Մեծ Յոթնյակի գագաթնաժողովը չստացվեց

МЕЖДУНАРОДНОЕ 30 Май, 2017 16:05

Սիցիլիայում հրավիրված Մեծ Յոթնյակի գագաթնաժողովի առիթով ԱՄՆ–ում կատակում են, թե նախագահ Թրամփը ճիշտ իր տեղն էր գնացել՝ մաֆիայի հայրենիք, որովհետև հայտնի Կորլեոնե կնքահոր նմանությամբ պատերազմ է հայտարարել բոլորին:

Գերմանացիները վատն են, որովհետև պատշաճ կերպով չեն առևտրային հարաբերություններ պահպանում ԱՄՆ–ի պես հզոր երկրի հետ, Բրյուսելը առնետանոցի է վերածվել, Փարիզը նախկին Փարիզը չէ՝ իր ընկերն այլևս այնտեղ ոտք չի դնում, Չեռնոգորիայի նախագահը խանգարում է արարողակարգային լուսանկարում ամբողջ շքեղ հասակով երևալ՝ դրա համար էլ պիտի նրան մի կողմ հրել, Կանադայում շատ են իրենց երևակայում, Ճապոնիան պիտի արագացնի դաշնակցային քայլերը՝ Հյուսիսային Կորեայի հետ կապված: Մի խոսքով՝ ամբողջ աշխարհն ինչ–որ բան այնպես չի անում, և չնայած բոլորը խանգարում են Ամերիկան նախկինի պես մեծ դարձնելուն, միևնույն է, Թրամփը կանի դա և նախ՝ իր երկրում: Washington Post թերթի ներկայացմամբ՝ մեծ տուրնեից հայրենիք վերադարձած ու իր վարկանիշը ևս մի քանի կետով նվազած հայտնաբերած Թրամփի պատերի ներքո ամենահաճախ հնչող միտքն այս պահին դոն Կորլեոնեի հայտնի թևավոր խոսքն է՝ «Պատերազմ ենք սկսում»:

Պատերազմն էլ, հայտնի դարձավ, տարվելու է մի քանի ուղղությամբ. վարկանիշի բարձրացում, որի համար արդեն քաղտեխնոլոգները փորձում են վերականգնել նախընտրական շրջանի ոգին՝ Թրամփին առաջարկելով այս անգամ էլ հայրենիքում տուրնե սկսել և նորից շփվել հասարակ մարդկանց հետ, Սպիտակ տնից տեղեկատվության արտահոսքի խողովակների հայտնաբերում և արգելափակում, մամլո խոսնակի լիազորությունների նվազում, իսկ որ ավելի ճիշտ է՝ ավանդական բրիֆինգին օժանդակ ուժերի ներկայություն, պայքար թշնամական մամուլի, նենգ ուժերի դեմ և այլն:

Հաղթական, թե՝ ոչ, դեռ վաղ է ասել, բայց ակնհայտ է, որ պատերազմին զուգահեռ՝ Սպիտակ տունը փորձում է էլ ավելի խստացնել հռետորաբանությունն իր համար գլորման վեմ դարձող Ռուսաստանի հանդեպ: Օրինակ՝ Մեծ Յոթնյակի գագաթնաժողովից առաջ պետքարտուղար Ռեքս Թիլերսոնը հայտարարեց, թե այդ երկիրը չի վերադառնա ամենազարգացած երկրների ակումբ՝ Մեծ յոթնյակ, քանի դեռ չի վերականգնվել Ուկրաինայի ինքնիշխանությունը:

«Մենք Ռուսաստանին հստակորեն բացատրել ենք, թե ինչ է դա նշանակում, խոսքը Մինսկի համաձայնագրերի կատարման և Ուկրաինայի ինքնիշխանության վերականգնման մասին է»,– ասել էր պետքարտուղարը, այդկերպ, ասես, ջնջելով եվրոպացի պաշտոնյաների թողած վատ տպավորությունն առ այն, թե՝ իրենց չի հաջողվել ամբողջական համաձայնության գալ Ռուսաստանի հարցում: Բայց, ինչպես հայտնի գրքում է ասվում՝ այս դեպքում էլ ստացվեց այնպես, որ կատուն գնաց, իսկ ժպիտը մնաց: Այլ կերպ ասած՝ Մեծ Յոթնյակի նշանակալի հանդիպման ընթացքում, որում մոլորակի ամենահարուստ պետությունների առաջնորդներն են հավաքվում մի սեղանի շուրջ՝ քննարկելու համաշխարհային տնտեսությանը, անվտանգությանն ու էներգետիկային վերաբերող խնդիրները, ԱՄՆ նախագահն, այնուամենայնիվ ձախողվեց:

Ճիշտ է՝ բանակցություններից հետո համաշխարհային տնտեսության շուրջ 50%–ը տնօրինող առաջնորդները համաձայնեցին ավելացնել ջանքերը ահաբեկչության դեմ պայքարում, զերծ մնալ հովանավորչությունից, վերացնել անարդար մոտեցումները առևտրի ոլորտում և նոր պատժամիջոցներ կիրառել Ռուսաստանի նկատմամբ, սակայն, նախ՝ չկարողացան ընդհանուր հայտարարի գալ կլիմայի փոփոխությունների համաձայնագրի հարցում, բացի այդ՝ խտացավ անվստահությունը Թրամփի, ԱՄՆ–Եվրոպա և ընդհանրապես՝ ԱՄՆ–մնացած աշխարհ համագործակցության նկատմամբ:

Հնարավոր է՝ ուրիշներն էլ էին դրա համար շատ ջանք թափել, ինչպես Սպիտակ տանն են մտածում այս պահին: Հնարավոր է՝ դեռ նախընտրական շրջանի կարծրատիպերն են աշխատել: Գուցե նաև Թրամփն ինքն է ճիշտ՝ պնդելով, որ այլևս չի պատրաստվում ձրի կամ իր երկրի շահերին հակառակ օգտակար լինել ուրիշներին, երբ օգնության կարիք ունեցողներն իրենք մատը մատին չեն տալիս՝ թեկուզ նույն ՆԱՏՕ–ի ներսում անվտանգության ֆինանսավորումն ավելացնելով: Բայց հանդիպումներն ու միջանձնային շփումները հենց փոխըմբռնման հասնելու համար են, ինչը, ցավոք, այս անգամ էլ տեղի չունեցավ, որքան էլ ԱՄՆ նախագահը Թվիթերում գրի, թե արտակարգ լավ հանդիպումներ ունեցավ ամենուր:

Գոհար Սիմոնյան