Սկսվում է Ժիրայր Սեֆիլյանի դատավարությունը. առաջադրված քրեական գործերի կծիկը. «Փաստ»

«Փաստ» օրաթերթը գրում է.

Մեր հարցերին պատասխանում է Հիմնադիր Խորհրդարանի անդամ, ԱՍԱԼԱ–ի մարտիկ Ալեք Ենիգոմշյանը

– Պարոն Ենիգոմշյան, ե՞րբ է տեղի ունենալու Ժիրայր Սեֆիլյանի դատավարությունը:

– Առաջին նիստը նշանակված է առաջիկա ուրբաթ օրը, այս ամսվա 26–ին:

– Իսկ նա ընդունո՞ւմ է մեղադրանքները: Ընդհանրապես ի՞նչ կարծիքի է իրեն վերագրվող մեղադրանքների վերաբերյալ:

– Նա երբեք էլ չի ընդունել մեղադրանքները: Բացարձակապես չի ընդունել: Որքան ես տեղյակ եմ, և վստահ եմ, որ այդպես էլ պետք է եղած լինի, նա ցուցմունք էլ չի տվել:

Եվ այս ամենը նա համարում է խայտառակություն: Համարում է քաղաքական հալածանք և՛ իր պարագայում, և՛ մյուսների պարագայում: Վստահ եմ, որ նա համապատասխան արժանավայել դիրքորոշումով կներկայանա դատարան: Այդ մասին կասկած անգամ չկա:

Միայն այս դատավարությունը չէ, որ սկսվելու է առաջիկայում: Բանն այն է, որ այսպես կոչված «Ժիրայր Սեֆիլյան և մյուսներ» ձևակերպում են տվել գործին: Հինգ–վեց հոգանոց խումբ է:

Հիշենք, որ 2015 թվականի ապրիլին Ընդդիմադիր Խորհրդարանի հինգ անդամներ ձերբակալվեցին, նրանք կալանավորված մնացին մոտավորապես մեկ ամիս, որից հետո փոխվեց նրանց խափանման միջոցը: Վերջիններիս մեղադրանք էր առաջադրվել, որ, իբր, նախատեսում էին զանգվածային անկարգություններ կազմակերպել ապրիլի 24–ի առիթով: Այս գործը ևս, որը կարճված չէր, միացվեց ներկա գործին, ընդհանրապես` Սասնա Ծռերի գործին:

Ժիրայր Սեֆիլյանը մեղադրվում է և՛ զենք–զինամթերք ձեռք բերելու, և՛ պետական շենք–շինություններ զավթելու մտադրության մեջ:

Ի դեպ, 2015 թվականի ապրիլի 24–ին զանգվածային անկարգություններ կազմակերպել նախատեսելու մեջ ներգրավված է նաև մեր կողմից շատ սիրված ու հարգված, մեր երիտասարդ ընկերը` Գևորգ Սաֆարյանը: Որն արդեն դատապարտված է երկու տարվա ազատազրկման` դեկտեմբերի 31–ին Ազատության հրապարակում տոնածառ տեղադրելու համար:

Եթե ի մի բերենք, պատկերն այսպիսին է` Ժիրայր Սեֆիլյանը մեղադրվում է երկու գործով` զենք–զինամթերք ձեռք բերելու ու պետական շենք–շինություններ գրավելու գործերով: «Ժիրայր Սեֆիլյան և մյուսները»` ևս այդ գործով ու գործի մի մասով: Նաև` Ժիրայր Սեֆիլյանը 2015–ի ապրիլի գործով: Եվ Գևորգ Սաֆարյանը միայն 2015–ի ապրիլի գործով:

Փաստորեն այսպիսի մի խճճված գործ է: Եվ լինելու է, ըստ իս, խճճված էլ դատավարություն: Ընդ որում` բոլոր մեղադրանքներն էլ կեղծ են ու թխված:

Սպասենք ու տեսնենք, թե ինչպիսի ընթացք է ունենալու այս ամենը:

– Իսկ ինչպե՞ս է Ժիրայր Սեֆիլյանի տրամադրությունը:

– Սեֆիլյանի հետ ոչ ոք չունի շփման հնարավորություն, բացի իր պաշտպաններից ու, բնականաբար, քրեակատարողական հիմնարկների աշխատողներից: Եվ մեր տեղեկությունները նրա վերաբերյալ բացառապես պաշտպաններից են: Ասում են, որ մշտապես բարձր տրամադրություն ունի: Վճռական է, ինքնավստահ: Ինչպես բոլորը գիտեն ու ճանաչել են նրան:

 Շարունակությունը` «Փաստ» օրաթերթի այսօրվա համարում