց փետրվարին Հայաստանում առաջին անգամ տպագրված ադրբեջաներեն–հայերեն և հայերեն–ադրբեջաներեն ռազմական եզրերի բառարանի հրատարակումը:

 

«Փաստի» այն հարցին, թե հայաստանյան ռազմական լրագրությանը ինչ գնահատական կարելի է տալ, Վրթանեսյանը պատասխանեց, որ թե՛ փորձագիտական և թե՛ լրագրողական ոլորտում դեռ ահռելի անելիք կա:

 

«Չնայած մենք 25 տարուց ավելի է փաստացի պատերազմում ենք, բայց, ցավոք սրտի, շատ վատ ենք ճանաչում մեր հարևաններին, ոչ միայն Ադրբեջանին, այլև Վրաստանին, Թուրքիային և Իրանին: Փոքր ոլորտներ կան, որտեղ կա գիտելիք, քանի որ որոշակի օբյեկտիվ պատճառների հետ կապված կենտրոնացած ենք այդ ոլորտների վրա: Սակայն կան նաև շատ մեծ բացեր ու առաջին հերթին հենց Ադրբեջանի հետ կապված»,– պատասխանեց նա:

ՔՐԻՍՏԻՆԱՏԵՐ–ՄԱԹԵՎՈՍՅԱՆ

Կիսվել