Էդմոն Մարուքյանի կարծիքով ՀՀԿ–ն շարունակում է միահեծան և անկոմպրոմիս վարքագիծ դրսևորել . «Փաստ»

«Փաստ» օրաթերթը գրում է.

ԱԺ «Ելք» դաշինքի պատգամավոր Էդմոն Մարուքյանը, ով նախորդ գումարման ԱԺ–ում հինգ տարի եղել է ԱԺ արտաքին հարաբերությունների մշտական հանձնաժողովի անդամ, 6–րդ գումարման նույն հանձնաժողովի նախագահի թեկնածու Արմեն Աշոտյանի մասին ասել էր, որ իր կարծիքով Աշոտյանի կերպարն այդ պաշտոնի համար անհամատեղելի է: Եվ որպես կերպարի ու պաշտոնի անհամատեղելիության հիմնավորում նշել էր, որ իր մտահոգության պատճառը քաղաքական ընդդիմախոսների հանդեպ նրա ունեցած անհանդուրժողական վերաբերմունքն է:

Մարուքյանը Աշոտյանին համեմատելով նախորդ գումարման ԱԺ նույն հանձնաժողովի նախագահ Արտակ Զաքարյանի հետ, ով ներկայում նշանակվել է ՊՆ փոխնախարարի պաշտոնում, ասել էր նաև, որ Զաքարյանի գլխավորած հանձնաժողովում աշխատելը բավականին հեշտ և արդյունավետ է եղել և կուսակցական տարաձայնություններն ամենևին չեն խանգարել անկոնֆլիկտ աշխատելու համար:

«Այն ժամանակ շատ հանգիստ աշխատել ենք, բայց արդյոք մեզ հաջողվելո՞ւ է այս անգամ էլ նույն ձևով աշխատել ձեզ հետ: Ես խորը մտահոգություններ և կասկածներ ունեմ, որ դուք կկարողանաք այդ հանձնաժողովը ղեկավարել: Եվ ես չէի ուզենա, որ հանձնաժողովը ձախողի խորհրդարանի դիվանագիտության այդ հատվածը»,– պատգամավորն ասել էր Աշոտյանին ԱԺ նիստի ժամանակ:

Ու թեև ԱԺ հանձնաժողովների նախագահների թեկնածուների քվեարկության ժամանակ Արտաքին հանաբերությունների հանձնաժողովի նախագահի պաշտոնում Արմեն Աշոտյանն ընտվեց, բայց քվեարկության արդյունքները՝ 56 կողմ, 36 դեմ, ցույց տվեցին, որ միայն Մարուքյանը չէր, որ նման մտահոգություններ ուներ կերպարի ու պաշտոնի համատեղելիության առումով:

Ինչևէ, այս պահին ունենք այն, ինչ ունենք, բայց Մարուքյանի մտահոգություններն այսքանով չեն սահմանափակվում: Համեմատելով ԱԺ–ի նախորդ ու ներկա գումարումների ժամանակ ձևավորված ընդհանուր մթնոլորտը, «Փաստի» հետ զրույցում Մարուքյանը նշեց, որ հանձնաժողովների կրճատումը, նշանակում է, որ իշխանությունների համար մարդու իրավունքները որևէ կարևորություն չունեն:

«Փաստորեն ՀՀԿ–ն փակեց ԱԺ Մարդու իրավունքների հանձնաժողովը: Սա է մեր քաղաքական գնահատականը: Երկրորդ մտահոգությունն այն է, որ ՀՀԿ–ն ամեն ինչ արեց, որ որևէ հանձնաժողով չհասնի ընդդիմադիր դաշտին: Մենք պատրաստ էինք պատշաճ և բարեխղճորեն ստանձնել այդ պատասխանատվությունը, բայց իրենց պահվածքն այն էր, որ ոչինչ չհասնի «Ելք» դաշինքին»,– ասաց Է. Մարուքյանը:

Պատգամավորը նաև նշեց, որ հույս ուներ, որ այս գումարման ԱԺ պատգամավորների գործելաոճը մի փոքր այլ կլինի, սակայն երկու–երեք օրերի ընթացքում հասցրել է համոզվել, որ ՀՀԿ–ն շարունակում է նույն ոճով աշխատել:

«ՀՀԿ–ն շարունակում է նախկինի նման միահեծան և անկոմպրոմիս վարքագիծ դրսևորել: Եվ ԱԺ ՀՀԿ խմբակցության պահվածքի տեսանկյունից նախորդ և ներկա գումարումների գործելաոճի մեջ ես ոչ մի տարբերություն չեն տեսնում»,– ասաց Է. Մարուքյանը:

Շարունակությունը` «Փաստ» օրաթերթի այսօրվա համարում