Քնարիկ Զաքարյանը` «4 տարբերակի» վերադարձի մասին

ЛАЙФ 15 Июнь, 2017 17:37

«4 տարբերակ» խմբի վերադարձի մասին Life.panorama.am-ն արդեն պատմել է: Ինչպես հայտնի էր, խումբը անակնկալներ էր պատրաստում, որպեսզի միասնական կազմով կրկին ներկայանար հանդիսատեսին: Եվ ահա, երկարատեւ դադարից հետո «4 տարբերակ»-ը կրկին բեմ բարձրացավ Ձախ Հարութի երեւանյան մենահամերգին` երգելով նրա երգացանկից «Երջանիկ եմ, որ սիրում եմ քեզ» երգը:

Դադարի, առաջիկա գործունեության ու խմբի նոր` 4-րդ անդամի մասին Life.panorama.am-ին պատմել է Քնարիկ Զաքարյանը:

«Այո, արդեն մեկ տարի է, ինչ մենք կենտրոնացրինք մեր ուժերն ու քայլեր սկսեցնք ձեռնարկել, որպեսզի «4 տարբերակը» վերադառնա, սակայն, որպես այդպիսին, վերադարձ մեծ բեմ եղավ Ձախ Հարութի մենահամերգը: Նրա հայաստանյան պրոդյուսեր Խաչիկ Եղոյանը մեզ առաջարկեց երգել Հարութ Փամբուկչյանի երգացանկից մի երգ, մենք էլ սիրով համաձայնեցինք, Ձախ Հարութն էլ շատ հավանեց իր երգի մեր մեկնաբանությունը: Ես իսկապես չեմ կարող նկարագրել մեր ապրումներն ու ուրախությունը, երբ երկարատեւ դադարից հետո մենք կրկին բարձրացանք մարզահամերգային համալիրի մեծ բեմ ու մեզ մեծ ուրախությամբ ծափահարեց այդքան մարդ: Ի դեպ` այս համերգից հետո մենք բազմաթիվ կորպորատիվ երեկոներից հրավերներ ենք ստանում, որպեսզի կրկին կատարենք «Երջանիկ եմ, որ սիրում եմ քեզ» երգը»,- պատմեց Քնարիկը:

Խումբը պլանավորում է աշնանը նկարահանել սպասված երգի տեսահոլովակը.

«Արդեն մեկ տարի է, ինչ ունենք Ավետ Բարսեղյանի եւ Վահրամ Պետրոսյանի հեղինակությամբ մեր երգը, որը հասցրել է բավականին սիրվել: Վերջին շրջանում այնքան մեծ է մեր նկատմամբ հետաքրքրությունը, որ պարզապես անհրաժեշտ է մի նոր աշխատանք ներկայացնել: Սակայն մինչ այդ կլինեն ֆոտոշարքեր, երգեր, այսինքն`այսուհետ մեզ հետ կապված նորություններ հաճախ կլսեք»,- հավելեց երգչուհին:

Ինչպես շատերը կհիշեն` «4 տարբերակի»-ից ժամանակին Գոհար Հովհաննիսյանը դուրս եկավ, որպեսզի որպես ժողովրդական երգեր կատարող` շարունակի իր անհատական գործունեությունը: Խումբը երկար ժամանակ շարունակում էր պահպանել իր անունը, սակայն գործում էր երեք անդամով, սակայն երկարատեւ դադարից հետո «4 տարբերակը» ներկայանում է կրկին չորս անդամով.

«Իհարկե, մենք էլ էինք հասկանում, որ խումբը չի կարող կոչվել «4 տարբերակ», սակայն ունենա երեք անդամ: Պետք է խոստովանեմ, որ երկար ենք այս հարցի շուրջ մտածել, տարբեր մարդկանց տեսել, սակայն միեւնույն է, ում էլ փորձում էինք տեսնել մեր չորրորդ անդամի դերում, մի տեսակ օտարություն էինք զգում: Այդ զգացողությունն ունեինք, քանի որ մենք մեր անդամներով նախեւառաջ մտերիմ ընկերուհիներ ենք, մեզ համար դժվար էր պատկերացնելը, որ մեզ եւս մեկն է միանալու: Ի վերջո, խմբի նոր անդամ դարձավ կրկին մեր ընկերուհին` Լուիզա Նավասարդյանը: Արդյունքում մեզ մոտ ոչինչ չի փոխվել, մենք ընկերություն ենք անում միասին ու նաեւ գործընկերներ ենք` աշխատանքում: Այսօր արդեն հստակ կարող եմ ասել, որ հանդիսատեսը շատ ջերմ ընդունեց մեր նոր անդամին, ինչի համար շատ ուրախ ենք»,- նշեց նա:

Քնարիկ Զախարյանը վստահեցրեց` ամեն ինչ անելու են, որպեսզի պահպանեն իրենց դեմքն ու ոճը, մարդիկ, իրենց լսելով, հստակ իմանալու են, որ երգում է հենց «4 տարբերակը»:

Մեր հարցին, թե խումբը ինչո՞վ է պայամնավորում իրենց հաջողությունը, որը նրանց մոռացնել չտվեց անգամ երկար տարիների դադարի ընաթացքում, պատասխանեց.

«Գիտեք, մեր խումբը կազմավորվեց Երգի թատրոնից եւ արդեն անհատական երգչուհիներից: Բեմում մենք ընկերներով էինք, այլ ոչ թե օրինակ մի պրոդյուսերի կազմած խմբով, մենք մեզ շատ վստահ ու ապահով էինք զգում: Մեր հաջողության գրավականը հենց այդ քառապատկված վստահության մեջ է, որը գալիս է մեր ընկերությունից: Հենց այս հանգամանքն էլ բերեց նրան, որ մենք երբեք չվիճեցինք եւ չմասնատվեցինք որպես ընկերներ եւ գործընկերներ: «4 տարբերակը» մեր «երեխան» էր ու է, մենք սիրում ենք մեր աշխատանքը, խումբը եւ այն, ինչ անում ենք: Մենք ամեն ինչ արել ենք ու անում ենք մեր իսկ ուժերով, ինչը ավելի թանկ ու գնահատելի է դառնում»:

Հեղինակ` Անուշիկ Մելքոնյան