Անդրեաս Ղուկասյանը, Դավիթ Հովհաննիսյանն ու Էդուարդ Զեյթունյանը «Ելք»–ին խնդրել են խափանման միջոցը փոխելու վերաբերյալ միջնորդություն անել. «Փաստ»

«Փաստ» օրաթերթը գրում է.

Երկու օր առաջ «Ելք» խմբակցության պատգամավորներ Նիկոլ Փաշինյանն ու Մանե Թանդիլյանը այցելել էին «Նուբարաշեն» քրեակատարողական հիմնարկ և հանդիպել այնտեղ գտնվող Անդրեաս Ղուկասյանի, նույն գործով կալանավորված Դավիթ Հովհաննիսյանի և Սարի թաղի բախման գործով կալանավորված Էդուարդ Զեյթունյանի հետ:

Ի՞նչ են տեսել այնտեղ, ինչի՞ մասին են իրենց պատմել կալանավորվածները և այլ հարցերի շուրջ «Փաստը» զրուցել է պատգամավոր Մանե Թանդիլյանի հետ:

– Դուք երեկ այցելել էիք «Նուբարաշեն» քրեակատարողական հիմնարկ, հանդիպումներ ունեցել Անդրեաս Ղուկասյանի, Դավիթ Հովհաննիսյանի և Էդուարդ Զեյթունյանի հետ: Կնշե՞ք, թե այնտեղ գնալու առաջնային նպատակը որն էր:

– Առաջնային նպատակը նրանց վիճակի մասին անմիջապես իրենցից տեղեկատվություն ստանալն էր և դիտարկել նրանց կացության պայմանները: Անդրեաս Ղուկասյանին հանդիպել ենք խցում, Դավիթ Հովհաննիսյանին և Էդուարդ Զեյթունյանին տեսակցել ենք հանդիպումների սենյակում: Միևնույն ժամանակ պարոն Փաշինյանը նամակներ էր ստացել այլ կալանավորներից, հանդիպեցինք նաև նրանց:

– Խնդրում եմ նշեք, թե ի՞նչ տպավորություն ունեցանք կալանավորների պահման պայմաններից և նրանց վիճակից: Դրանք բավարար կարո՞ղ եք գնահատել: Զեյթունյանի առողջական վիճակն ինչպե՞ս էր, նա գո՞հ էր, թե դժգոհ այն բուժումից, որ ստանում է:

– Կալանավորների վիճակը տարբեր էր: Անդրեաս Ղուկասյանը գտնվում էր առանձին խցում, ուներ գրականություն, պահման պայմաններից չէր դժգոհում: Դավիթ Հովհաննիսյանը պահվում է այլ մարդկանց հետ: Առողջական վիճակից նրանք չէին բողոքում, գտնվում էին կայուն վիճակում:

Պատկերը այլ էր Զեյթունյանի դեպքում: Նա ողնաշարի խնդիրներ ուներ, առողջական վիճակը բարվոք չէր: Նա բուժում ստացել է, սակայն առերևույթ նրա առողջական վիճակը բավարար գնահատել չի լինի:

– Նրանք արտաքին աշխարհի հետ կապի միջոցներ ունե՞ն, թե ոչ:

– Այս պահին նրանց հարազատները և պաշտպանները կարողանում են այցելել իրենց և արտաքին աշխարհի հետ, փաստորեն, կապ կա: Նրանք նաև իրավունք ունեն ամիսը երկու անգամ հեռախոսազանգ կատարել:

– Ի՞նչ պահանջ, ուղերձ ունեին կալանավորները, ի՞նչ են ձեզ ասել, պատմել, ի՞նչ դժգոհություններ են հայտնել:

– Անդրեաս Ղուկասյանի և Դավիթ Հովհաննիսյանի խափանման միջոցը շարունակում է մնալ կալանքը: Որևէ պատճառ չկա նրանց խափանման միջոցը չփոխելու և երկրից չբացակայելու և դատարան ներկայանալու պարտավորվածությամբ ազատ չարձակելու համար:

Էդուարդ Զեյթունյանը նույնպես խնդրում էր միջնորդություն՝ խափանման միջոցը փոխելու հարցում: Նրա գործը բարդանում է այնքանով, որ նա նախկինում դատվածություն ունի:

Միևնույն ժամանակ հարկ է նշել, որ Հայաստանի ներկայացուցիչը եվրոպական դատարանում իր հարցազրույցներից մեկում նույնպես փաստում է, որ կալանքը որպես խափանման միջոց համատարած կիրառելու հետ կապված կարող ենք խնդիր ունենալ Եվրոպական դատարանում: Եթե այդ հարցերը քննարկվեն այնտեղ, ապա մենք կունենանք մարդու իրավունքների խախտման փաստ: Կալանքը որպես խափանման միջոց կիրառելու համար անհրաժեշտ է հիմնավորել, որ անձը կարող է թաքնվել, խոչընդոտել, իսկ այս պարագայում նման հիմնավորում չկա, ճիշտ հակառակը:

– Անդրեաս Ղուկասյանը, Դավիթ Հովհաննիսյանը զրույցում իրենց քաղբանտարկյալ համարո՞ւմ էին:

– Դավիթ Հովհաննիսյանի հետ այդ մասին չենք խոսել:

Անդրեաս Ղուկասյանը գտնում է, որ իրեն կալանավորել են քաղաքական հայացքների դրդապատճառով:

Շարունակությունը` «Փաստ» օրաթերթի այսօրվա համարում: