Սոցապնախարարության մեկ գործուղումը գերազանցել է 4 միլիոն դրամը, ավիատոմսերն էլ՝ հազար եվրոն

ОБЩЕСТВО 27 Май, 2017 13:04

Past.am-ը սկսում է պետական գերատեսչությունների արտասահմանյան գործուղումների վերաբերյալ հոդվածների պատրաստում: Ժամանակ առ ժամանակ մեր ընթերցողին կներկայացնենք, թե այս կամ այն գերատեսչությունը իր այս կամ այն արտասահմանյան գործուղման համար որքան գումար է ծախսել:

Առաջին անդրադարձը վերաբերում է Աշխատանքի և սոցիալական հարցերի նախարարության՝ 2016 թ. ընթացքում կատարված գործուղումներին:

Այսպես, ինչպես Past.am-ին տեղեկացնում են նախարարությունից՝ արտասահմանյան պաշտոնական գործուղումների գծով 2016 թ. տարեսկզբին պետական բյուջեով գումար չի նախատեսվել: Ծախսերը կատարվել են տարվա ընթացքում վարչապետի համապատասխան որոշումների հիման վրա:

Ըստ նախարարության կողմից ներկայացված հարցման պատասխանի՝ 2016 թ. ընթացքում նախարարությունը ունեցել է ընդամենը վեց գործուղում, որոնց ընթացքում գործուղվել են նախարարության ութ աշխատակից:

Առաջին գործուղումը տեղի է ունեցել հունվարի 18–ին: Բելառուսի Հանրապետություն է գործուղվել նախարարի տեղակալ Ջեմմա Բաղդասարյանը, ում գործուղումն արժեցել է 401 հազար դրամ, որից 108 հազար 815 դրամը ավիատոմսի արժեքն է, իսկ 293 հազար դրամը գիշերավարձի և օրապահիկի գումարն է: Ջեմմա Բաղդասարյանը նախարարության աշխատակիցներից միակն է, որ նախորդ տարի մի քանի անգամ է գործուղման մեկնել: Եվս մեկ գործուղում է նա ունեցել 2016 թ. սեպտեմբերի 29–ից հոկտեմբերի 1–ն ընկած ժամանակահատվածում: Այս անգամ նա գործուղվել էր Ղրղզստանի Հանրապետություն ԱՊՀ մասնակից պետությունների բնակչության աշխատանքի, միգրացիայի և սոցիալական պաշտպանության խորհրդակցական խորհրդի 29–րդ նիստին մասնակցելու նպատակով: Այս գործուղման ընդհանուր ծախսը կազմել է 642 հազար 240 դրամ, որից 420 հազար դրամը երկկողմ ավիատոմսի արժեքն է, իսկ 222 հազար 240–ը՝ գիշերակացի և այնտեղ սնվելու համար նախատեսված գումարը:

Ի դեպ նախարարությունից դեպի Ղրղզստան ևս մեկ գործուղում է տեղի ունեցել և որքան էլ, զարմանալի չլինի այդ գործուղմանը մասնակցած երեք աշխատակիցների ավիատոմսի արժեքը միասին ավելի քիչ գումար է կազմել, քան հունվարին Ջեմմա Բաղդասարյանի՝ Ղրղզստան այցելության ավիատոմսը: Մարտի 1–4–ի ընթացքում Ղրղզստան այցելած Սմբատ Սաիյանի, Անահիտ Գալստյանի և Ագնեսա Աղաբաբյանի ավիատոմսերը միասին կազմել են 387 հազար դրամ: Ստացվում է, որ եթե ուզում են՝ լավ էլ տնտեսում են:

Ըստ Past.am-ին ներկայացված հարցման պատասխանի՝ նախարարության ամենից թանկ գործուղումը եղել է հունիսի 6–8–ն ընկած ժամանակահատվածում Շվեյցարիայի համադաշնություն պատվիրակություն գործուղելու արդյունքում:

Այս գործուղմանը մասնակցել են միանգամից չորս պատվիրակ՝ նախարար Արտեմ Ասատրյանը, նախարարության աշխատակազմի միջազգային համագործակցության և զարգացման ծրագրերի վարչության պետ Անահիտ Մարտիրոսյանը, Հայաստանի գործատուների հանրապետական միության նախագահ Գագիկ Մակարյանը և Արհմիությունների կոնֆեդերացիայի փոխնախագահ Բորիս Խարատյանը:

Գործուղման նպատակը Աշխատանքի միջազգային համաժողովի 105–րդ նստաշրջանին մասնակցելն էր: Այս գործուղման համար ընդհանուր առմամբ հատկացվել է 4 միլիոն 425 հազար դրամ: Առանձին–առանձին յուրաքանչյուր պատվիրակի գործուղումն արժեցել է 1 միլիոն դրամից մի փոքր ավելի: Շվեյցարիա գործուղվող մեր պաշտոնյաներից յուրաքանչյուրի ավիատոմսը արժեցել է ոչ ավել, ոչ պակաս 586 հազար 700 դրամ: Ինչպես ասում են՝ «замахнулись по полной»:

Ամենահետաքրքիրն այն է, որ նախարարության մեկ այլ աշխատակցի՝ ընտանիքի, կանանց և երեխաների հիմնահարցերի վարչության կանանց հիմնահարցերի բաժնի գլխավոր մասնագետ Էլեոնորա Վիրապյանի նոյեմբերի 3–5 ընկած ժամանակահատվածում կրկին դեպի Շվեյցարիա գործուղումը արժեցել է 743 հազար 528 դրամ, որից ավիատոմսը կազմել էր 203 հազար 377 դրամ՝ մոտ երեք անգամ ավելի մատչելի նախարարության մյուս աշխատակիցների դեպի Շվեյցարիա գործուղման ավիատոմսերից: Այս գործուղման «առյուծի բաժինը» ուղղվել է գիշերակացի և սննդի գնմանը: Էլեոնորա Վիրապյանը Շվեյցարիայում երեք օր մնալու ընթացքում գիշերակացի և սնվելու համար ծախսել է 540 հազար դրամ: