Մեր պապերի գործած սխրանքի շնորհիվ է , որ այսօր ունենք անկախ պետություն
БЛОГՎահե Էնֆիաջյանը ֆեյսբուքյան իր էջում գրում է.
Մայիսի 9-ը հայ ազգի համար եռատոն է: Այս օրը մեր ազգը նշում է 1945 թ. Խորհրդային ժողովուրդների, այդ թվում ` հայերի հաղթանակի, Շուշիի ազատագրման և ԼՂՀ ՊԲ կազմավորման տոնը:
Հայրենական Մեծ պատերազմի ժամանակ խորհրդային բանակի կազմում մարտնչել են 600 հազարից ավել հայորդիներ, որոնցից 70000-ը պարգևատրվել են մեդալներով և մարտական շքանշաններով: Հայ ազգը նաև տվել է չորս մարշալ:
Մեր պապերի գործած սխրանքի շնորհիվ է , որ այսօր ունենք անկախ պետություն և ապրում ենք բոլորից անկախ:
Ինձ համար պարտավորեցնող է և մեծ պատիվ է, որ այդ հայորդիների թվում նաև եղել է իմ պապը և իր սիրտն ու հոգին է դրել Հայրենական Մեծ պատերազմի հաղթանակի կերտման ճանապարհին:
Ցանկացած մարդ , ցանկացած ազգ և ցանկացած պետություն կերազեր լինել հաղթանակած նախնիների ժառանգ, այնպիսի ժառանգ ինչպիսին , որ մենք ենք ` հայերս:
Այդ մեծ հաղթանակին հաջորդեց հերթական , ոչ պակաս կարևոր հաղթանակ :
Արդեն մեր պապերին հաջորդած սերունդը ուղիղ 25 տարի առաջ այս օրը իրականացրեց անհնարին թվացող <<Հարսանիք լեռներում>> օպերացիան, որի արդյունքում ազատագրվեց հրաշագեղ և կախարդական Շուշին:
Մեր ազգը հաղթանակած է և այդ հաղթանակները կերտողները միմիայն հերոսներ են: Մենք մեծ հպարտությամբ , համոզմունքով և սրտի ցավով պետք է նշենք , որ ոչ մի տարբերություն չկա մեր պապերի, հայրերի և ներկա սերնդի միջև, քանի որ մեր երիտասարդ սերունդն էլ ապացուցեց , որ Հայրենիքը իր համար կյանքից առավել է և ոչ ոք ի զորու չէ խարխլել մեր սահմանները:
Մենք հպարտանում ենք մեր նախնիների սխրանքով և մի քանի անգամ ավել հպարտ ենք , որ ունենք այսպիսի երիտասարդ և հայրենասեր սերունդ:
Շնորհավո՛ր Մայիսի 9, Շնորհավո՛ր Մեծ Հայրենական պատերազմի հաղթանակը, Շնո՛րհավոր Շուշիի ազատագրման 25 ամյակը, Շնո՛րհավոր ԼՂՀ ՊԲ կազմավորման օրը, որը վերը նշված հաղթանակների շնորհիվ է ձևավորվել:
Շնորհավորում եմ ամբողջ հայ ազգին այս հաղթական և հրաշալի օրվա կապակցությամբ:
Հաղթանակը միայն կերտում են հերոսները…