Վիլեն Խաչատրյան. «Կառավարության ծրագրի մի շարք կետերում ֆինանսական բաղադրիչի հետ կապված հիմնավորումները բացակայում են». «Փաստ»

«Փաստ» օրաթերթը գրում է.

Տնտեսագետ Վիլեն Խաչատրյանը խոսելով Ազգային Ժողովում Կարեն Կարապետյանի կողմից ներկայացված կառավարության ծրագրից՝ ընդգծեց, որ այն ի տարբերություն նախորդի՝ ավելի ընդգրկուն է:

Տնտեսագետը «Փաստի» այն հարցին, թե ինչ բացեր կարելի է ընդգծել այս ծրագրում, նշեց, որ ծրագրի մի շարք կետերում կապ չի ստեղծվում դրանց ֆինանսական աղբյուրների հետ:

«Եթե նախընտրական փուլում մենք նկատում էինք, որ ընդդիմադիր և իշխանական կուսակցությունները միմյանց մեղադրում էին ծրագրային դրույթների պոպուլիստական բնույթ ունենալու մեջ, ապա գրեթե այդ նույն ոգով է շարժվում նաև կառավարությունը, որովհետև նշված ծրագրային միջոցառումների ծախսային բաղադրիչը, ֆինանսական հիմնավորվածության բաղադրիչը գրեթե բացակայում են»,– նշեց նա:

Վերջինս նաև կասկածի տակ է առնում տնտեսական աճի՝ տարեկան 5%–ի վերաբերյալ հայտարարությունը, ասում, որ նախկինում էլ 7%–ի շրջանակներում էին խոստումները: Բացի այս՝ տնտեսագետը նշում է, որ 5% աճի ապահովումը տնտեսության համար լուրջ զարգացումներ չի ապահովի, որովհետև այդ 5%–ի աճը բնակչության մեծամասնությունն իր վրա չի զգալու: Եվ սա է կարևորագույն խնդիրներից մեկը:

«Ինչ վերաբերում է աղքատության մակարդակի հարցին, որ որոշել են 12%–ով կրճատել՝ այժմյան 32–33%–ից հասցնել 20%–ի մակարդակի, եթե դիտարկում ենք նախկին ցուցանիշները, մասնավորապես՝ 2008–2009 թթ. ֆինանսատնտեսական ճգնաժամից առաջ, ապա մենք գրեթե մոտեցել էինք այդ մակարդակին, սակայն հետագայում օբյեկտիվ և սուբյեկտիվ պատճառներով աղքատության մակարդակը սկսեց աճ արձանագրել: Եվ հիմա նշանակում է, որ մենք վերադառնում ենք գոնե 2008 թ. մակարդակին, ինչը մեկ հանգամանք է պարզ դարձնում. ևս 14 տարի գտնվում ենք նույն տեղում: Իսկ շատ ավելի վատ կետ է այն, որ 2008 թ. ունեցել ենք 1,5 միլիարդ դոլարի պարտք, իսկ 2022 թ. մեր պարտքը առնվազն 7 միլիարդ դոլարը կգերազանցի»,– պարզաբանեց Վիլեն Խաչատրյանը:

Նա դժվար իրագործելի չափանիշներ է տեսնում հատկապես արտահանման բլոկի հետ կապված: Տնտեսագետը որոշակի մտավախություններ ունի: Բանն այն է, որ արտահանման բլոկի մեջ սկսում են մտցնել նաև տուրիզմը, որն ինքը ճիշտ չի համարում:

«Արտահանումը հենց առևտրային հաշվեկշռով մեկ առկա ապրանքների և ծառայությունների բլոկն է, և տուրիզմը առանձին հաշվառման տակ է տարվում: Իսկ եթե դիտարկում ենք դա որպես արտահանման զարգացման մոտեցում և դրանով ենք կարողանում արտահանումը ՀՆԱ–ի մեջ դարձնել 40–45%՝ դա այդքան էլ ճիշտ չեմ համարում: Եվ այն, ինչ վերաբերում է, թե մենք կհասնենք արտահանման առումով 45%–ի՝ համարում եմ ոչ իրատեսական: Ես անգամ պետական պարտքի ավելացման, ինչպես նաև կոնկրետ յուրաքանչյուր միջոցառում իրականացնելու ֆինանսական բաղադրիչի հետ կապված մտավախություններ ունեմ, որովհետև դրանց հիմնավորումները և կապը չկա»,– ասաց մեր զրուցակիցը:

Կառավարության բացերը մատնանշելով հանդերձ՝ տնտեսագետը նաև դրական կողմերն է առանձնացնում: Ըստ նրա` կառավարության ծրագրում ՏՏ ոլորտի հետ կապված մի շարք փոփոխություններ կան, որոնք կառավարման համակարգում բարելավումներ կբերեն: Դրանք մասնավորապես էլեկտրոնային ռեգիստրի տարբեր համակարգերն են, որոնք փորձելու են իրագործել էլեկտրոնային կադաստրի և էլեկտրոնային նոտարիատի համակարգեր:

«Կառավարության ծրագրում պրոբացիոն ծառայության, դատական գործընթացների առումով կալանավայրերի հետ կապված բավական շատ ծրագրային դրույթներ կան, որոնք մնում է իրագործել և կյանքի կոչել»,– հավելեց Վիլեն Խաչատրյանը:

  Շարունակությունը` «Փաստ» օրաթերթի այսօրվա համարում: