Հովհաննես Մարգարյան. «Որևէ մեկը չի կարող մեզ սպառնալ». «Փաստ»

«Փաստ» օրաթերթը գրում է.

Գյումրու ընդդիմադիր ավագանիների հետ իրենցից մանդատ խլելու առթիվ ավագանու նիստերի բոյկոտ հայտարարած Հայկական վերածնունդ կուսակցությունը նախօրեին որոշել է մասնակցել ավագանու նիստին: Նշենք, որ մինչ այդ Գյումրու քաղաքապետ Սամվել Բալասանյանը հայտարարել էր, որ նախագիծ կներկայացնի ավագանու նիստերից անհարգելի բացակայած` ավագանու 16 անդամների լիազորությունները վաղաժամկետ դադարեցնելու մասին:

«Փաստը» զրուցեց ՀՎԿ նախկին պատգամավոր Հովհաննես Մարգարյանի հետ, ով Գյումրու ընտրություններում գլխավորում էր ՀՎԿ ցուցակը, իսկ այժմ նշանակվել է Արթուր Բաղդասարյանի Ոսկեվազի գործարանի տնօրեն:

– Պարոն Մարգարյան, ի՞նչն էր պատճառը, որ ՀՎԿ–ն որոշեց մասնակցել Գյումրու ավագանու նիստերին: Դա Գյումրու քաղաքապետ Սամվել Բալասանյանի սպառնալիքի արդյունքո՞ւմ, որ ինքը կդիմի բացակայող ավագանիներին զրկելու համար:

– Որևէ մեկը չի կարող մեզ սպառնալ: Մենք բացառապես միշտ քաղաքական դաշտում գործել ենք մեր խղճով, համոզմունքներով և տեր ենք կանգնել մեր ժողովրդի վստահության քվեին: Նախ ասեմ, որ մենք կաշկանդված չենք մեր որոշումների մեջ և մինչև մարտ ամիսը բոլորիդ աչքի առաջ ակտիվ պայքարել ենք, որ մեզանից այդ ֆոկուսային բոնուսային համակարգով խլված մեկ մանդատը վերադարձնենք: Եթե հիշում եք, այդ համակարգով մեզնից ու ԲՀԿ–ից մեկական մանդատ խլվեց ու արդյունքում իշխանության ձեռքին հայտնվեց 17 մանդատ, ինչը լուծեց քվորում ունենալու խնդիրը: Մենք մինչև վերջ պայքարեցինք, և մարտի 10–ին, 3 քաղաքական ուժերով հավատարիմ մնացինք ընդդմադիր ուժերի հուշագրին: Դրանից հետո էդ հուշագիրը կորցրեց իր ուժը: Որպես այս նստաշրջանի ավագանու վերջին նիստ, սեպտեմբերից նոր նստաշրջան է սկսվում, մենք թողեցինք մեր տեղական կառույցներին, որ որոշում կայացնեն ու ընդամենը գրանցվեն: Խոսակցություններից զերծ մնալու համար որոշեցինք գրանցվել: Մենք ոչ կաշկանդված ենք, ոչ որևէ մեկից կախման խնդիր ունենք: Ինչ վերաբերում է նենգ ասեկոսեներին մեր ավագանիների հասցեին, թե կա պայմանավորվածություն, էնտեղ գումար են տալիս և այլն, ես միայն կողջունեմ իրավապահ մարմիններին, որ այդ ուղղությամբ ուշադրություն դարձնեն:

– Պարոն Մարգարյան, այսպիսով չի՞ ստացվում, որ Դուք հաշտվեցիք Ձեր կորցրած մանդատի հետ, ընդունեցիք իշխանության խաղի կանոնը և հիմա հանձնվում եք:

– Ոչ, մենք որևէ անգամ չենք հանձնվել, շարունակելու ենք պայքարել, ուղղակի այսօրվա դրությամբ ունենք այն, ինչ ունենք: Մենք օգտագործել ենք բոլոր իրավական ճանապարհները: Չհասկացանք, ինչի պետք է հանձնվենք: Հիմա էլ ենք ասում, որ մեզ զրկել են մեկ մանդատից: Չեմ պատկերացնում, որ տարիներ շարունակ ավագանու անդամները չպիտի մասնակցեն ավագանու նիստերին:

– Իսկ մյուս ընդդիմադիրների կարծիքը, ում հետ Դուք գնացիք ՍԴ և ովքեր չեն մասնակցում ավագանու նիստերին, Ձեզ չի՞ հետաքրքրում:

– Այսինքն, ի՞նչ կարծիք: Մենք որոշում ենք կայացրել, որ ՍԴ որոշումից հետո մենք բոլորս անկախ ու ազատ ենք մեր որոշումների մեջ: Մենք կաշկանդված չենք որևէ հարցում:

– Մտավախություն չունեք, որ Ձեզ կմեղադրեն իշխանության հետ պայմանավորվածության մեջ:

– Ոչ միայն մտավախություն չունեմ, այլև ուշադրություն էլ չեմ դարձնում այդ նենգ ասեկոսեներին:

– Հնարավո՞ր է՝ Վանաձորում էլ Ձեր տեղական կառույցը նման որոշում կայացնի, և գնաք, մասնակցեք ավագանու նիստին:

– Ես որևէ կապ չեմ տեսնում Վանաձորի ու Գյումրու հետ, էնտեղ մեկ այլ խնդիր, էստեղ՝ այլ: Գյումրիում քվորումի խնդիր չկա:

– Այնուամենայնիվ, Ձեր կարծիքով, պե՞տք է նիստերին մասնակցեն ՀՎԿ Վանաձորի ավագանիները:

– Գիտեք ինչ՝ Վանաձորում մեզանից մանդատ չեն տարել, էստեղ մեզանից մանդատ են տարել, տարբեր բաներ են: Ինչ վերաբերում է տեղական մեր մարմինները ինչ կորոշեն, իրենք հրապարակային էդ մասին կասեն:

– Ասել է թե՝ չեք էլ բացառում, որ Վանաձորում հնարավոր է նմանատիպ որոշում կայացվի:

– Ես չասացի որևէ բան, ես ասացի՝ մեր կառույցները կաշկանդված չեն, կքննարկեն մեր կառույցները, բաց, հրապարակային կխոսենք: Ինչ կա դրա մեջ, որ Գյումրիում քննարկել, որոշել են, գնացել, գրանցվել են:

– Պարոն Մարգարյան, վերջին շրջանում ՀՎԿ–ն բավական պասիվ է, ի՞նչն է պատճառը, հնարավո՞ր է չի կարողանում ուշքի գալ խորհրդարանի ընտրություններում պարտությունից հետո:

– Խորհրդարանական ընտրություններում մենք չենք պարտվել, տեսաք, ինչ տեղի ունեցավ, այն ձայնի աճուրդը, որն իրականացվեց բոլորիս աչքի առաջ, հիմա պատկերն այս է: Ունեցել ենք էնպիսի քվե, որ մենք կարող էինք խորհրդարանական քաղաքական ուժ լինել, բայց այնպիսի մասնակցություն եղավ, որ մեր տոկոսը շուրջ 4% կազմեց: Որևէ խնդիր չկա, մենք ակտիվ ենք, շարունակելու ենք պայքարը հանուն մեր ժողովրդի, հանուն մեր պետության, հանուն մեր ընտրողների:

Շարունակությունը` «Փաստ» օրաթերթի այսօրվա համարում: