Երևանում մայիսի 9-ի առթիվ անցկացվեց «Անմահ գունդ» քայլերթը

«Հայ-ռուսական երիտասարդական միասնություն» հասարակական կազմակերպությունը ՀՀ Վետերանների և Երկրապահ կամավորական միությունների հետ մայիսի 9-ին Երևանում  կազմակերպեց բազմամարդ  «Անմահ գունդ» քայլերթը: Ինչպես հաղորդում է «Արմենպրես»-ը, ակցիան անց է կացվել  Հայաստանի Երիտասարդական հիմնադրամի աջակցությամբ:

Նվագախմբով ուղեկցվող քայլերթը մեկնարկեց  Ազատության հրապարակից, անցավ Մաշտոցի պողոտայով, այնուհետև Գրիգոր Լուսավորիչ փողոցով դեպի Մանկական զբոսայգի: Հայաստանում Ռուսաստանի Դաշնության արտակարգ և լիազոր դեսպան  Իվան Վոլինկինը  կարևորեց այն, որ նմանատիպ միջոցառումները կազմակերպվում են երիտասարդների կողմից:

«Դա նշանակում է, որ երիտասարդները հարգում են, խոնարհվում են և կարևորում են մեր պապերի կատարած սխրագործությունները: Ցանկանում եմ, որպեսզի  Հայաստանը ծաղկի և միշտ խաղաղություն լինի»,- ընդգծեց Վոլինկինը:

Երևանում Կրթության և գիտության ռուսական կենտրոնի տնօրեն Մարկ Կալինինի խոսքով` Երևանում «Անմահ գունդ» ակցիան արդեն երկրորդ անգամ է կազմակերպվում: Կալինինը հույս հայտնեց, որ այն շարունակական բնույթ կկրի:

«Այս ակցիան նպատակ ունի հավերժացնել Հայրենական մեծ պատերազմում կռված հերոսներին: Մասնակիցները պահում են իրենց հարազատների նկարները, ովքեր արել են անհնարինը հաղթանակի համար: Ցանկանում ենք, որ մեր երիտասարդները երբեք չմոռանան հերոսներին և միշտ հիշեն ու հարգեն իրենց նախնիների կատարած սխրագործությունները»,- նշեց Կալինինը:

«Հայ-ռուսական երիտասարդական միասնություն» հասարակական կազմակերպության նախագահ Գոհար Ղումաշյանը նշեց, որ ակցիային մասնակցել են Հայաստանի գրեթե բոլոր բուհերի ուսանողները, դպրոցականները:

«Մեզ համար մեծ պատիվ է, որ ակցիան այսքան մեծ մասշտաբներ է ընդգրկում: Մեր նպատակն է պահպանել յուրաքանչյուր ընտանիքում Հայրենական մեծ պատերազմի մասնակից վետերանների մասին հիշողությունը և երիտասարդ սերունդներին փոխանցել այդ հայրենասիրական ոգին»,- եզրափակեց Գոհար Ղումաշյանը։