«Ուխտագնացություն դեպի առաջին քրիստոնյա երկիր»՝ դեպի Հայաստան զբոսաշրջիկների հոսքն ավելացնելու ծրագիրը

Իրավական ակտերի նախագծերի հրապարակման միասնական կայքում օրեր առաջ շրջանառության է դրվել «Ուխտագնացություն դեպի առաջին քրիստոնյա երկիր» անունը կրող ռազմավարությանը հավանություն տալու մասին կառավարության արձանագրային որոշման նախագիծը:

 

Նախագծի նպատակն է ակտիվ և արդյունավետ մարքեթինգային քաղաքականության իրականացման միջոցով նպաստել համաշխարհային շուկայում հայկական զբոսաշրջային արդյունքի մրցունակության ամրապնդմանն ու բարձրացմանը, միջազգային շուկայում Հայաստանի` որպես առաջին քրիստոնյա երկրի նկարագրի շարունակական ամրապնդմանը:

 

Նախագծի հեղինակները համոզված են, որ ռազմավարության իրականացումը կնպաստի զբոսաշրջության ոլորտի զարգացմանը, առաջիկա տարիներին դեպի Հայաստան զբոսաշրջային այցելությունների աճի ապահովմանը և ներքին զբոսաշրջության զարգացմանը:

 

Ռազմավարության իրականացումը ենթադրում է զբոսաշրջության կայուն զարգացում, ինչը կնպաստի կայուն տնտեսական զարգացմանը, համաչափ տարածքային տնտեսական զարգացմանը, պատմամշակութային ժառանգության և ավանդույթների պահպանությանն ու զարգացմանը, ինչպես նաև մշակութային արժեքների փոխադարձ արժևորմանը:

 

Նախագծի մշակման աշխատանքներում ներգրավվել են Տնտեսական զարգացման և ներդրումների նախարարությունը, Զբոսաշրջության պետական կոմիտեն, պետական, Հայաստանյաց Առաքելական Սուրբ Եկեղեցու և մասնավոր հատվածի շահագրգիռ կողմեր:

 

Ինչպես կարդում ենք նախագծում՝ աշխարհում զբոսաշրջային գրավչության օբյեկտների շուրջ 90%–ը կապված են կրոնի հետ: Ըստ ՄԱԿ Զբոսաշրջության Համաշխարհային Կազմակերպության գնահատման՝ յուրաքանչյուր տարի 300–330 միլիոն զբոսաշրջիկ այցելում է աշխարհի հիմնական կրոնական կենտրոնները, միաժամանակ կրոնական նպատակներով աշխարհում իրականացվում են մոտ 600 միլիոն ազգային և միջազգային ճանապարհորդություններ, որի 40%–ը բաժին է ընկնում Եվրոպային:

 

«Հայաստանը` որպես զբոսաշրջային երկիր, ունի կրոնական և ուխտագնացության զբոսաշրջության մեծ ներուժ՝ ընդգրկելով շուրջ 1051 քրիստոնեական հուշարձաններ։ Հայաստանն ունի հարուստ պատմամշակութային ժառանգություն, այդ թվում` հուշարձաններ, որոնցից են Խոր Վիրապը, Էջմիածնի Մայր տաճարը, Գառնու հեթանոսական տաճարը, Գեղարդի վանքը և Տաթևի վանական համալիրը: 2013 թ. զբոսաշրջային ընկերությունների կողմից ամենաշատ վաճառված զբոսաշրջային արդյունքների հանրագումարում կրոնական զբոսաշրջության բաժինը Հայաստանում կազմել է 5,2%, այն դեպքում, որ Եվրոպայում այն եղել է 2,8%, իսկ ԱՄՆ–ում՝ ընդամենը 1%»,– գրված է նախագծում:

 

Ռազմավարությունից բխող միջոցառումների իրականացման արդյունքում մինչև 2020 թ. ակնկալվում է տարեկան ներգնա զբոսաշրջային այցելությունների թիվը հասցնել առնվազն երկուսուկես միլիոնի, այդ թվում սփյուռքահայերի այցելությունների թիվը` առնվազն 1 միլիոն 200 հազար կլինի, տարեկան ներքին զբոսաշրջային այցելությունների թիվը կհասցվի առնվազն մեկուկես միլիոնի: Ակնկալվում է ներգնա զբոսաշրջային այցելություններից տարեկան առնվազն երկուսուկես միլիարդ դոլարի համախառն եկամուտ ունենալ, իսկ ներքին զբոսաշրջային այցելություններից՝ 450 միլիոն դոլարի: Արդյունքում հյուրանոցային տնտեսության օբյեկտների թիվը կավելանա առնվազն 50–ով, ինչն էլ կապահովի լրացուցիչ 15 հազար աշխատատեղի ստեղծում:


ՔՐԻՍՏԻՆԱ ՏԵՐ–ՄԱԹԵՎՈՍՅԱՆ

 

Կիսվել