Հայկազ Բաղմանյան. «Եթե ասում ենք սահմանին նորմալ է, չի նշանակում՝ ադրբեջանցին չի հարձակվելու». «Փաստ»

«Փաստ» օրաթերթը գրում է.

ՀՀ զինված ուժերի գլխավոր շտաբի պետի տեղակալ, գեներալ–լեյտենանտ Հայկազ Բաղմանյանը «Փաստի» հետ զրույցում վստահեցնում է, որ սահմանին նորմալ իրավիճակ է:

Ինչպես հայտնի է՝ ռազմական հակամարտությունների վերլուծությամբ զբաղվող Միջազգային ճգնաժամային խումբը վերջերս զեկույց է հրապարակել՝ եզրակացնելով, որ «Լեռնային Ղարաբաղի գլխին պատերազմի ամպեր են կուտակվում» և որ պատերազմի վերսկսման հավանականությունը մեծ է:

ԼՂՀ իշխանություններն արդեն իսկ հայտարարել են, որ համաձայն չեն զեկույցի մտահոգությունների հետ, քանի որ այն չի արտացոլում իրականությունը, և որ խումբը չէր կանխատեսել նաև ապրիլյան պատերազմը:

Նշենք, սակայն, որ 2016 թ. ապրիլյան պատերազմից առաջ էլ թե ԼՂՀ, թե ՀՀ ՊՆ պատասխանատուները պնդում էին, որ ամեն ինչ նորմալ է:

Ներկայացնում ենք «Փաստի» զրույցը Հայկազ Բաղմանյանի հետ:

– Պարոն Բաղմանյան, այսօր սահմանին տեխնիկայի, զորքերի կուտակումներ կա՞ն Ադրբեջանի կողմից:

– Մենք նման ինֆորմացիա չունենք:

– Պարոն Բաղմանյան, իսկ ՀՀ ՊՆ–ն ի՞նչ նոր գործողություններ, միջոցառումներ է իրականացնում, հատկապես, որ Միջազգային ճգնաժամային խումբը հայտարարել է, որ պատերազմի հավանականությունը բավական մեծ է այս պահին:

– Նորությո՞ւն է, ես չեմ հասկանում: Ուրեմն միջազգային ճգնաժամային խո՞ւմբը պետք է հայտարարի, որ մենք դա իմանանք ազգովի: 94 թվականից էլ ոչ պատերազմ, ոչ խաղաղություն վիճակ է: Այդ ժամանակվանից ամեն օր էլ ասվում է, որ լարված է: Իսկ միջոցառումներ պաշտպանության նախարարությունն ամեն օր էլ անում է:

– Հայկական կողմն ի՞նչ է անում հակազդելու հնարավոր հարձակմանը:

– Մենք պարբերաբար տեղեկացնում ենք «Զինուժ» ծրագրով, թե ինչ միջոցառումներ են կատարվում պաշտպանության նախարարությունում:

– Ուզում եմ հասկանալ՝ ուժերի կուտակում կա՞ սահմանում, ի՞նչ իրավիճակ է:

– Նորմալ իրավիճակ է, ամենօրյա իրավիճակ է:

– Ապրիլյան պատերազմից առաջ էլ հայկական կողմն ասում էր՝ ամեն ինչ նորմալ է, բայց Ադրբեջանը հարձակվեց, և եղավ պատերազմը: Հիմա նման վտանգ կա՞:

– Նորմալ ա, չի նշանակում, որ ադրբեջանցին չի հարձակվելու, բացարձակ: Եթե ասում ենք նորմալ ա, նշանակում ա ադրբեջանցին կարա հարձակվի: Ամեն դեպքում ապրիլյան պատերազմում հակառակորդն իր նպատակին չհասավ:

– Սակայն մենք հսկայական զոհեր ունեցանք:

– Իսկ պատերազմում ի՞նչ է լինում: ...Իսկ Ադրբեջանն ինչքա՞ն զոհ ունեցավ:

– Պարոն Բաղմանյան, վերջին շրջանում նոր ոտնձգություններ կա՞ն Ադրբեջանի կողմից:

– Հիմա ավելի ուժեղ ենք պատրաստված, անհոգ եղեք:

– Միջազգային ճգնաժամային խումբը նաև զեկույցում գրել էր, որ ապրիլյան պատերազմում տարածքային փոքր հաղթանակը Ադրբեջանի բանակում վստահություն է ներշնչել, որ կարող են կամաց–կամաց գրավել տարածքներրը: Նման միտում տեսնո՞ւմ եք:

– Նման միտում չկա:

Շարունակությունը` «Փաստ» օրաթերթի այսօրվա համարում: