Իրավունք չուներ հեգնական տոնով խոսել. ակտիվիստը` ՀՀԿ պատգամավորի մասին

Գյումրեցի ՀՀԿ-ական պատգամավոր Սուքիաս Ավետիսյանն անցած քառօրայի ընթացքում հայտարարությունների ժամին անդրադարձավ «Չե´ք անցկացնի» նախաձեռնության կողմից Գյումրիում անցկացրած հանրահավաքին:

Նա հեգնեց, թե ընդդիմադիրները փորձել են Գյումրիում հանրահավաք կազմակերպել 2 քաղաքական լիդերով, 50 կողմնակից բերել էին Երևանից, իսկ մի 30 կողմնակից էլ հավաքվել էին նաև Գյումրիում:

«Գյումրեցիները մտքի գոհարներ լսելու փոխարեն տեսան մարդկանց, ովքեր փորձում էին իշխանություններին վատաբանելով և կիսահայհոյախառն խոսք ասելով հեղինակություն ձեռք բերել»,- ասել էր պատգամավորը:

Հետաքրքական է, որ հայտարարությունը որևէ կերպ չլուսաբանվեց մամուլում և մնաց անպատասխան: Past.am-ը զրուցեց «Չե´ք անցկացնի» նախաձեռնության խորհրդի անդամ Հրայր Մանուկյանի հետ և խնդրեց մեկնաբանել պատգամավորի ելույթը: Նախ՝ Հրայր Մանուկյանը շեշտեց, որ հանրահավաքը եղել է խաղաղ, իրազեկվել է նախապես, ապա տեսակետ հայտնեց, որ պատգամավորի իրավասության մեջ չի մտնում գնահատական տալ քաղաքացիական նախաձեռնության կազմակերպած հանրավաքին, այն էլ նման հեգնական տոնով:

«Սուքիաս Ավետիսյանն այնքան փոքր մարդ է, որ անգամ չպետք է ժամանակ ծախսել նրա ասածներին անդրադառնալուն: Նա ընդամենը իշխանությանը ծառայող հլու կամակատար է»,- ասաց Մանուկյանը: Հիշեցնենք, որ Սուքիաս Ավետիսյանի դժգոհության պատճառն այն է, որ հանրահավաքի ժամանակ ՀԱԿ պատգամավոր Արամ Մանուկյանը, դիմելով գյումրեցիներին, հարցրել էր, թե որտեղ է ձեր պատգամավոր Սուքիաս Ավետիսյանը, ապա տեսակետ հայտնել, թե երևի թատրոնում է:

Պատասխանելով մեր հարցին, թե ինչու Գյումրիում հնչեց հենց Ավետիսյանի անունը, այլ ոչ թե այլ գյումրեցի պատգամավորի, Հրայր Մանուկյանն ասաց, որ մարդիկ կան, որ իրենց պահում են այնպես, որպեսզի իշխանություններն իրենցից գոհ լինեն, իսկ Ավետիսյանը հենց այդպիսին է: Ըստ Մանուկյանի` ամբիոնից նրա հայտարարություն անելը միայն հուշում է այն մասին, որ մարդը խնդիր ունի ցույց տալ իր հավատարմությունը իշխանություններին, ուրիշ ոչինչ:

Հրայր Մանուկյանը նշեց նաև, որ Ավետիսյանի հայտարարության մեջ կա նաև սպառնալիք՝ ուղղված Արամ Մանուկյանին: Հիշեցնենք, որ Սուքիաս Ավետիսյանն ասել էր, որ եթե չլինեին ոստիկանները, վերջինս հազիվ թե հանգիստ Գյումրիից դուրս գար այն բանից հետո, երբ հանրահավաքին շահարկել էր իր անունը: «Չե´ք անցկացնի» նախաձեռնության անդամը տեսակետ հայտնեց, որ նման սպառնալիքներով ՀՀԿ-ական պատգամավորը փորձում է առիթներ ման գալ և ամեն կերպ ցույց տալ Սերժ Սարգսյանին իր հնազանդությունը:

Լիլիթ Լալայան