Շուկաներում վաճառվող ոչ մի սիգ արհեստական լճերում աճեցված չէ

 Շուկաներում վաճառվող բոլոր սիգերը հենց Սևանա լճի ձկներն են։ «Արմենպրես»-ի հաղորդմամբ՝ լրագրողների հետ զրույցում ՀՀ գիտությունների ազգային ակադեմիայի կենդանաբանության  և հիդրոէկոլոգիայի գիտական կենտրոնի տնօրեն Բարդուխ Գաբրիելյանն ասաց, որ փորձեր կատարվել են այլ տեղեր սիգ աճեցնել, բայց չի հաջողվել։ Նրա խոսքով, ոչ մի ցանցավանդակում սիգ չի աճում, և այսօրվա շուկայում վաճառվող բոլոր սիգերը Սևանա լճից են։ 
«Ցավոք, ձկան պահպանման վիճակը դեռ շատ չի փոփոխվել, ամենուրեք վաճառվում է սիգի մանրաձուկը, ինչն անթույլատրելի է։ Ամբողջ աշխարհում կա ընդունված օրենք՝ այն կենդանին, որը գոնե մեկ անգամ չի բազմացել, որսալ չի կարելի։ Մեզ մոտ այդպիսի բաներ տեղի են ունենում։ Մենք ուշադրությունը բևեռում ենք այն փաստի վրա, որ շատ կարևոր է պահպանել սիգը նրա վերարտադրման շրջանում։ Այսինքն՝ աշնանը։ Գարնանը, երբ ձկների կուտակումներ են լինում, ձկնորսները, բնականաբար, ավելի հեշտ են որսում: Աշնանը, երբ վերարտադրության նպատակով սիգի կուտակումներ են առաջանում՝ այդ ձուկը որսալն արգելվում է»,- ասաց Գաբրիելյանը և հավելեց, թե այս ամենը հանգեցնում է նրան, որ այսօր չկա պաշարի այն ավելացումը, որը կարելի էր ունենալ պատշաճ պահպանության դեպքում»,- նշեց Գաբրիելյանը։ 
Ամեն տարվա վերջին կենդանաբանության և հիդրոէկոլոգիայի գիտական կենտրոնը ներկայացնում է կատարված ուսումնասիրությունները, այսինքն՝ գնահատվում է, թե ինչքան ձուկ է մնացել։ 
«Մենք տվյալներ ենք հայտնում, որ, ասենք, մնացել է 450 տոննա, բայց մեզ մեղադրում են, որ փոքր թվեր ենք ասում, որ շուկաներում մոտ 1000 տոննա ձուկ է վաճառվում։ Ճիշտ է, շատ է լինում, բայց մեզ ոչ թե տարվա ընթացքում կատարված որսի քանակն է հետաքրքրում, այլ թե որքան ձուկ է մնացել։ Մենք հենց այդ արդյունքն ենք ներկայացնում»,- շեշտեց Գաբրիելյանը։ 
Անցյալ տարի արդյունաբերական չափերի ձկների պաշարը եղել է 430 տոննա, սակայն այդ պաշարները կարելի է հասցնել ընդհանուր մոտ 1800 տոննա վերջնական մնացորդի։ 
Որսագողությունը նվազագույնի հասցվելու դեպքում վերականգնելու համար երեք-չորս տարվա ընթացքում կարելի է ունենալ 2-2,5 անգամ արդյունագործական պաշարների ավելացում, քանի որ ձկան պոտենցիալը մեծանում է։  Գիտնականի պնդմամբ, պետք է արգելվի ձվադրման պատրաստ, ձկնկիթ ունեցող ձկների որսը։ 
Նա նաև հիշեցրեց, որ խեցգետնի որսը բազմացման շրջանում նույնպես արգելված է, ինչի առաջարկը եղել է «Ազգային պարկ»-ի կողմից: Այն ընդունվել է և այժմ կատարվում է։ Խեցգետինը վերջին ժամանակաշրջանում շատ է մանրացել, քանի որ որսագործիքների փոփոխություն է եղել։