Անդրանիկ Հարությունյան. «Կառավարության ծրագիրը իրատեսական է». «Փաստ»

«Փաստ» օրաթերթը գրում է.

«Գազպրոմ Արմենիայի» Արտաշատի մասնաճյուղի տնօրեն Անդրանիկ Հարությունյանը, ով ռեյտինգայինով պատգամավոր ընտրվեց Կոտայքի մարզում, վստահեցնում է, որ ինքը «վարչապետի պրոտեժեն» չէ:

– Պարոն Հարությունյան, Դուք Կոտայքի մարզում այդքան հայտնի չէիք, սակայն հաղթեցիք անգամ ԱԺ տնտեսական հանձնաժողովի նախագահ Վարդան Այվազյանին: Վարչապետի պրոտեժե լինե՞լը Ձեզ օգնեց:

– Վարչապետը ուղղակի թիմի ղեկավարն է, փոխնախագահն է: Մենք ուրիշ ոչ մի կապ չունենք: Պրոտեժե ասելով ի՞նչ եք հասկանում:

– Վարչապետը չի՞ Ձեզ հորդորել, որ մասնակցեք ընտրություններին:

– Ոչ, ոչ մի անգամ: Իմ որոշումն է, վարչապետն ի՞նչ կապ ունի:

– Մամուլում տեղեկություն եղավ, որ Ձեր ընտրատարածքում անգամ ՀՀԿ թեկնածուների միջև է խնդիր եղել, Վարդան Այվազյանը վեճ է ունեցել այդ առթիվ մյուսների հետ, ընտրակաշառք է բաժանվել, իրարից ձայներ խլելու խնդիր է եղել:

– Ընդհանրապես ծանոթ չեմ նման հայտարարությունների: Վարդան Այվազյանի հետ էլ ոչ մի խնդիր չկա, մեր կուսակից ընկերն է: Մենք թիմով աշխատել ենք:

– Ամեն դեպքում կբացահայտե՞ք գաղտնիքը՝ ինչպե՞ս ստացվեց, որ դուք Կոտայքում հաղթեցիք: Ամեն դեպքում Դուք Արտաշատում եք աշխատել:

– Ի՞նչ կապ ունի: Ես ծնվել, մեծացել եմ էդ մարզում, 50 տարի է իմ ընտանիքն էդ մարզում է: Ի՞նչ կապ ունի՝ որտեղ եմ աշխատել:

– Այնուամենայնիվ, խնդիր դրված չէ՞ր, որ Կարեն Կարապետյանի մարդն էդտեղ ընտրվի:

– Ո՞վ էր դրել էդ խնդիրը: Ժողովրդի կամքը խնդիր դնելով չի, ժողովրդի կամքն արտահայտելով է:

– Բայց մենք տեսանք, որ ՀՀԿ–ն հենց ընտրակաշառքով ու բռնանալով ընտրվեց:

– Կա՞ Կոտայքի մարզում մեկ օրինակ ընտրակաշառքի:

– Բազմիցս գրվել է, որ նաև այդ մարզում ընտրակաշառք են բաժանում: Դուք համոզվա՞ծ եք, որ Ձեր շտաբի կողմից չի բաժանվել ընտրակաշառք:

– Համոզված եմ: Մամուլը շատ բան է գրում:

– Ուզում եք ասել՝ Դուք Կարեն Կարապետյանի թիմի ներկայացուցիչ չե՞ք, լինելով գազի պատասխանատուներից մեկը:

– Կարեն Կարապետյանը ՀՀԿ փոխնախագահն է: Ես ներկայացնում եմ ՀՀԿ–ն: Հետևաբար էդ մեծ թիմի անդամ եմ:

– Իսկ ի՞նչ առաքելությամբ եք եկել, ի՞նչ եք անելու խորհրդարանում:

– Աշխատելու: Ինտեգրվել եմ պետաիրավական հանձնաժողովում, էդ հանձնաժողովի շրջանակներում պիտի իմ աշխատանքն անեմ:

– Պարոն Հարությունյան, կառավարության ծրագրի հետ կապված բավական խիստ քննադատություն հնչեց, որ սա ընդամենը բարի ցանկությունների ծրագիր է և իրատեսական չէ:

– Չէ, չեմ կիսում այդ կարծիքն ընդհանրապես, իրատեսական ծրագիր է: Իրատեսական եմ համարում, ժամանակն էլ դա ցույց կտա:

– Իսկ ինչ–որ բան փոխե՞լ է Կարեն Կարապետյանի կառավարությունը երկրում իր գործունեության 8 ամիսների ընթացքում, որ հանրությունը հավատա ծրագրի կատարմանը:

– Այս ծրագրի իրականացումից հետո, ինքներդ կզգաք այդ փոփոխությունը: Հիմա էլ կա փոփոխություն. բիզնեսի հետ, խոշոր բիզնեսի հետ խոսեք, կզգաք տարբերությունը, արտահանողների հետ, ներմուծողների հետ:

  Շարունակությունը` «Փաստ» օրաթերթի այսօրվա համարում: