Մարտ Բաբայան. «Երբ ասում էի, որ ազգանունս Բաբայան է, ինձ տուգանում էին»

Blognews.am-ը գրում է.

Հոկտեմբերի 3-ին կայացավ երգիչ Մարտ Բաբայանի «Холодно»  ձայնասկավառակի շնորհադեսը, որին ներկա էին երգչի ինչպես ընկերներն, այնպես էլ կոլեգաները: Օրեր առաջ Մարտը և նրա պրոդյուսեր Սոֆյա Գուլյանը հյուրընկալվել էին BlogNews.am–ի խմբագրությունում: Զրույցի ընթացքում պատմել են ձայնասկավառակից, նոր տեսահոլովակից, անձնական կյանքի, ինչպես նաև կայանալիք մենահամերգի մասին:

Մարտի ձայնասկավառակում ընդգրկված է 9 երգ։ Բացի նոր երգերից, կա բոնուս թրեք՝ Աննա Սեմենովիչի երգը, որը Մարտը կատարում է մենակ, «Стоп-Стоп» երգը, որը հիմա երգում է ռուս երգչուհի Զառան, «Քրիստինե», որը նվիրված է երգչուհի Քրիստինե Պեպելյանին։ «Բոլորը հարցնում են, թե ինչու է ձայնասկավառակը կոչվում «Холодно». քանի որ այն ամենահիթայինն է, մենք այդ երգը պարզապես դրել էինք համացանցում և այն բավականին սիրվեց: Ձայնասկավառակն արել ենք ինստագրամի ոճում, այստեղ իմ իրական հետևորդներն են, ոչինչ չենք կեղծել, առաջին էջում իմ ընկերների լուսանկարներն են, ովքեր ինձ հետ են և օգնել են: Ձայնասկավառակի դիզայնի միտքը իմն էր, քանի որ կան շատ տարբեր ձայնասկավառակներ, որտեղ պարզապես լուսանկարներ են գեղեցիկ և ոչ մի տարբերվող բան», - պատմում է Մարտը:

Խոսելով ձայնասկավառակում արդեն իսկ հիթ դարձած երգերի մասին՝ Մարտն առանձնացրեց հետևյալները. «Հայաստանում շատ սիրում են «Люби» երգը, ինչպես նաև «Хочу и боюсь», որն արել ենք դուդուկի նվագակցությամբ: Այս երգը Ռուսաստանում շատ  սիրվեց և միշտ ցանկանում են, որ այն կատարեմ, սակայն, անկեղծ ասած, ես այդ երգին ուշադրություն չեմ դարձրել: Երաժշտությունը գրեմ եմ ես, խոսքերը՝ Աննա Գալկինան»:

Մարտը հանդես է եկել մի քանի դուետներով. Քրիստինե Պեպելյանի, Աննա Դովլաթյանի, Աննա Սեմենովիչի, Մարգարիտա Պոզոյանի և երբ մեկնի Մոսկվա, պատրաստվում է դուետ ներկայացնել Զառայի հետ, ինչպես նաև կովկասում հայտնի երգիչ Գուսեյն Մանապովի հետ. «Կարծում եմ՝ բոլոր երգերն էլ  հաջողվել են, Աննայի հետ դուետն արվել է ավելի ռուսական ոճում: Ինձ այն շատ բան տվեց։ Սա այն երգն է, որ ինձ, օրինակ, հաճախ են զանգում և կանչում միջոցառումներին և հարցում են՝ կարո՞ղ եմ արդյոք այն մեկան երգել»:

 

Երգիչը բուռն ստեղծագործական փուլում է։ Այս փուլում նաև տեսահոլովակ են նկարահանում. «Երգը դանդաղ ոճում է, կոչվում է «Ты Любовь Моя»: Անակնկալ է լինելու, քանի որ տեսահոլովակում նկարահանվելու է հայ հայտնի դերասանուհի, որ դեռ ոչ մի տեսահոլովակում չի նկարահանվել: Երգը ես մի քանի անգամ երգել եմ և միշտ ասում էին, որ այն կարծես հարս և փեսայի պար լինի»:

Երգչի և նրա պրոդյուսեր Սոֆյայի համար շատ կարևոր է, որ իրենց աշխատանքներն առաջինը ներկայացնում են հայ հանդիսատեսին և երկուսն էլ նշում են, որ այստեղ՝ Հայաստանում, միշտ նրանց ոգևորում և քաջալերում են. «Այստեղ մենք մեզ հանգիստ ենք զգում: Անգամ այստեղի հեռուստատեսությունը, ռադիոն։ Մամուլի հետ կարող ես բարի դրացիական հարաբերություններ ունենալ, քանի որ մարդիկ չեն անում սև PR, իսկ Ռուսասատանում այդպես չէ: Իմ կյանքում բավականին շատ է եղել սև PR, որը ինձանից կախված չէր, ես պայմանագրի պատճառով շատ բաներ չէի կարող որոշել: Ես քսան տարեկան էի, ուզում էի հայտնի լինել և գրեթե գնում է այն ամեն ինչի, որպեսզի ստացվեր: Ես չէի կարողանում ասել, որ ես հայ եմ, երբ ասում էի, որ ազգանունս Բաբայան է, ինձ տուգանում էին»:

Չնայած Մարտի ստեղծագործական կյանքը բավականին բուռն է, պարզավում է նա ուզում է ամուսնանալ, և ինչպես Սոֆյան նշեց, կնոջ փնտրտուքների մեջ է. «Երբ մենք Մարտի հետ հաճախ զրուցում ենք, նա միշտ ասում է, որ ուզում է ընտանիք կազմել», - նշեց Սոֆյան, իսկ Մարտն էլ ավելացրեց. «Ինձ շատ են գրում, համերգներին էլ են հաճախ մոտենում:  Մեր հայուհիները շատ գեղեցիկ են և բավականին դաստիարակված: Չեմ ուզում շտապել, և սխալ որոշում կայացնել, քանի որ ես այդ ամենին մոտենում եմ բավականին լուրջ: Հետո իմ կինը պետք է լինի ուժեղ, նա պետք է հստակ իմանա, որ ես արտիստ եմ և ոչ մի խանդ այն մարդկանց հանդեպ, ովքեր սիրում են իմ արվեստը: Նա պետք է վստահ լինի, որ ես նրան եմ սիրում, քանի որ այլ կերպ չի կարող լինել: Նա պետք է համբերատար լինի, որ եթե ինչ-որ տեղ եմ գնացել, ինձ քսան անգամ չզանգի և չհարցաքննի: Միանգամից եմ ասում, որ հարցաքննություններ չեմ սիրում»:

Պարզվում է՝ Մարտի կինը պարտավոր չէ օրվա գրեթե մեծ մասն անցկացնել խոհանոցում, քանի որ երգիչը գուրման չէ և սիրում է ամեն ինչի տնականը. «Ինձ համար կարևոր է լինի միս և բանջարեղեն: Ես երբեք էկզոտիկ ուտեստների սիրահար չեմ եղել, սիրում եմ այն ինչ հասարակ է, ընտանեկան վիճակ և սիրում եմ հասարակ մարդկանց»:

Նա ևս համաձայն է այն տեսակետի հետ, որ հայտնի մարդու համար ընտանիք կազմելը ինչ-որ չափով բարդ է, քանի որ երբեմն արտիստին սիրում են միայն նրա հայտնիության համար. «Կան աղջիկներ, ովքեր պատրաստ են արտիստի համար անել ամեն ինչ, բայց ոչ սիրել: Ես կուզեի, որ իմ կինը չիմանար, որ ես երգիչ եմ, կգնամ Չինաստան, այնտեղից կին կնտրեմ, իհարկե կատակում եմ»:

Յուրաքանչյուր արտիստի համար մի փուլ է գալիս, երբ պետք է մենահամերգ ունենա: Երգչի դեպքում այն կլինի մյուս տարի, երբ կլրանա նրա երեսուն ամյակը: Սոֆյայի խոսքով, համերգը կլինի ինչպես Երևանում, այնպես էլ Մոսկվայում: Իսկ զրույցի վերջում Մարտը կիսվեց իր երազանքներով. «Երազանքներն ամեն տարիքի հետ փոխվում են:  Ես ուզում եմ, որ իմ մտերիմները լինեն առողջ, դա ինձ համար ամենակարևորն է:  Հայրս, երբ կենաց էր ասում, միշտ ասում էր՝ թող բոլորն առողջ լինեն, հարցնում էի՝ ինչու ես միշտ դա ասում, հետո հասկացա, որ դա ամենակարևորն է: Ուզում եմ միշտ նույն եռանդով աշխատեմ, նոր էմոցիաներ պարգևեմ մարդկանց: Կին ունենամ և երեք երեխա: Իսկ օրինակ արդեն 90 տարեկանում, նստեմ և ասեմ, որ կյանքը ստացվել է»:

Նյութը՝ Սիրանուշ Գրիգորյանի