Ռաքքան կռվախնձոր է դարձել բոլորի համար

МЕЖДУНАРОДНОЕ 2 Июнь, 2017 12:34

Երկու օր առաջ Deepika news գործակալությունը հղում անելով հետախուզական մարմիններին՝ հաղորդել էր, որ ԱՄՆ–ն գաղտնի բանակցություններ է վարում ԴԱԻՇ ահաբեկչական խմբավորման պարագլուխների հետ՝ սիրիական Ռաքքայից նրանց ապահով դուրսբերման, քրդերի հետ չբախվելու և մինչև ռուսների ու Ասադի բանակի տեղ հասնելը՝ քաղաքը երկուստեք նվազագույն կորուստներով ազատագրելու հիմնական պայմանով: Կար նաև մեկ այլ կարևոր հանգամանք. եթե ԴԱԻՇ–ը համաձայներ ԱՄՆ–ի պայմաններին, վերջինս ստիպված չէր լինի զինել քրդերին՝ այդկերպ խուսափելով նաև Թուրքիայի հետ ունենալիք նոր խնդիրներից:

Վերլուծելով ռուսական վերջին հարվածների ուղղությունն ու մի շարք այլ հանգամանքներ՝ երեկ մենք արժանահավատ էինք համարել այս տեղեկությունը, եզրակացնելով, որ ռուսները որոշել են վիժեցնել բանակցությունները՝ ջիհադիստներին Ռաքքայից հեռանալու հնարավորություն չտալով, շրջափակելով քաղաք տանող համարյա բոլոր ճանապարհներն ու հնարավոր օժանդակությունը:

Երեկ, սակայն, ռուսական աղբյուրները ազդարարեցին, թե ԴԱԻՇ–ի հետ բանակցություններն առանց քրդերի չեն ընթանում: Եվ եթե նույնիսկ հավատ չընծայեինք ռուսական RT–ին, որ Արևմուտքում պուտինյան քարոզչության հիմնական խոսափողն է համարվում, ստիպված էինք վստահել թե՛ սիրիական աղբյուրներին, այդ թվում՝ ընդդիմադիր, թե՛ սաուդական Ալ–Հայաթին, որոնց պնդմամբ՝ Սիրիայի դեմոկրատական ուժերի քրդական ջոկատներն արդեն հայտնվել են համարյա բոլոր կողմերից պաշարված Ռաքքայի հարավային մատույցներում, վերահսկողության տակ առել Ռաքքա–Ռասսաֆա մայրուղին, որ ջիհադիստների կյանքի ճանապարհն է հանդիսանում, իսկ Կոալիցիայի օդուժը հսկում է վերից:

Ռաքքայի ազատագրումն, այսպիսով, հաշված օրերի կամ նույնիսկ ժամերի խնդիր է համարվում, և ամերիկյան մամուլն արդեն գրում է այն մասին, թե հաշվի առնելով տեղի արաբ բնակչության հակակրանքը քրդերի նկատմամբ՝ որոշվել է տեղում ժամանակավոր արաբական վարչակազմ ձևավորել, որն, այնուամենայնիվ, կենթարկվի ԱՄՆ–ին ու քրդերին: Բնական է. ռուսներն ու Ասադն այդ դեպքում ուշացած/անցանկալի հյուրեր կհամարվեն, իսկ Թուրքիայի առաջ ԱՄՆ–ն որևէ պարտավորություն չի ունենա, թեպետ՝ հարաբերություններն ավելի կվատանան, ինչից, ռուսների մեղքով, հնարավոր չեղավ խուսափել. մայիսի վերջին օրը, ի ցավ Թուրքիայի, ԱՄՆ–ն ստիպված եղավ հավելյալ զենք մատակարարել քրդերին:

Ինչ էր մնում այս իրավիճակում անել ռուսներին՝ պարզ է. «Փաստը» պատրաստվում էր նոր հարվածներ կանխատեսել, և, խնդրեմ, ՌԴ Պնախարարությունը հաղորդեց, որ երեկ ռուսական օդուժը ռմբակոծել է ԴԱԻՇ–ին՝ խափանելով ահաբեկիչների փախուստը Ռաքքայից Պալմիրա:

Լոնդոնում լույս տեսնող Աշ–Շարք ալ–ասուատ թերթն էլ լրացրեց պատկերը՝ հայտարարելով, թե ռուսները ռմբակոծել են ոչ միայն ահաբեկիչներին, այլև, այսպես կոչված, Սիրիայի ազատ բանակի դիրքերը, որ տեղակայված են Պալմիրայի և Իրաքի սահմանի միջակայքում: Ինչո՞ւ, կարելի է ենթադրել. հավանաբար, Սիրիայի ազատ բանակը գրոհել է Իրաքի սահմանին կռվող շիաների և Հըզբոլլահի մարտիկների ուղղությամբ, ինչը զայրացրել է ռուսներին, որովհետև ընդդիմությունն այդկերպ օգնել է ԱՄՆ–ին՝ Ռաքքայի մատույցներում իրեն ավելի հանգիստ զգալ:

Մյուս կողմից էլ՝ դատելով Բանակցությունների բարձրագույն կոմիտեի ղեկավար Նասր Հարիրիի խոսքից, որով նա երեկ հարձակվեց ոչ միայն Իրանի, Հըզբոլլահի, այլև ԱՄՆ–ի ու քրդերի վրա (նշելով, թե նրանց նպատակը ոչ թե Ասադի ռեժիմի տապալումն է, այլ Սիրիայի մասնատումը, իսկ Սիրիայի դեմոկրատական ուժերին Թուրքիայի Քրդական բանվորական կուսակցության մաս որակեց, որ համընկնում է Անկարայի տեսակետին), ակնհայտ է, որ Ռաքքայի ազատագրման ու դրա հետագա ճակատագրի հետ կապված պատմությունը դեռ շատ ջուր կվերցնի: