Ադրբեջանը ցանկանում է Հայաստանը «դարձնել» ահաբեկչական երկիր. «Փաստ»

«Փաստ» օրաթերթը գրում է.

Թուրքիայի ու Ադրբեջանի քարոզչական ֆանտազիան անսահման է: Հատկապես, եթե դա վերաբերում է Հայաստանին ու Արցախին:

Բանից պարզվում է, որ Թուրքիայում գործում է ASIMDER կոչվող կազմակերպություն, այն է՝ Հայերի անհիմն հավակնությունների դեմ պայքարի միջազգային ընկերություն: Ոչ ավել, ոչ պակաս: Ու այս ընկերության ղեկավար Գյուքսել Գյուլբեյը երեկ իր ֆեյսբուքյան էջում գրառում է արել, թե իբր Հայաստանը վարձել է 8000 աֆղան վարձկանի, ովքեր տեղակայվել են հայ–ադրբեջանական սահմանի երկայնքով: «Նրանք շփման գծի երկայնքով տեղակայվել են ապրիլյան պատերազմից հետո: Նրանց վճարելու են 3000 դոլար, նրանց հետ պայմանագիրը կնքվել է 5 տարով, իսկ ծառայության վերջում նրանց տալու են Հայաստանի քաղաքացիություն և ելք դեպի Եվրոպա»:

Այս տեղեկատվական աղբը կարելի էր դիտել որպես ադրբեջանական ֆանտազիայի հերթական թափոն, եթե չլինեին մի քանի քաղաքական զարգացումներ:

Վերջին շրջանում միջազգային հարթակում տեղի են ունենում իրադարձություններ, որոնք առաջիկայում կսահմանեն նոր օրակարգ: Ուստի այդ երկուսը փորձում են ամեն կերպ ներս խցկվել և պահը բաց չթողնել սեփական հարցերը լուծելու համար: Հատկապես Ադրբեջանը:

Արդեն քանի օր է՝ Բաքվի ղեկավարությունը նոր էջ է բացում ԱՄՆ–ի հետ հարաբերություններում: Սաուդյան Արաբիայում կայացած գագաթաժողովին Ալիևի մասնակցելը, այնտեղ Թրամփի ելույթը, հետո Թրամփի ուղերձները Ադրբեջանի Հանրապետության, ապա «Caspian Gaz & Oil» ցուցահանդեսի բացման առթիվ և այլն, ադրբեջանցիներին ոգեշնչել են առ այն, որ հիմա նոր էջ է բացվում: Իրականում նրանք փորձում են հնարավորինս նկատի դառնալ, ինտեգրվել նոր զարգացումներին և հատկապես ԱՄՆ–ի ուշադրությունը բևեռել իրենց ու իրենց խնդիրների վրա:

Երեկ ԱՄՆ փոխնախագահ Փենսը հայտարարեց, որ աշխարհի համար գլխավոր սպառնալիք են Ռուսաստանը, Իրանը և ահաբեկչությունը:

Գանք հերթով: Վերջին շրջանում Բաքվի ու Մոսկվայի միջև հարաբերությունները որոշակի չափով լարվել են: Իրենց համար գլխավոր՝ ԼՂ հարցի լուծումը Բաքուն ավելի շատ տեսնում է կամ փորձում է տեսնել կամ էլ գուցե տպավորություն է ստեղծում, որ տեսնում է ԱՄՆ–ի ձեռքում: Նրանք հույս ունեն, որ բիզնես մտածողություն ունեցող Թրամփը կգնահատի իրենց էներգետիկ կարողությունները:

Երբ ասում են, թե իբր մենք աֆղան վարձկաններ ենք վարձել, դա նշանակում է, որ ահաբեկիչներ ենք վարձել: Դա էլ նշանակում է, որ Հայաստանը համագործակցում է ահաբեկիչների հետ: Ուրեմն, պետք է պատժել Հայաստանին: Ի դեպ, վերջին շրջանում հատկապես ադրբեջանական մամուլում բազմաթիվ են հոդվածներն ու «վերլուծականները», որտեղ պատմվում է Հայաստանի՝ ահաբեկիչների «որջ» լինելու, ահաբեկչական «ավանդույթներ» ունենալու («Ասալան», «Դաշնակցությունը», գնում են հասնում են մինչև Թեհլերյան և այլն), նաև հարցերը ահաբեկչությամբ լուծելու գործելաոճի մասին: Մի խոսքով, փորձում են Հայաստանը ներկայացնել որպես ահաբեկչական երկիր, որի դեմ պետք է պայքարել:

Իրանի մասով: Նույն այդ տեքստում Գյուլբեյ կոչվածը Իրանին կոչ է անում թույլ չտալ աֆղան վարձկաններին անցնել Հայաստան: Իսկ դա նշանակում է, որ Գյուլբեյն ասում է, որ այդ վարձկանները անցնում են Իրանի տարածքով, կամ փորձում են անցնել: Ամեն դեպքում Իրանի անունը նույնպես կապվում է ահաբեկիչների հետ: Իսկ թե կոնկրետ ԱՄՆ–ի համար Իրանը ինչ երկիր է, կարիք չկա ասելու:

Մի խոսքով, քարոզչական նման աղբ տարածելով՝ փորձում են մի հարվածով մի քանի հարց լուծել: Բայց երբ քարոզչական փուչիկներ ստեղծելու համար գործադրված ֆանտազիան ավելի «թեթև» է լինում, քան բուն փուչիկը, նույնիսկ ծիծաղելի չի լինում:

Շարունակությունը` «Փաստ» օրաթերթի այսօրվա համարում