Երևանը փորձադաշտ չէ, կենդանի մարմին է. Շուշան Պետրոսյան

Երևանն, անշուշտ, շատ է փոխվել, շատ է գեղեցկացել, նոր, լավ ու վատ շինություններ, պողոտաներ են կառուցվել, նոր թաղամասեր։ Այս ամենը հրաշալի է, ու նման երևույթ կատարվում է յուրաքանչյուր զարգացող, քաղաքակիրթ երկրում: Այս մասին Tert.am-ի հետ զրույցում ասաց ՀՀ վաստակավոր արտիստ, ԱԺ «Հանրապետական» խմբակցության պատգամավոր Շուշան Պետրոսյանը անդրադառնալով Երևանում կատարված փոփոխություններին:

Չնայած դրան արվեստագետը ավելացրեց. «Բայց ... կա մի բայց։ Որևէ քաղաքակիրթ երկրում, ինչ-որ մեկի «կամակորությանը» ընդառաջելով, հին քաղաքի ֆրագմենտները, հին շենքերը չեն քանդում նորը կառուցելու համար, այլ վերանորոգում են, վերականգնում ու նոր կյանք տալիս, ներսից գերժամանակակից ("Hightech") լուծումներով , իսկ դրսից բնավ չաղավաղելով շինությունների բնական կապելլան։ Սա թեմա է ու կարևոր թեմա»,-ասաց նա:

Երգչուհին նշեց, որ մեր քաղաքը պատմություն ունի ու այդ պատմության վկաներին վերացնելը մեղք է։ «Երբ որևէ փողոց կառուցվում է կոնկրետ ճարտարապետական մոտեցմամբ, կոնկրետ նախագծով , այդ փողոցի ինչ-որ հատված սեփականաշնորհած որևէ անձ պարտավոր է հաշվի նստել այդ մոտեցման, նախագծի հետ, սա միանշանակ։ Ասեմ ավելին, սույն անձը լայն հնարավորություն ունի սեփական երևակայության բոլոր դրսևորումները փորձարկել իր տանը կամ տնամերձ հողամասում։ Երևանը փորձադաշտ չէ, կենդանի մարմին է, եթե չընդունեց, խնդիրներ կունենաք»,-ասաց նա:

Շուշան Պետրոսյանն ասաց, որ Երևանի հետ կապված շատ պարզ երազանքներ ունի: «Ուզում եմ՝ Նորքի անտառը վերականգնվի ու ծառատունկն անեն Երևանն իսկապես սիրողները, այն մարդիկ, որ անառևտուր են ապրում մեր քաղաքում, առանց «դու ինձ, ես քեզ», «բարտերային» հեռանկարներ ծրագրելու, մարդիկ, որ ուղղակի սիրում են Երևանը, որովհետև Երևանն իրենցն է։ Ուզում եմ Երևանի բոլոր թաղամասերը կենտրոնի պես մաքուր, խնամված լինեն, մեկ էլ ուզում եմ, որ Երևանցիները Երևանն իրենց տան նման սիրեն ու այդ սիրով ու խնամքով վերաբերվեն մեր քաղաքին։ Ես իմ տան պես եմ սիրում Երևանը,  մեկ էլ Ֆորշի «Երևանը տուն ու շենք չի, Երևանը մենք ենք, Երևանն անկեղծ սիրելը չգրված օրենք է ...» երգն եմ սիրում ... »,-հավելեց նա: