Ինչու է «Ելքը» լռում «Սասնա ծռերի» խստացված մեղադրանքների առթիվ. «Փաստ»

«Փաստ» օրաթերթը գրում է.

ՊՊԾ գնդում «Սասնա ծռերի» հետ բանակցությունների ժամանակ իշխանությունն իր բանագնացների միջոցով, նաև ԱԱԾ հայտարարությամբ, խոստացավ մեղմ պատիժ սահմանել խմբի համար՝ հանձնվելու դեպքում: Չնայած նրանք ի վերջո հանձնվեցին, սակայն վերջին շրջանում իշխանությունն է՛լ ավելի խստացրեց նրանց մեղադրանքները:

Ուշագրավ է, որ որևէ քաղաքական ուժ՝ այդ թվում ընդդիմությունը, հայտարարություն չարեց այդ առթիվ ու այժմ էլ լռություն է պահպանում: Ինչպես հայտնի է՝ «Սասնա ծռերի» գործը 14 մեղադրյալի մասով ուղարկվել է Երևանի Էրեբունի և Նուբարաշեն վարչական շրջանների ընդհանուր իրավասության դատարան և մակագրվել դատավոր Արտուշ Գաբրիելյանին: Այս գործով առաջին դատական նիստը տեղի կունենա հունիսի 8–ին:

«Փաստը» «Ելք» դաշինքի ներկայացուցիչ, «Քաղաքացիական պայմանագիր» կուսակցության վարչության անդամ Արայիկ Հարությունյանից հետաքրքրվեց, թե ինչպիսին է «Ելքի» դիրքորոշումը «Սասնա ծռերի» դատավարության առթիվ և ինչու է «Ելքը» պասիվ այդ առթիվ:

«Այդ հարցը չենք քննարկել, առաջիկայում նիստ կունենանք, հավանաբար կքննարկենք, այս պահին ընդհանուր դիրքորոշում չկա»,– ասաց Հարությունյանը:

Հետաքրքրվեցինք, թե ի վերջո՝ իր կարծիքով, «Ելքը» կամ ՔՊ–ն պետք է կանգնի այդ դատավարության կողքին, քանի որ տեսանք, որ իշխանությունը խոստացավ, որ հանձնվելու դեպքում մեղմ պատիժ կլինի, սակայն հետո խստացվեց պատիժը, ՔՊ ներկայացուցչն ասաց. «Թե՛ քաղաքացիական պայմանգիրը, թե՛ «Ելք» դաշինքը իր ունեցած բոլոր լծակներով այնտեղ է, որտեղ անաչառ դատավարություն չի իրականացվում, որտեղ խնդիրներ են առաջանում: Խնդիրներ առաջանալու պես մենք կարձագանքենք և առաջիկայում էլ, եթե էդպիսի անհրաժեշտություն լինի, հայտարարությամբ հանդես կգանք»: Արայիկ Հարությունյանը նաև ասաց, թե առաջիկայում անհրաժեշտության դեպքում իրենք անպայման կանդրադառնան այդ հարցին:

Նշենք, որ ըստ մեղադրանքի՝ Հատուկ քննչական ծառայությունում քննվող քրեական գործի նախաքննության ընթացքում ձեռք բերված փաստական տվյալներով հիմնավորվել է, որ ծանր հանցագործություն կազմակերպելու համար մեղադրվող Ժիրայր Սեֆիլյանին և մի շարք այլ անձանց ՀՀ արդարադատության նախարարության քրեակատարողական հիմնարկներից ազատ արձակելուն պետությանը հարկադրելու նպատակով՝ ՀՀ ոստիկանության Երևան քաղաքի վարչության պարեկապահակետային ծառայության գնդի վարչական շենքերը, շինությունները և տրանսպորտի միջոցները զավթելու, պատանդներ վերցնելու և պահելու համար Վարուժան Ավետիսյանը Պավել Մանուկյանի, Արմեն Լամբարյանի, Արայիկ Խանդոյանի, Մխիթար Ավետիսյանի և մյուսների հետ ստեղծել է կազմակերպված, զինված կայուն խումբ, որում ընդգրկվել են Աշոտ Պետրոսյանը, Սմբատ Բարսեղյանը, Սեդրակ Նազարյանը, Էդվարդ Գրիգորյանը, Գագիկ Եղիազարյանը, Արմեն Բիլյանը, Արեգ Կյուրեղյանը և այլք:

Կազմակերպված խմբի անդամները նախապես ուսումնասիրել են որպես թիրախ ընտրված ՊՊԾ գնդի տարածքը, հավաքագրել ու հրահանգավորել են խմբի անդամներին, կատարել են գործողությունների հստակ դերաբաշխում, ապօրինի կերպով ձեռք են բերել և պահել հրազեն հանդիսացող 14 ինքնաձիգ՝ ռազմամթերք հանդիսացող փամփուշտներով, ինքնաշեն ատրճանակ, ռազմամթերք հանդիսացող 20 նռնակ, ինչպես նաև տրոտիլային պայթաղյուս:

Շարունակությունը` «Փաստ» օրաթերթի այսօրվա համարում