Կրկին դեկլարատիվ պայքար կամ ինչ արդյունք ունեցավ կոռուպցիայի դեմ պայքարի բարձրագոչ խորհուրդը

Հայաստանում ստեղծվող հակակոռուպցիոն նոր մարմնի ֆոնին արժե հիշել, թե ինչ հաջողություն ունեցավ 2015–16 թթ. կոռուպցիայի դեմ պայքարի խորհուրդը, որը նախագահում էր ՀՀ վարչապետը: Այս խորհրդի մեկ տարվա գործունեության համար, ըստ հաշվետվության ծախսվել է ԱՄՆ USAID ծրագրի 750 հազար դոլար:

Խորհրդի հաշվետվության մեջ կան դրա դեկլարատիվ բնույթը փաստող ուշագրավ դրվագներ: Օրինակ՝ կոռուպցիայի դեմ պայքարի շրջանակներում ՀՀ կառավարության աշխատակազմի և «Ինթեգրիթի Էքշըն» կազմակերպության միջև կնքվել է 46 հանրակրթական դպրոցների սեյսմիկ անվտանգության մակարդակի բարձրացման և մշտադիտարկման իրականացման մասին համաձայնագիր: Թե ինչ կապ կարող էր ունենալ սեյսմիկ անվտանգությունը կոռուպցիայի դեմ պայքարի հետ, դժվար է պատկերացնել: Ըստ այդմ՝ 3 տարի է 46 հանրակրթական դպրոցներում «Ինթեգրիթի Էքշըն» կազմակերպությունը անցկացրել է բարեխղճության (բարեվարքության) վերաբերյալ դասընթացներ աշակերտների, ուսուցիչների, աշակերտների ծնողների, տեղական հասարակական կազմակերպությունների ներկայացուցիչների համար:

Դեռ անցյալ տարի Ազգային ժողովի պատգամավոր Էդմոն Մարուքյանը ուսումնասիրել էր ՀՀ վարչապետի գլխավորությամբ ստեղծված կոռուպցիայի դեմ պայքարի հանձնաժողովի մեկամյա գործունեության մասին 19 էջից բաղկացած հաշվետվությունը և պարզել, որ «էական քայլեր» չեն կատարվել, փոխարենը 750 հազար դոլար գումար է ծախսվել: «Որևէ էական բան չկա, հաշվետվության մեջ գրել են, որ էլեկտրոնային համակարգ է ներդրվել, բարեխղճության, բարեվարքության դասընթացներ են կազմակերպվել ուսուցիչների ու աշակերտների համար և ծախսվել է 750 հազար դոլար»,– ԱԺ–ում կառավարության հետ հարցուպատասխանի ժամանակ հայտարարեց Էդմոն Մարուքյանը: Խորհուրդը հաշվետվության մեջ չէր պատասխանել հարցին, թե պետական միջոցները փոշիացնելու մեղադրանքով քանի՞ պաշտոնյա է ենթարկվել քրեական պատասխանատվության և քանի՞սն են պաշտոնանկ արվել:

Այն ժամանակ խորհրդի անդամ, արդարադատության նախարար Արփինե Հովհաննիսյանը պատգամավորին հորդորել էր վատատես չլինել և սպասել արդյունքներին, քանի որ ծրագրերը նոր են կյանքի կոչվում: Իսկ որպես խորհրդի աշխատանքի «փայլուն օրինակ» նշել էր, որ օրենսդրական փոփոխության արդյունքում վարչական պատասխանատվության կենթարկվեն այն բարձրաստիճան պաշտոնյաները, ովքեր սխալ կամ կեղծ տվյալներ կհայտարարագրեն իրենց գույքի ու եկամուտների հայտարարագրերում:

Ինչպես տեսանք այդպես էլ որևէ պաշտոնյա պատասխանատվության չենթարկվեց կեղծ հայտարարագիր ներկայացնելու համար, չնայած նրանց իրական ունեցվածքի ու հայտարարագրած գույքի միջև տարբերությունն ակնհայտ է:

Իսկ երբ ԱԺ վերջին արտահերթ նիստում «ԵԼՔ» դաշինքի պատգամավոր Մանե Թանդիլյանը հարց ուղղեց հակակոռուպցիոն նոր մարմնի ստեղծման մասին նախաձեռնության հեղինակ, արդարադատության նախկին նախարար Արփինե Հովհաննիսյանին, թե կոռուպցիայի դեմ պայքարի նախորդ խորհուրդը, որ ստացել էր մոտ 800000 դոլար, ի՞նչ արդյունավետություն ցուցաբերեց և ինչպե՞ս ծախսվեցին այդ գումարները, Արփինե Հովհաննիսյանը հայտարարեց. «Արդյունավետության հետ կապված պետք է հաշվի առնենք այն, թե ինչ գործիքակազմ է ունեցել տվյալ մարմինը: Կոռուպցիայի դեմ խորհուրդն այն ժամանակ էլ խորհրդակցական մարմին էր՝ քննարկելու այս կամ այն հարցադրումը: Երբ հարցը բարձրացնում եք համապատասխան գումարի համար, պետք է նախ ճշգրտել, թե այդ գումարն ինչի՞ համար է տրվել: Գումարի ճնշող հատվածը դեռ ծախսված չէր, վերջին իմ տեղեկություններով, դա նախատեսված է եղել միջազգային կազմակերպությունների կողմից հենց միջազգային փորձագետներին վարձելու համար, որոնք պետք է ինչ–որ աջակցություն ցուցաբերեին»:

 

Մարինե Խառատյան