Մարտունի քաղաքի Սուրբ Աստվածածին եկեղեցու հիմնանորոգումը շարունակվում է

Գեղարքունիքի մարզի Մարտունի քաղաքի  Սուրբ Աստվածածին եկեղեցու վերականգնումը եւ նորոգումը, որը մեկնարկել էր նախորդ տարվա հունիսից, վերսկսվել  է այս տարվա մայիսի առաջին օրերից: Ինչպես «Արմենպրես»-ին տեղեկացրեց Մարտունու քաղաքապետարանի մամուլի քարտուղար Լիլիթ Գեւորգյանը, Սուրբ Աստվածածին եկեղեցու վերականգնումը եւ հիմնանորոգումը ստանձնել են Մարտունու քաղաքապետարանը, 60-ից ավել բարերարներ, 400-ից ավելի դպրոցականներ, անհատ քաղաքացիներ: Ըստ նախագծի՝ եկեղեցին վերստին կստանա իր երբեմնի ճարտարապետական տեսքը:

 

«Սուրբ Աստվածածնի վերականգնման եւ նորոգման հիմքը 2015 թվականի գարնանը դրել էին երեք նախաձեռնող անձինք` Արմեն Գասպարյանը, Գեւորգ Բարսեղյանը եւ Արմեն Քարիտոնի Ավետիսյանը: Այն մեր քաղաքի միակ եկեղեցին է, որը տեւական ժամանակ, սկսած 1930-ական թվականներից, անմխիթար վիճակում է գտնվել: Սուրբ Աստվածածին եկեղեցու կառուցման ստույգ թվականը հայտնի չէ, սակայն դրա բակում պահպանված խաչքարերը թվագրվում են 11-13-րդ դարերով: 1886 թվականին եկեղեցին վերակառուցել են հայ ընտանիքները, որոնք Արեւմտյան Հայաստանի Ալաշկերտ գավառի բնակավայրերից Սեւանի ավազան են գ աղթել ու Մարտունիում հաստատվել 1830 թվականից: Վերակառուցումը թվագրվում է 1886 թվականով. եկեղեցու դռան վրա` որմնաքարին արձանագրված է ՌՅԼԵ թիվը: Խորհրդային Միության հաստատումից հետո եկեղեցին վերածվել է կոլտնտեսության մթերային պահեստի, հոգևոր հովիվ տեր Աշոտն աքսորվել է, իսկ եկեղեցին որպես պահեստ օգտագործվել է մինչեւ 1970-ական թվականները, ապա լքվել եւ վերածվել ավերակների: 1980-ական թվականներից Մարտունի քաղաքի բնակիչ, մանկավարժ-բարերար  Ավետիք Մոմճյանը սեփական ուժերով մասնակի վերանորոգում է եկեղեցին՝ տեղադրում երկաթբետոնե սյուներ, ամրաններ , պանելային ծածկ, երկաթյա գմբեթ, օժանդակ կցակառույցներ: Թեեւ նորոգումից հետո եկեղեցին կորցնում է նախկին պատմաճարտարապետական տեսքը, սակայն դրականն այն է, որ այն  կանգուն է մնում՝ ընդունելով նաեւ քաղաքի հավատավորներին եկեղեցական տոների ընթացքում»,-ներկայացրեց Լիլիթ Գեւորգյանը: Նախորդ տարվա ընթացքում բազիլիկ եկեղեցու պատերի հողային մասերը մաքրվել, ամբողջությամբ փոխվել են, փոխվել են նաեւ դռները, պատուհաները, կատարվել են խորանի, հատակի հարթեցման, նստարանների տեղադրման եւ այլ աշխատանքներ:  Մի շարք բարերարների միջոցներով կառուցվեÕ ¬ է զանգակատունը, բարերարներից մեկի նախաձեռնությամբ եկեղեցու շրջակա տարածքը վերածվում է կանաչ պուրակի: Այժմ ընթանում են ներքին եւ արտաքին հարդարման, պատերի հարթեցման, գմբեթի վերանորոգման, բեմի սեղանի, երիցատան կառուցման, բակի հարթեցման եւ սալիկապատման աշխատանքներ: «Եկեղեցու վերականգնման եւ հիմնանորոգման մեկնարկից մինչ այժմ հանգանակվել եւ ծախսվել է մոտ 31 միլիոն 200 հազար դրամ: Հանգանակությունները շարունակվում են: Խորանի վերեւի նկարազարդման եւ բեմի սրբապատկերները հեղինակելու է որմնանկարիչ Աբրահամ Ազարյանը: Մոտավոր հաշվարկներով աշխատանքները ավարտին կհասցվեն երկու ամսից, ինչից հետո տեղի կունենա  եկեղեցու բացման եւ օծման արարողությունը, որից հետո Սուրբ  Աստվածածինը կդառնա գործող, կլցվի հավատավորների շնչով ու աղոթքներով»,-հավաստեց Լիլիթ Գեւորգյանը: