«Լիդիան Արմենիա» և «ՄԼ Մայնինգ» ընկերությունների կողմից ներմուծվող սարքավորումները կազատվեն մաքսատուրքից

ОБЩЕСТВО 22 Июнь, 2017 13:07

Կառավարությունը որոշել է բավարարել «Լիդիան Արմենիա» և «ՄԼ Մայնինգ» ընկերությունների կողմից ներկայացված հայտը գերակա ոլորտում իրականացվող ներդրումային ծրագրի շրջանակներում ներմուծված (ներմուծվող) տեխնոլոգիական սարքավորումները, դրանց բաղկացուցիչ ու համալրող մասերը, հումքը և (կամ) նյութերը ներմուծման մաքսատուրքից ազատման արտոնությունից օգտվելու համար:

Այս մասին որոշման նախագծերը կներկայացվեն գործադիրի այսօր կայանալիք հերթական նիստի ընթացքում: Դրանք կներկայացվեն Տնտեսական զարգացման և ներդրումների նախարար Սուրեն Կարայանի կողմից:

Մասնավորապես ըստ նախագծերի՝ «Լիդիան Արմենիա» ՓԲԸ–ն պատրաստվում է ներմուծել 2 միլիարդ 489 միլիոն դրամ արժողությամբ սարքավորումներ, հիմնականում Լեհաստանից և Էստոնիայից: «Լիդիան Արմենիա»–ն պատրաստվում է ներմուծել փոխարկիչի (կոնվեյերի) ռետինե ժապավեններ և անվավոր բուլդոզեր: «ՄԼ Մայնինգ» ՍՊԸ–ն իր հերթին Բուլղարիայից կներմուծի 75 միլիոն դրամ արժողությամբ 4 հատ կոնային քարջարդիչ մեքենա:

Երկու ընկերությունների կողմից էլ ներմուծվող սարքավորումները օգտագործվելու են հանքարդյունաբերության մեջ: Նախագծերն էլ իրենց հերթին մշակվել են Տնտեսական զարգացման և ներդրումների նախարարության կողմից:

Ըստ նախագծերի՝ արտոնության առկայությունը լուրջ խթան կհանդիսանա նոր ներդրումային ծրագրերի իրականացման և որպես հետևանք նոր աշխատատեղերի ստեղծման, ներդրումների ներգրավման, տեղական արտադրության և արտահանման խթանման համար:

Որոշումների նպատակն է թույլատրել «Լիդիան Արմենիա» և «ՄԼ Մայնինգ» ընկերություններին օգտվել գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումները, դրանց բաղկացուցիչ ու համալրող մասերը, հումքը և նյութերը ներմուծման մաքսատուրքից ազատելու արտոնությունից:

Ըստ «Լիդիան Արմենիա» ընկերությանը վերաբերող նախագծի՝ արդեն իսկ իրականացվել է 43 միլիարդ 818 միլիոն 295 հազար դրամի ներդրում, իսկ ծրագրի ընթացքում կներդրվի ևս 179 միլիարդ 450 միլիոն դրամ։ Ամբողջ ծրագրի ընթացքում նախատեսվում է ստեղծել 2 հազար նոր աշխատատեղ՝ մոտ 500 հազար դրամ միջին աշխատավարձով։ 9 տարվա ընթացքում ծրագրով նախատեսված արտադրանքի ծավալները կկազմեն 1 տրիլիոն 100 միլիարդ 462 միլիոն դրամ, որն ամբողջությամբ արտահանվելու է։

«ՄԼ Մայնինգ» ընկերության որոշման նախագծում կարդում ենք, որ արդեն իսկ իրականացվել է 400 միլիոն դրամի ներդրում և նախատեսվում է իրականացնել ևս 100 միլիոն դրամի ներդրում։ Ծրագրով նախատեսվում է ստեղծել առնվազն 15–20 աշխատատեղ՝ 180 հազար դրամ միջին աշխատավարձով։ Նշված է, որ արտադրանքի ծավալները կկազմեն 240 միլիոն դրամ, որից 180 միլիոն դրամի արտադրանքը կարտահանվի ԵԱՏՄ անդամ–երկրներ, իսկ 55 միլիոնը՝ երրորդ երկրներ։

Հաշվի առնելով վերոգրյալը և ամփոփելով շահագրգիռ մարմիններից ստացված կարծիքները` Տնտեսական զարգացման և ներդրումների նախարարությունը նպատակահարմար է գտնում բավարարել «Լիդիան Արմենիա» և «ՄԼ Մայնինգ» ընկերությունների կողմից ներկայացված հայտը:

Հիշեցնենք միայն, որ «Լիդիան Արմենիա»–ն երկրաբանահետախուզական աշխատանքներ է իրականացնում Վայոց ձորի մարզում՝ Ամուլսարի տարածքում՝ 2006 թ. սկսած: Ամուլսարի հանքավայրում ընթանում են հանքի շինարարության աշխատանքներ, որոնք տևելու են մինչև 2018 թ. գարուն:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ