Նոյեմբերյանում Եռաչափ մոդելավորման դասարան կբացվի

ОБЩЕСТВО 29 Май, 2017 17:36

Մոտ ապագայում սահմանամերձ Նոյեմբերյանը Եռաչափ մոդելավորման դասարան կունենա: «Ինովացիոն և տեխնոլոգիական համայնք» սոցիալական Հկ-ն՝ հանձինս ՀԿ հիմնադիր Սամվել Խաչատրյանի, համահիմնադիրներ Սոֆյա Հովսեփյանի և Սիրանուշ Ամիրաղյանի, հունիսին ձեռնամուխ կլինեն Նոյեմբերյան քաղաքում եռաչափ մոդելավորման դասարանի բացմանը։

2016թ–ին՝ Սամվել Խաչատրյանի և Սոֆյա Հովսեփյանի նաձեռնությամբ, նմանատիպ դասարաններ բացվել են Տավուշի մարզի սահմանամերձ Բերդավան և Կողբ գյուղերում՝ հաշվի առնելով այն հանգամանքը, թե որքան կարևոր են ինժիներական մտածողությունը և նորագույն տեխնոլոգիաները հասարակության զարգացման, պետության դերի և անվտանգության բարձրացման գործոնները:

«Գիտակցումը, որ մեր միջավայրի բարելավումը անմիջականորեն կախված է առաջին հերթին մեզնից յուրաքանչյուրից, և մեր քայլերի արդյունքում է ձևավորվում մեր շրջակա միջավայրը, համայնքը, պետությունը՝ մեր նախաձեռնող խումբը որոշեց, որ ծրագիրը պետք է շարունական լինի, և հերթը Նոյեմբերյան քաղաքինն է։ Այդ առումով մեզ համար շատ կարևոր էր 2016թ–ը, երբ որոշեցինք մասնակցել ԵՄ-ի կողմից ֆինանսավորվող «Համայնքային զարգացում սոցիալական ձեռնարկության միջոցով» ծրագրին: Բազմաթիվ ծրագրերի և գաղափարների մեջ ընտրվեցին լավագույն 10 պրոյեկտները տարբեր մարզերից, որոնք արժեքները կփոխեն իրենց համայնքում, կստեղծեն աշխատավայրեր և ասելիք կունենան պետության զարգացման գործում»,- Past.am-ի հետ զրույցում նշեց Սամվել Խաչատրյանը:

Ստեղծվելիք սոցիալական ձեռնարկատիրությունը նպատակ ունի ստեղծելու եռաչափ մոդելավորմամբ զբաղվող անհատ ձեռնարկատերերի՝ ֆրիլանսերների, որոնք կկարողանան իրենց կողմից ստեղծած եռաչափ մոդելները, որպես ապրանք, իրացնել այժմ ստեղծվող ինտերնետային հարթակի միջոցով: Կազմակերպիչների խոսքով՝ գյուղական համայնքում բնակվող սոցիալապես անապահով քաղաքացու համար սա մեծ հնարավորություն է՝ առանց կտրվելու իր առօրյայից, շարունակելով զբաղվել գյուղատնտեսությամբ, միաժամանակ հնարավորություն ունենալ տանը համակարգչի օգնությամբ հավելյալ գումար ստեղծել սեփական և համայնքային կարիքները հոգալու համար:

«Ուսումնասիրելով տեղի պոտենցիալը՝ կարող ենք վստահաբար ասել, որ կան հոյակապ կադրեր, ովքեր այսօր ի վիճակի են լավագույնս ներգրավվելու մեր նախընտրած ոլորտում և դառնալու իսկական առաջատար մասնագետներ։ Այս պրոյեկտի շրջանակներում հնարավորություն կտրվի վերապատրաստվող կադրերին ունենալ հավելյալ եկամուտներ՝ ի հաշիվ նոր մասնագիտության և, շարունակելով բնակվել հայրենի բնօրրանում, օգտագործել ՏՏ ոլորտի նորագույն տեխնոլոգիաները՝ ի բարօրություն սեփական ընտանիքի և համայնքի»,- հավելում է Սամվել Խաչատրյանը։

Ծրագրի իրականացման համար հանդիպումներ են տեղի ունեցել և հուշագրեր ստորագրվել Նոյեմբերյանի համայնքապետ Կարեն Աբազյանի, ինչպես նաև՝ Կողբի Գեղարվեստի դպրոցի հետ։

«Ինովացիոն և տեխնոլոգիական համայնք» սոցիալական Հկ–ի համահիմնադիրները վստահ են, որ սեփական օրինակով համայնքային բնակչությանը կարող են ցույց տալ, որ ճիշտ եղանակով ներդրվող ստարտափը կարող է և պե՛տք է ունենա մեծ հաջողություն։

Մարիամ Նալբանդյան