«Որպեսզի Կարեն Կարապետյանը չասի «զզվեցի արդեն ձեզնից էլ, ամեն ինչից էլ», և նենգ ուժերն իրենց նպատակին չհասնեն, հարկավոր է համախմբվել նրա շուրջը». «Փաստ»

«Փաստ» օրաթերթը գրում է.

Քաղաքական գործիչ Գուրգեն Եղիազարյանը «Փաստի» հետ զրույցում անդրադառնալով մեր երկրի ներքաղաքական իրավիճակներին ու հերթական անգամ վարչապետի պաշտոնը ստանձնած անձին՝ Կարեն Կարապետյանին թիրախավորելու դրդապատճառների մասին հիշեցրեց, որ նախ պետք չէ մոռանալ, որ Հայաստանն ունի լրջագույն խնդիրների մի ամբողջ շարք և հարկավոր է նախ դրանց մասին մտածել: Բայց այս պայմաններում թե նախորդ, թե ներկա վարչապետերի ժամանակ, ականատես եղանք և լինում ենք մի գործընթացի, երբ վարչապետերը սկսում են թիրախավորվել ու սկսվում է նրանց արատավորելու տհաճ մի գործընթաց, որին կամա թե ակամա մասնակից են դառնում բոլորը:

«Պետք չէ մոռանալ, որ եթե Կարեն Կարապետյանը չլիներ, ՀՀԿ–ն չէր կարողանա այդքան ձայն հավաքել: Նրա շնորհիվ մարդիկ հավատացին վաղվա օրվան՝ ի դեմս նոր մարդու, ով փորձված է, երիտասարդ է, գործունյա է, գործի գիտակ է և ում կհաջողվի տնտեսությունը այս ծանր կացությունից փրկել ու վերականգնել: Բայց տեսեք թե ինչ են անում իշխանամետ ուժերը: Արդեն սկսել են ասել՝ արդեն մեկ տարի է աշխատում եք: Բայց հիշենք, որ մեկ տարի դեռ չկա: Ասում են ինչ–որ տրամադրություն չունեք: Այսինքն, այսօրվանից արդեն չգիտես ինչու մտահոգված են, թե 18 թվին ով է վարչապետ լինելու: Ուրիշ լուրջ բան չունեն ասելու: Նման պատվերները և նման խոսակցությունները վարչապետի հասցեին ծնվում են մեկ տեղում և դա ընդդիմադիր դաշտը չէ, այլ դրանք ծնվում են իշխանական դաշտում»,– ասաց Գ. Եղիազարյանը:

Դրա նպատակը վարչապետին ամբողջությամբ հոգնեցնելը, զզվացնելն ու թուլացնելն է, որպեսզի հասցնեն մի իրավիճակի, որ նա հիասթափվի և հեռանա, ու դաշտը թողնի Սերժ Սարգսյանին: Գ.Եղիազարյանի կարծիքով, նման պարագայում հանրապետությունում այլևս մարդ չի մնա, քանի որ ներկայում Կարեն Կարապետյանը մարդկանց վերջին հույսն է:

«Երբ մարդիկ հոգնում են երկրի նախագահից, նա անմիջապես թիրախ է գտնում, որ հարվածի ուղղությունն իրենից շեղի: Իրականում խնդիրը վարչապետների մեջ չի, բայց կարևոր է իմանալ, որ ոչ մի վարչապետ էլ ի զորու չէ այդ թիմի հետ աշխատել: Թիվ մեկ խնդիրը Սերժ Սարգսյանի մեջ է և մինչև այդ հարցը չլուծվի, հանրապետության խելքը գլուխը չի գալու»,– ասաց Գ.Եղիազարյանը:

Նրա կարծիքով սա պետք է գիտակցեն բոլոր քաղաքական ուժերը և կանգնեն վարչապետի կողքին, թեև վստահ չէ, թե նա, լինելով ՀՀԿ երկրորդ դեմքը, կկարողանա բոլորին գրկաբաց ընդունել:

«Երբ Հովիկ Աբրահամյանի պաշտոնավարման ժամանակ ասում էի, որ իշխանությունն է կազմակերպում օրինակ՝ Գառնիի էկոլոգիական դեմարշը վարչապետի դեմ, չէիք հավատում: Այդ օրերին զբոսաշրջիկների առջև Գառնիի ճանապարհը փակողները մինչ օրս աշխատում են և նրանց որևէ մեկը չի անհանգստացնում: Եվ այստեղից էլ հարց է ծագում, թե ով էր կազմակերպում նախկին վարչապետի դեմ դեմարշերը: Իսկ հիմա՞ ով է կազմակերպում Կարեն Կարապետյանի դեմ նման դեմարշերը: Նույն իշխանությունը: Իսկ նպատակը մեկն է՝ ամեն կերպ ջլատել ու թուլացնել վարչապետին, որ նա հոգնի ու ասի՝ «զզվեցի արդեն ձեզնից էլ, ամեն ինչից էլ»: Բայց որպեսզի նման բան հանկարծ չպատահի, ես ուժ ու կորով եմ մաղթում մեր վարչապետին, որպեսզի նա հանկարծ նման քայլ չանի, որպեսզի չար, մութ, նենգ ուժերն իրենց նպատակին չկարողանան հասնել»,– ասաց Գ. Եղիազարյանը:

Քաղաքական գործչի կարծիքով չի կարելի այնպիսի հիմար հարցեր տալ, ինչպիսին օրինակ՝ 2018 թվականին ով է լինելու երկրի վարչապետը, քանի որ մինչ այդ դեռ երկար ու ձիգ ամիսներ կան, հարյուրավոր չլուծված խնդիրներ կան: Բայց իրականում դրանք ազգաբնակչությանը վարչապետի դեմ լարելու խաղեր են:

«Դա մշակված ծրագիր է և այստեղ ոչ մի պատահական բան չկա: Եվ հասկանալի է, թե որ «դարբնոցում» և ինչ գիշերաժողովներում է կռվում այդ երկաթը: Եվ այս թիմը խնդիր ունի Սերժ Սարգսյանին ապագայում առաջին դեմք տեսնել, իսկ թե դրանից հետո Հայաստան կլինի, թե չի լինի, թքած ունեն այդ ամենի վրա: Այսօր մեզ ավելի քան անհրաժեշտ էր հզորագույն նախագահական իշխանություն ունենալը, ոչ թե ամորֆ ու անհասկանալի իշխանությունը, երբ միայն պատերազմի ժամանակ է պաշտպանության նախարարը ենթարկվում վարչապետին: Մենք գտնվում ենք կիսապատերազմական և ինչու չէ՝ պատերազմական իրավիճակում, իսկ Սահմանադրություն փոխելը պետք էր միայն և միայն Սերժ Սարգսյանին, որի ապացույցներն այսօր արդեն տեսանելի են: Եվ որպեսզի վաղը, մյուս օրը կարողանան այնպես անել, որ Սերժ Սարգսյանը 90%–ով ընտրվի, հիմիկվանից արդեն սկսել են թուլացնել Կարեն Կարապետյանին, որպեսզի կարողանան վաղը, մյուս օրը շարքային քաղաքացու կողմից նրա վրա «հարձակվելու» տանդեմ ստեղծել: Բայց մենք բոլորս պետք է զորավիգ լինենք ու թույլ չտանք, որ նման բան տեղի ունենա, քանի որ երկիր ենք կորցնելու, դրա համար հարկավոր է բոլորով միավորվել, մեկ բռունցք դառնալ և ամեն կերպ սատարել Կարեն Կարապետյանին»,– ասաց Գ. Եղիազարյանը:

Անդրադառնալով Շարմազանովի՝ ինչ որոշում էլ որ ընդունվի, միևնույն է՝ Սերժ Սարգսյանը շարունակելու է երկրի ղեկին մնալ, արտահայտությանը, քաղաքական գործիչը նշեց, որ դա բավականին խոսուն միտք է, որից հայ ժողովուրդը պետք է լրջագույն հետևություն անի:

Վերջում հավելենք, որ օրերս ԱԺ–ում կառավարության ծրագրի քննարկման ժամանակ Նիկոլ Փաշինյանի վարչապետին ուղղված հարցին, թե արդյոք Կարեն Կարապետյանը նույնպե՞ս Սերժ Սարգսյանին համոզողների թվում է, վարչապետը պատասխանել էր.

«Ես չգիտեմ Սերժ Սարգսյանին համոզողներ կա՞ն, որ դառնա վարչապետ: Ես համոզողների մեջ չկամ»:

Շարունակությունը` «Փաստ» օրաթերթի այսօրվա համարում