Կարճաղբյուրում իշխանի բազմացման կայան կկառուցվի

ОБЩЕСТВО 27 Май, 2017 17:11

«Սևանի իշխան» ՓԲԸ–ն Սևանա լճի տարածքում, Կարճաղբյուր համայնքում ձկնաբուծական համալիրի սելեկցիոն տնտեսության և բացօթյա ավազանների կառուցման՝ շրջակա միջավայրի վրա ազդեցության նախնական գնահատման հայտ է ներկայացրել Բնապահպանության նախարարություն:

Ինչպես կարդում ենք հայտում՝ Սևանա լճի ավազանում ձկնաբուծության և ձկնարդյունաբերության զարգացումը կարող է ունենալ շատ կարևոր ռազմավարական նշանակություն ավազանի բնակավայրերի համար, որտեղ այն կարող է դառնալ հազվագյուտ եկամտաբեր ճյուղերից մեկը: Համալիր ծրագրով լուծվում է ևս մի կարևոր խնդիր՝ ձկնաբուծության ընդհանուր արժեշղթայում ստեղծվելու է մի քանի հազար աշխատատեղ՝ միայն արտադրության ոլորտում կստեղծվի 1500–2000 աշխատատեղ:

Ըստ ընկերության կողմից ներկայացված հայտի՝ ՀՀ–ում վերջին 5 տարիների ընթացքում ձկնաբուծության զարգացման աճի տենդենց է նկատվում: Տարեկան ձկնարտադրությունը կազմում է շուրջ 10 հազար տոննա:

«Սևանի իշխան» ՓԲԸ–ն նախատեսում է կառուցել ձկան սելեկցիոն տնտեսություն, ինչը հնարավորություն կտա ձկան քաշաճի ցուցանիշների բարելավում, ինչի արդյունքում կբարձրանա տնտեսությունների արտադրողականությունը: Ըստ նախագծի՝ «Սևանի իշխան» ՓԲԸ–ն Հայաստանում միակ ընկերությունն է, որը ձկնարտադրության ոլորտում կիրառելու է «շշմեցման տեխնոլոգիան»:

«Սևանի իշխան» ՓԲԸ–ն իրականացնում է Ամառային և Գեղարքունի իշխանի արտադրական ամբողջ շղթան՝ մայրական կազմի ձևավորումից և մանրաձկան արտադրությունից մինչև բուծում, վերամշակում և իրացում: Սևանի իշխան ձկնատեսակի համար առ այսօր չի եղել որևէ բազմացման կամ սելեկցիոն ծրագիր։ Նման ծրագրի անհրաժեշտությունը բխում է նաև նրանից, որ տվյալ ձկնատեսակը հանդիսանում է էնդեմիկ Հայաստանի համար, այսինքն՝ բնակության արեալը սահմանափակված է հայկական բնաշխարհով։

Նախատեսվող սելեկցիոն տնտեսությունը ծառայելու է Սևանի իշխանի համար բազմացման ծրագրի իրականացման համար, որը իրականացվելու է Ֆինլանդիայի «Բնական պաշարների ինստիտուտի» հետ համատեղ՝ կնքված պայմանագրի շրջանակներում։

Ծրագիրը բաղկացած է երկու հիմնական բաղադրիչից և նպատակից։ Առաջինը՝ գրագետ բուծման արդյունքում միջազգակցական մոտ կապեր ունեցող առանձնյակների խաչասերումից խուսափում: Սելեկցիոն տնտեսությունում (բազմացման կայանում) պահպանվելու է բացառապես մաքուր գեղարքունի իշխան, ինչը ունի կարևորագույն բնապահպանական նշանակություն։ Տնտեսությունում արգելված է լինելու և բացառվելու է, որևէ կենսախթանիչների օգտագործումը և օգտագործվելու է միայն գենետիկորեն մաքուր Գեղարքունի իշխան։ Երկրորդ բաղադրիչը և նպատակը արդյունաբերական լավագույն հատկանիշներով օժտված ձկան ստացումն է։

Էլեկտրական հոսանքի վթարային անջատումների ժամանակ տնտեսության նվազագույն կարիքներն ապահովելու համար նախատեսված է գեներատոր, որի դրվածքային հզորությունը հաշվարկված է` 65 կՎտ: Գեներատորի աշխատանքի ընթացքում կարող է առաջանալ ազոտի երկօքսիդ, ածխածնի օքսիդ, ածխաջրածիններ, պինդ մասնիկներ, ծծմբի երկօքսիդ: Արտանետվող նյութերի ազդեցության գնահատումը կկատարվի՝ համեմատելով դրանք սանիտարական նորմերի հետ:

Իշխանի պաշարների վերականգնման և ձկնաբուծության զարգացման համալիր ծրագրի ընդլայնման նախագիծը նախապես համաձայնեցվել է Կարճաղբյուր համայնքի հետ, դեռևս ապրիլի 20–ին կայացել են նախագծի վերաբերյալ հասարակական լսումներ:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ