«Քաղաքական կամք է հարկավոր». Թրանսփարենսիի ներկայացուցիչը՝ Կոռուպցիայի կանխարգելման հանձնաժողովի մասին

 

 

Թրանսփարենսի Ինթերնեյշնլ Հայաստան հակակոռուպցիոն կենտրոնի ներկայացուցիչ Լիանա Ղալթաղչյանը Past.am-ի հետ զրույցում նշեց, որ Ազգային ժողովի երկրորդ ընթերցմամբ ընդունված «Կոռուպցիայի կանխարգելման հարցերով հանձնաժողովի մասին» օրինագիծը և կից օրենսդրական փաթեթն ունեն բազմաթիվ դրական կողմեր:

 

«Մենք աշխատել ենք օրենքի նախագծի մի քանի տարբերակների վրա:  Որոշ սկզբունքային կետեր փոխվեցին: Սկզբում նախատեսված էր, որ Ազգային ժողովն է ընտրելու հանձնաժողովի կազմը, սակայն չկար թեկնածուների առաջադրման կարգը, հետո դա լրացվեց: Որոշվեց, որ պետք է ստեղծվի մրցույթային խորհուրդ, որում ընդգրկված կլինեն ՄԻՊ գրասենյակի, Փաստաբանների պալատի, Բարձրագույն դատական խորհրդի, Սահմանադրական դատարանի և Հանրային խորհրդի ներկայացուցիչներ: Առաջին հայացքից՝ անկախության որոշակի տարրեր ապահովել հնարավոր է:

 

 Բացի այդ՝ նախագծի հեղինակ Արփինե Հովհաննիսյանն ասաց, որ ընդդիմության մասնակցությունը լինելու է: Գուցե դրա համար ընդդիմադիր խմբակցությունները կողմ քվեարկեցին: Այս հանձնաժողովը կառուցվածքային առումով կտարբերվի գործող Էթիկայի հանձնաժողովից, քանի որ կունենա մեծ աշխատակազմ՝ 50-60 մարդ, ինչը շատ կարևոր է: Հանձնաժողովը պետք է ունենա սեփական շենք, նյութական ռեսուրսներ և այլ պայմաններ, որպեսզի անկախ լինի»,- նշեց հակակոռուպցիոն կենտրոնի ներկայացուցիչը: Նա ընդգծեց՝ օրենքը հաջողված է, բայց քաղաքական կամք է պետք, որպեսզի այն լիարժեք կիրառվի:

 

Մեր հարցին՝ ի՞նչ բացեր կան, Լիանա Ղալթաղչյանը պատասխանեց. «Շահերի բախմանը վերաբերող բազմաթիվ առաջարկներ չներառվեցին օրինագծում, բայց Արփինե Հովհաննիսյանը խոստացել է ԱԺ աշնանային նստաշրջանի ժամանակ անդրադառնալ դրանց: Ըստ մեր առաջարկի՝ բարձրաստիճան պաշտոնյաները  և բոլոր հանրային ծառայողները շահերի բախման հայտարարություն պետք է ներկայացնեն: Սա խորը ուսումնասիրության հարց է»:

 

Կիսվել