ՍԱՊԾ–ն փորձում է կոծկե՞լ իրականությունը. «Փաստ»

«Փաստ» օրաթերթը գրում է.

Պարզվում է, ՍԱՊԾ–ն զբաղված է ոչ թե իրեն վերապահված գործառույթն անվերապահորեն իրականացնելով, այլ փաստերը կոծկելով ու սպառողներին մոլորության մեջ գցելով: Խոսքը մասնավորապես «Նուտրիցիա Նուտրիլոն Պրոնուտրա Պլյուս» (NUTRICIA Nutrilon ProNutra+) մանկական կերի մասին ՍԱՊԾ մամուլի քարտուղար Նվարդ Առաքելյանի արձագանքին է վերաբերում:

Նա իր ֆեյսբուքյան էջում տեղեկություն էր տարածել, թե՝ «NUTRICIA Nutrilon ProNutra+» մանկական սննդամթերքը լեհական արտադրության է.

«Հարգելի լրագրողներ

Արդեն տեղեկացրել ենք, որ ՀՀ ԳՆ սննդամթերքի անվտանգության պետական ծառայությունը դիտարկումներ է իրականացնում՝ պարզելու՝ արդյո՞ք NUTRICIA Nutrilon ProNutra+ մանկական սնունդն իրացվում է մակնշման պահանջների խախտումներով, թե՝ ոչ: Դիտարկման ավարտից հետո արդյունքները կներկայացվեն:

Մինչ այդ, տեղեկացնում ենք, որ «Սլավ գրուպ» ՓԲԸ–ի կողմից ներմուծված NUTRICIA Nutrilon ProNutra+ մանկական սննդամթերքն արտադրվել է լեհական «Օպոլե» գործարանում՝ Հոլանդիայի պատվերով և հոլանդական տեխնոլոգիայով. տուփի վրա կա այս մասին նշում: Սահմանային պետական վերահսկողության շրջանակներում կատարվել են անհրաժեշտ բոլոր ուսումնասիրությունները, ներմուծողը ներկայացրել է բոլոր պահանջվող փաստաթղթերը:

Ինչ վերաբերում է տուփի վրա ադրբեջաներեն նշումներին, ապա այն որևէ կերպ չի ենթադրում ադրբեջանական ծագում, նույն տուփի վրա համարժեք նշումներ են կատարված նաև մի քանի այլ լեզուներով, և այստեղ չկա որևէ խախտում: Փոքր շուկաներում իրացման դեպքում սա հաճախ կիրառվող պրակտիկա է»,– գրել էր ՍԱՊԾ մամուլի քարտուղարն իր ֆեյսբուքյան էջում:

Այս գրառումները նոր հարցադրումներ են առաջացնում, որոնց պատասխանները կամ չկան կամ պարզապես «մեր գյուղ՝ պապիս» ոճով են: Մասնավորապես «Փաստը» ՍԱՊԾ մամուլի քարտուղարից խնդրեց տեղեկացնել, թե լեհական «Օպոլե» գործարանի արտադրանքը գրանցվա՞ծ է արդյոք միասնական ռեեստրում և եթե այո, ապա ո՞րն է ռեեստրի համարը:

Ինչին ի պատասխան Ն. Առաքելյանը պատասխանեց, որ՝ «այն որպես հատուկ նշանակության սննդամթերք, Մաքսային Միության 021 տեխնիկական կանոնակարգի 24–րդ հոդվածի համաձայն, NUTRICIA–ն («Օպոլե»–ի արտադրության ) գրանցված է ԵԱՏՄ արտադրանքի միասնական ռեեստրում»: Դրանից բացի նա ուղարկել էր նաև ԵԱՏՄ միասնական ռեեստրի լինքը՝ «Օպոլե» գործարանի անվամբ կատարված որոնման արդյունքներով:

Մեր հարցադրումը, սակայն ոչ թե այն մասին էր, թե նշված գործարանի արտադրած որ ապրանքներն են ընդհանրապես գրանցված ԵԱՏՄ ռեեստրում, այլ՝ հստակ, թե արդյո՞ք լեհական «Օպոլե» գործարանում արտադրված NUTRICIA Nutrilon ProNutra+ մանկական սննդամթերքի բոլոր՝ 1–ին, 2–րդ և 3–րդ համարները, լինելով հատուկ նշանակության սննդամթերք գրանցվա՞ծ են ԵԱՏՄ միասնական ռեեստրում, թե՝ ոչ:

«Փաստը» խնդրել էր նաև տրամադրել միասնական ռեեստրի համապատասխան լինքերը, բայց մինչ այս պահը ՍԱՊԾ–ն որևէ նման տեղեկություն չի տրամադրել:

Շարունակելով նշված սննդամթերքի գրանցման մասին տվյալների փնտրտուքը, մենք ինքներս որոնողական համակարգում երկու՝ ռուսերեն և անգլերեն լեզուներով չկարողացանք որևէ գրառում գտնել նշված սննդամթերքի գրանցված լինելու մասին:

Ստացվում է, որ այնուամենայնիվ ինչ–որ բան այն չէ, հակառակ դեպքում դժվար չէր լինի պետական կառույցի համար լրատվամիջոցին երեք լինք տրամադրելը, ինչպես դա արվեց «Օպոլե» բառով որոնման արդյունքներն ուղարկելու ժամանակ: Բայց հարցերի հարցն այն է, թե լեհական այս գործարանում արտադրված մանկական կերն արդյոք գրանցվա՞ծ է միասնական ռեեստրում, թե՝ ոչ:

Ի դեպ, այս մանկական կերն առաջին անգամը չէ, որ հայտնվում է լրատվամիջոցների ուշադրության կենտրոնում, սակայն մեր ակնարկն ու դրանից հետո սկսված լրագրողական հետաքննությունը ոչ թե այն մասին է, թե այն որտեղ և ում պատվերով է արտադրվել, այլ նպատակ ուներ պարզելու, թե դեղատներում ազատ վաճառվող մանկական կերը, որն ամենաշատ սպառումն ունի Հայաստանում, ընդհանրապես գրանցվա՞ծ է որպես անվտանգ սննդամթերք, թե՝ ոչ:

Հուսանք, որ այս հարցը ոչ միայն մեզ է հետաքրքրում, այլև բոլոր սպառողներին, քանի որ սպառողն իրավունք ունի մինչև վերջ տեղեկացված լինել, թե ինչպիսի սնունդ է իր երեխան ընդունում և ովքեր են դրա անվտանգության երաշխավորները:

 

  Շարունակությունը` «Փաստ» օրաթերթի այսօրվա համարում: