Անցյալ տարվա տնտեսական աճին նպաստել է արտահանման զգալի առաջանցիկ աճը ներմուծման նկատմամբ

Հայաստանի տնտեսության ակտիվությունը 2016 թ. դանդաղել է՝ պայմանավորված գյուղատնտեսության և շինարարության ճյուղերի իրական ծավալների նվազմամբ: Տարվա ընթացքում տնտեսական աճը կազմել է 0.2 տոկոս նախորդ տարվա 3.2 տոկոսի և տարվա համար կանխատեսված 2.2 տոկոս ցուցանիշի դիմաց: Ազգային ժողովի մշտական հանձնաժողովների համատեղ նիստում ՀՀ 2016 թ. պետական բյուջեի կատարման հաշվետվության քննարկման ժամանակ այս մասին ասաց ՀՀ կենտրոնական բանկի նախագահ ԱրթուրՋավադյանը՝ ներկայացնելով բյուջեի կատարման հաշվետվության վերաբերյալ Կենտրոնական բանկի եզրակացությունը: «Այնուհանդերձ, դրական զարգացումներ են արձանագրվել արդյունաբերության և ծառայությունների ճյուղերում, որոնց իրական աճը կազմել է համապատասխանաբար 5.1 և 4.1 տոկոս: Հայաստանի տնտեսության ակտիվության դանդաղումը հիմնականում պայմանավորված էր վերջին տարիների ընթացքում ներքին և օտարերկրյա զուտ ներդրումներ կրճատմամբ, պղնձի և հանքահումքային ապրանքների միջազգային գների նվազմամբ, ինչպես նաև ՌԴ-ից դրամական փոխանցումների նվազման հետևանքով տնային տնտեսությունների կողմից տնօրինվող եկամուտների կրճատման ազդեցությամբ»,- «Արմենպրես»-ի փոխանցմամբ՝ ընդգծեց Ջավադյանը:

2016 թ. մասնավոր ներդրումների միջավայրը շարունակել է թույլ մնալ, մինչդեռ մասնավոր սպառման մասով նկատվել են աճի վերականգման միտումներ: 2016 թ. ցածր գնաճային միտումները նպաստել է գնաճային սպասումների նվազմանը, ինչն արտացոլվել է շուկայական տոկոսադրույքների մակարդակում. նվազել են ինչպես պետական պարտատոմսերի եկամտաբերությունը, այնպես էլ վարկավորման տոկոսադրույքները:

«Հարկաբյուջետային ընդհանուր քաղաքականությունը իրականացվել է և՛ պետական սպառման, և՛ պետական կապիտալ ներդրումների աճի ուղղությամբ, որի արդյունքում 2016 թ. պետբյուջեի պակասուրդը ՀՆԱ-ում 2 տոկոսային կետով գերազանցել է տարվա համար նախանշված մակարդակը՝ կազմելով ՀՆԱ-ի 5.5 տոկոսը: 2016 թ. տնտեսական աճին շարունակել է հիմնականում նպաստել զուտ արտահանումը՝ շնորհիվ ներմուծման նկատմամբ արտահանման զգալի առաջանցիկ աճի: Արդյունքում ապահովվել է երկրի արտաքին հաշվեկշռվածությունը. ընթացիկ հաշվի պակասուրդը  պահպանվել է նախորդ տարվա նույն՝ ՀՆԱ-ում 2.7 տոկոս մակարդակում»,- մանրամասնեց Արթուր Ջավադյանը:

ՀՀ ԿԲ նախագահը հավելեց, որ 2016 թ. ընթացքում տնտեսական ակտիվության բացասական հետևանքները մեղմելուն ուղղված պետական բյուջեի ծրագրված ծախսերի համեմատաբար բարձր կատարողականի և եկամուտների ծրագրված մակարդակի ավելի ցածր կատարողականի պայմաններում պետբյուջեի պակասուրդը կազմել է 278 միլիարդ դրամ՝ նախատեսված 180 միլիարդ դրամի դիմաց: «Պետական պակասուրդի վերը նշված աճը, բնականաբար, անդրադարձել է պետական պարտքի վրա և հանգեցրել է պետական պարտք-ՀՆԱ հարաբերակցության աճի: Պետական պարտք-ՀՆԱ հարաբերակցությունը կազմել է  56.7 տոկոս: Այս պարագայում 2017 թ հարկաբյուջետային քաղաքականությունը սահմանափակված է պետական պակասուրդի հարկաբյուջետային կանոնով, որի հետևողական պահպանումը չափազանց կարևոր է պետական պարտքի կառավարելիությունը և մակրոտնտեսական կայունությունը ապահովելու տեսանկյունից»,- եզրափակեց ՀՀ ԿԲ նախագահը: