ՀՀ իշխանությունը խիստ վախեցած է իր ռազմավարական գործընկերոջ վերաբերմունքից․ Արամ Սարգսյան

Հայաստանում Եվրամիության պատվիրակության ղեկավար,  դեսպան Պյոտր Սվիտալսկիի հայտարարություններին հայկական կողմի սուր արձագանքը պայմանավորում է Եվրամիության հետ ասոցացման համաձայնագրի ստորագրման մտավախությամբ։ Այդ մասին NEWS.am-ի հետ զրույցում ասել է «Ելք» դաշինքի պատգամավոր Արամ Սարգսյանը՝ հավելելով, որ Պյոտր Սվիտալսկին բարեկամաբար իր մտահոգություններն է հայտնել, որից պետք է հետեւություն անեն։

Նշենք, որ ԵՄ դեսպանը խոսելով ՀՀ-ում ընտրական գործընթացներից՝ առաջարկել էր Կենտրոնական ընտրական հանձնաժողովի կազմում ընդգրկել նաեւ քաղաքացիական հասարակության ներկայացուցիչներին, որպեսզի այն ավելի արժանահավատ լինի։ Նա ընդգծել էր նաեւ, որ Ընտրական օրենսգիրքը իշխող մեծամասանությունը հարմարեցրել  իր  շահերին։  Այս հայտարարություններին հաջորդեց հայկական կողմի կոշտ արձագանքը։ Արդարադատության նախարար Դավիթ Հարությունյանը հայտարարել էր, որ ԵՄ դեսպանը միջամտում է մեր  երկրի ներքին գործերին, իսկ ԱԺ փոխխոսնակ Էսուարդ Շարմազանովը հակադարձել, թե սա հարսանիք չի, որ ով վճարում է, նա էլ պիտի երաժշտությունը պատվիրի։  Այս պատասխաններից հետո Պյոտր Սվիտալսկին ասուլիս հրավիրեց եւ հայտարարեց, որ եթե Հայաստանը չցանկանա, իրենք իրենց ներկայությունը չեն պարտադրում եւ բացի այդ՝  շեշտել էր, որ Հայաստանում իրականացվող ծրագրերը 90 տոկոսով ֆինանսավորվում են Եվրամիությունից։

«Ինչ վերաբերում է հասարակական կազմակերպությունների ներկայացուցիչներին ԿԸՀ-ում ներգրավելուն, իմ ընկեր, պատգամավոր Արտակ Զեյնալյանն արդեն տասը տարուց ավել խոսում  է դրա մասին, եւ ես կարող եմ թվարկել շատերին, որոնք առաջարկել են դրա մասին։ Պարոն Սվիտալսկիի մտահոգությունն այն է, որ Հայաստանի ընտրությունները լինեն ընկալելի գոնե Հայաստանի հանրության 60-70 տոկոսի համար»։

Ինչ վերաբերում է Դավիթ Հարությունյանի եւ Շարմազանովի կոշտ արձագանքին, ասաց․ «Ես խորախես համոզված եմ, որ թե Էդուարդ Շարմազանովը, թե Դավիթ Հարությունյանը ինքնուրույն միջամտություն չէին անի, ես համոզված եմ, որ  նման հրահանգ իջել է մասնավորապես ՀՀ նախագահից, ես լուրջ մտավախություն ունեմ, որ առջեւում կա ասոցացման համաձայնագրի ստորագրության անհրաժեշտություն եւ ՀՀ իշխանությունները նախորդի պես խիստ վախեցած են իրենց ռազմավարական գործընկերոջ վերաբերմունքից։ Հավանաբար նրանց ասել են՝ դե փորձեք ստորագրել։ Իմ կարծիքով նման երեւույթ կա»,-ասաց «Հանրապետություն» կուսակցության առաջնորդը։

Արամ Սարգսյանի խոսքով՝ ֆինանսական աջակցության վերաբերյալ հարցը սրեց հայկական կողմը։

«Այն կարծիքին , ոմ որ Սվիտալսկին իր առաջին մտքերը հայտնելուց փորձում էր  դիվանագիտական սահմաններում անկեղծ լինել, տպավորություն ունեմ՝ նա սիրում է Հայաստանը , կապվել է էս երկրի հետ եւ ուզում է ավելի լավը տեսնել եւ այդ առումով ավելի շատ մտահոգություն ու խորհուրդ էր, քան դիվանագետի կոշտ վերաբերմունք։ Քանի որ փորձեց  այդ մարդուն դասեր տալ հայկական կողմը,  Սվիտալսկին էլ ուղղակի դիվանագիտական պատասխան տվեց։  Վերջիվերջո ժողովրդավարության առումով պիտի մեզ օրինակ ծառայի կամ իրավունք ունի խորհուրդներ տալ, իհարկե Եվրեպան, որը 200 տարի եւ ավելի ժողովրդավարության փորձ ունի եւ անցել է այդ ճանապարհը»։