Այսօր չափե՛ք ձեր ճնշումն ու տվյալներն ուղարկեք բժիշկներին

Հայկական բժշկական ասոցիացիան և Սրտաբանների հայկական ասոցիացիան Գերճնշման միջազգային միության և Համաշխարհային գերճնշման լիգայի հետ համատեղ հունիսի 1-30-ը Հայաստանում կիրականացնեն զարկերակային գերճնշման ակտիվ հայտնաբերմանը միտված սկրինինգային ծրագիր:

Սրտաբանների հայկական ասոցիացիայի նախագահ, Կանխարգելիչ սրտաբանության կենտրոնի ղեկավար, Երևանի գլխավոր սրտաբան Պարունակ Զելվեյանը հորդորում է չափել ճնշումն ու տվյալներն ուղարկել sirt.am կայքին:

«Կայքում նշված է զարկերակային ճնշումը ճիշտ չափելու ձևը: 5 միլիմետր սխալն էլ նշանակություն ունի:  Այցելուն 3 անգամ կչափի ճնշումը, որից հետո պատուհան կհայտնվի, որտեղ կտրվեն խորհուրդներ»,-լրագրողների հետ հանդիպման ժամանակ ասաց Պարունակ Զելվեյանը:

Նշենք, որ նորմալ զարկերակային ճնշման պահպանման համար անհարժեշտ է

1. Պահպանել նորմալ քաշը – միայն սա, կարող է արդեն բավարար լինեն զարկերակային ճնշման մակարդակի նորմալացման համար: Ավելցուկային քաշի առկայության պարագայում անհրաժեշտ է նվազեցնել քաշը մինչև մարմնի քաշի գործակիցը (ՄՔԳ) < 25 կգ/մ2: ՄՔԳ հաշվարկվում է մարմնի քաշը (կգ) բաժանելով հասակի (մ) քառակուսու վրա:
2. Ավելացնել ֆիզիկական ակտիվությունը մոտավորապես շաբաթական 150 րոպե: Ընդ որում այս ժամանակահատվածը պետք է բաժանել օրերի վրա և ֆիզիկական ակտիվությունը պետք է ուղեկցվի քրտնարտադրության առաջացմամբ, շնչառության, սրտի զարկերի արագացմամբ, որպեսզի լինի արդյունավետ:
3. Ամեն օր ընդունել  ավելի շատ մրգեր և բանջարեղեն` այնպիսի համամասնությամբ, որ ստանաք անհրաժեշտ քանակով սննդանյութեր, ընդունեք քիչ շոգեխաշած կամ հում վիճակում, խուսափեք տապակած սննդից: Նախապատվությունը տվեք բանջարեղեններին, այսինքն մրգերի համեմատ մոտ 5 : 1 հարաբերությամբ:
4. Նվազեցնել կերակրի աղի քանակը: Պետք է միշտ հիշել, որ աղ պարունակում են բոլոր կիսաֆաբրիկատները, մեծ քանակությամբ հացը և հացահատիկային սննդամթերքները, այդ պատճառով միշտ պետք է կարդալ սննդամթերքների բաղադրությունը պիտակի վրա: Ցանկալի է, որ օրվա ընդունած աղի քանակը չգերազանցի 3 գ-ը:
5. Բացի դա սննդամթերքների պիտակի վրա պետք է կարդալ ճարպերի և շաքարի պարունակությունը: Հատկապես պետք է խուսափել հիդրոգենիզացված ճարպերի (տրանս-ճարպեր) և ածխաջրերի (գլյուկոզա, սախարոզա, ֆրուկտոզա) մեծ քանակներից: Նվազեցրեք կոնսերվացված և կիսաֆաբրիկատ սննդի քանակը: Ավելի շատ օգտագործեք ձկներ, ծովամթերքներ:
6. Թողնել ծխելը: Ծխողների մոտ անոթների խցանումներն առաջանում են ավելի արագ և առողջական այլ խնդիրները նույնպես: Ճնշման և անոթազարկի բարձրացում առաջանում է յուրաքանչյուր ծխելուց 15-20 րոպե հետո:
7. Նվազեցնել կոֆեինի քանակի ընդունումը: Հիշել, որ այն պարունակվում է ոչ միայն թեյի կամ սուրճի մեջ այլ նաև էներգետիկ ըմպելիքներում:
8. Չընդունել չափից ավելի ալկոհոլային խմիչքներ: 
9. Սովորել հանել նյարդային լարվածությունը, քանի որ սթրեսը նպաստում է զարկերակային ճնշման բարձրացմանը: Հնարավորինս խուսափել սթրեսային իրավիճակներից: Աշխատանքից դուրս չմտածել աշխատանքի մասին: