Ասադը Աթ–Թանֆում խառնեց բոլորի խաղաթղթերը

МЕЖДУНАРОДНОЕ 26 Май, 2017 21:13

Երեկ Սիրիայի բանակն անակնկալ հաջողություններ է գրանցել երկրի ամենատարբեր շրջաններով ձգվող ճակատներում: Գլխավոր ձեռքբերումներից մեկն, իհարկե, անցած տարվա փետրվարից ԴԱԻՇ–ի ձեռքում գտնվող Ալ–Ջարահ օդանավակայանի և դրան հարակից մի քանի բնակավայրերի ազատագրումն էր, որի ընթացքում, ըստ ՍԱՆԱ գործակալության, ավելի քան 3000 ջիհադիստներ են ոչնչացվել: Լուրջ հաջողություն էր նաև մոտ 19 տանկերի, 5 ռազմական, 11 զրահապատ մեքենաների, 56 հրետանային համակարգերի, 9 ռազմական պահեստների գրավումը: Սիրիայի բանակին բախտը ժպտացել է նաև Ասրիա–Հանասեր մայրուղու վրա ընկած Թել–Մարգա շրջանում, որտեղ ԴԱԻՇ–ի զինյալների համար իսկական ջարդ է կազմակերպվել՝ ոչնչացվելով առնվազն 61 դաշտային հրամանատարական կենտրոններ:

Բայց, իհարկե, ամենակարևոր և անակնկալ հաջողությունը Կունեյտրայում էր, որտեղ չնայած առաջ չշարժվելու՝ ամերիկյան զգուշացումներին ու ռմբահարումներին, կառավարական ուժերը օպերացիա սկսեցին ռազմավարական նշանակություն ունեցող Աթ–Թանֆ քաղաքի մոտակայքում և, սիրիական մամուլի համաձայն, անակնկալ ցատկ արին Իրաքի սահմանի ուղղությամբ՝ հայտնվելով Բադիայի շրջանի կենտրոնական հատվածում, ազատագրելով տեղի գիտահետազոտական բազան և դրան հարակից այլ կարևոր օբյեկտներ:

Թե ինչու է Հորդանանի սահմանի երկայնքով կարգուկանոն հաստատելն ու Իրաքի սահմանին մոտենալը կարևոր Ասադի, իսկ այդ կողմերից նրան հեռացնելը՝ ԱՄՆ–ի համար, Փաստն արդեն մի քանի անգամ ներկայացրել է: Խնդիրն այն է, որ այս հատվածում Ասադը երեք ստրատեգիական նպատակ է հետապնդում: Առաջինը՝ ոչնչացնել ԴԱԻՇ–ի զինյալներին, երկրորդ՝ իսկական եռացող կաթսա պատրաստել հարավային Կալամունի կանաչների, այսինքն՝ զինյալ ընդդիմության համար, նրան մեկուսացնելով պրոամերիկյան և պրոհորդանանյան՝ Սիրիայի ազատ բանակից, որ բուն են դրել անցակետային Աթ–Թանֆում, և երրորդ՝ շրջափակել Ահմադ Աբդոյի նահատակների բրիգադ, Ջեյշ ալ–իսլամ, Դումեյրի ու Ռուհայբու իսլամիստական ահաբեկիչներին, որոնք հրաշալի զինված են տանկերով ու զրահապատ մեքենաներով:

Ստացվում է՝ իր նպատակներում Ասադն ինչ–որ չափով հաջողեց, ինչի պատճառով, չճշտված աղբյուրների համաձայն, Կոալիցիան այժմ ատամներն է կրճտացնում: Պարզվել է՝ օպերացիան կազմակերպվել է ռուսական նորագույն զինատեսակներով: Այստեղ են բերվել ТОС–1А Солнцепек–ը, Мста–Б–ն, МИ–35 ռազմական ուղղաթիռները բանակին մշտապես ապահովել են օդից, իսկ СУ–22 կործանիչներն անընդհատ գործողության մեջ են եղել՝ վիժեցնելով The Washington Post թերթի կանխատեսումը, ըստ որի՝ Կոալիցիան Սիրիայի հարավում ապացուցեց, թե ով է Սիրիայի ճակատագրի ճարտարապետը՝ Ասադի մռթին լավ հարված հասցնելով:

Մի բան, որի առիթով, չնայած ԱԳՆ–ի դատապարտող հայտարարությանը, ակնհայտորեն Կրեմլում էլ էին հուսահատված, որովհետև համարյա բոլոր փորձագետները (արևելագետ Միխայիլ Մահիդ և այլք) այն մասին էին խոսում, որ Ասադին դուրս շպրտեցին իր երկրի հարավից, իսկ ամերիկյան ավիահարվածներն ապացուցեցին, որ նա այլևս ոչինչ չի կարող անել: Դա տեստ էր Սիրիայի հարավն անպատիժ վերցնելու մասին՝ գրում էին ռուսները, հավելելով, որ հիմա հաջորդ քայլն արաբական ՆԱՏՕ–ի հետ միասին Դեր–ազ–Զորի գրավումը կլինի, որի հարևանությամբ ռուսական ռազմաբազան կհայտնվի մեկուսացման մեջ, Ասադը կզրկվի բոլոր կարևոր ուղղություններն ու սահմանները վերահսկելու հնարավորությունից, իսկ ԱՄՆ–ն, կփակի, այսպես կոչված, կիսալուսինը, որ ձգվում էր շիական Իրաքից դեպի Սիրիա, Լիբանան և Իրան:

Այսպիսով, մինչ ռուսները ողբում էին, որ հարավը կորցրին, հյուսիսում էլ Սաուդյան Արաբիայի, Քաթարի և Թուրքիայի կողմից վերահսկվող կանաչներն են անպատիժ գործում, Ասադը նորից խառնեց բոլորի խաղաքարտերը, իսկ քրդերն էլ, բոլորից անջատ գործելով, գրավեցին Ռաքքայի մերձակայքում գտնվող Յամամա գյուղն ու Բաասը՝ ջիհադիստներին ջարդ տալով նաև Սիկինի գյուղում:

Այնպես որ, սպասել է պետք արագ զարգացումների, եթե ընդամենը մեկ օրվա մեջ այսպիսի կարևոր զարգացումներ տեղի ունեցան: Իզուր չէ, որ Revolutionary Forces of Syria Media Office–ը կատարյալ ջղաձգման մեջ է ընկել՝ դոկտոր Աբդերքադեր Մանալայի շուրթերով անիծելով Ասադին: