ՀԱՄԱՍ–ը նորից Իրանի՞ն է փարվում

МЕЖДУНАРОДНОЕ 31 Май, 2017 22:01

Լոնդոնում լույս տեսնող սաուդական Աշ–Շարք–ալ–Ասուատ թերթի վերջին հրապարակումներից մեկը ռումբի պայթյունի պես է հնչել Իրանի նկատմամբ թշնամաբար տրամադրված արաբական աշխարհում, ԱՄՆ–ում և Իսրայելում: Ըստ այդ հրապարակման՝ անցած հանգստյան օրերին Լիբանանում կայացել է Հըզբոլլահի, վերջին տարիներին Իրանից տարածություն պահպանող ՀԱՄԱՍ–ի և Իրանի իսլամական հեղափոխության պահապանների կորպուսի ներկայացուցիչների միջև, որի ընթացքում, իբր, հարթվել են տարաձայնությունները, և Իրանը նախնական համաձայնություն է տվել ՀԱՄԱՍ–ին ֆինանսավորելու վերաբերյալ: Նույն աղբյուրի համաձայն՝ առաջիկայում սպասվում է ՀԱՄԱՍ–ի քաղբյուրոյի նորընտիր ղեկավար Իսմայիլ Քանիայի այցն Իրան, որպեսզի վերջնականապես հարթվեն Սիրիայի պատերազմի ընթացքում բռնկված տարաձայնությունները և նոր կամուրջներ գցվեն Իրանի ու ՀԱՄԱՍ–ի միջև:

Հարկ է նշել, որ հրապարակումն, այնուամենայնիվ, մոտ է ճշմարտությանը: Եվ ոչ թե այն պատճառով, որ իսրայելական ՄՈՍԱԴ–ը նույնպես հաստատել է տեղեկությունը, որովհետև այս կառույցից, հայտնի պատճառով, կարող էր նաև ապատեղեկատվություն հնչել, այլ պայմանավորված այն փաստով, որ վերջին շրջանում ՀԱՄԱՍ–ը կրկին վերապահումներ ունի Պաղեստինի ինքնավարության ղեկավար Մահմու Աբասի նկատմամբ և չի վստահում Թրամփ–Իսրայել՝ Մերձավոր Արևելքում խաղաղություն հաստատելու անորոշ պլանին:

Իրանի նկատմամբ բարեհաճ վերաբերմունքի ապացույց էր նաև ՀԱՄԱՍ–ի քաղբյուրոյի ընտրությունը, որում մերժվեց Իրանի համար անընդունելի թեկնածու, Մուսա Աբու Մարզրուկն, ու ընտրվեց Քանիան, որը Թեհրանի հետ համագործակցության մեծ փորձ ունի: Նշանակալի էր նաև Իրանի Ղոդսի և Ինթիֆադայի շտաբի պետ, գեներալ Ռամազան Շարիֆի խոսքը՝ Ղոդսի համաշխարհային օրվա կապակցությամբ, որում գեներալը լուսահոգի Իմամ Խոմեյնիի արժեքավոր հիշատակի կարևոր ժառանգություններից մեկն էլ Պաղեստինի իրավազրկված ժողովրդի արդարացի հաղթանակը համարեց սիոնիստների դեմ, կոչ անելով վերջ դնել իսլամական հասարակությունների միջև թշնամանքին, ավելացնել գործակցությունն ու համադրումները՝ պաղեստինյան հարցն առանցք դիտարկելով:

ՀԱՄԱՍ–ին, հավանաբար, խուճապի է մատնել նաև այն փաստը, որ անցած շաբաթ ԱՄՆ Կոնգրեսը պատժամիջոցներ կիրառելու մասին օրինագիծ հաստատեց բոլոր այն կառավարությունների, անձանց ու կազմակերպությունների նկատմամբ, որոնք կօժանդակեն ՀԱՄԱՍ–ին, Իսլամական ջիհադ կազմակերպությանն ու այլոց: Հանգամանք, որ ՀԱՄԱՍ–ին կզրկի ԱՄՆ դաշնակից սաուդիների, Քաթարի, նույնիսկ Թուրքիայի և, իհարկե, Աբասի օգնությունից, որն այժմ հարյուր անգամ պիտի մտածի՝ ՀԱՄԱՍ–ի կողմից վերահսկվող Գազայի հատված որևէ բան փոխադրելուց առաջ:

Անշուշտ, Իրանը քաջատեղյակ է բոլոր դետալներին: Եվ այժմ, երբ նաև ՀԱՇԴ–ալ–Շաաբը՝ Իրաքի ժողովրդական ուժերն են հայտարարել Սիրիային օգնելու վերաբերյալ՝ հայտարարելով, որ «մոտենում են Սիրիայի սահմանին, և Ասադի բանակն այժմ կարող է ավելի հեշտությամբ առաջանալ հյուսիսում գտնվող Ռաքքա՝ այդկերպ ազդարարելով ԴԱԻՇ–ի վերջն ու Սիրիա–Իրաք, Սիրիա–Հորդանան սահմանի՝ ամերիկյան վերահսկողության պլանի ձախողումը, թիկունքում լոյալ կամ բարեկամական ՀԱՄԱՍ ունենալը շատ օգտակար կլինի: Հավելենք նաև Իրաքի շիական Բադր կազմակերպության գլխավոր քարտուղար Հադի Ալ–Ամերիին, որը նույնպես հայտարարել է ընդհուպ՝ Սիրիայում ԴԱԻՇ–ին հետապնդելու մասին, ընդ որում՝ Ասադի համաձայնությամբ...

Գոհար Սիմոնյան