Լյուդմիլա Սարգսյանի կարծիքով՝ ՀՀԿ–ում էլ են հասկանում, որ եթե Կարեն Կարապետյանը չլիներ այդքան ձայն չէին կարողանա հավաքել. «Փաստ»

«Փաստ» օրաթերթը գրում է.

ՎՍԴՀ կուսակցության ատենապետ Լյուդմիլա Սարգսյանը, թեև ԱԺ 6–րդ գումարման պատգամավոր չի ընտրվել և հետևաբար բավականին ազատ ժամանակ ունի, սակայն ոչ թե երկրում թավշյա հեղափոխությանը նախապատրաստվելով կամ կազմակերպելով է զբաղված, այլ աշխարհի ամենահաճելի ու օգտակար գործով՝ թոռնիկին մեծացնելով:

«Չնայած թոռնիկիս պահող ունենք, բայց ես շատ ակտիվորեն ներգրավված եմ այդ գործում: Ու չնայած այս պահին դա իմ միակ զբաղմունքը չէ, սակայն զբաղմունքներիս մեջ ամենահաճելին է»,– «Փաստի» հետ զրույցում ասաց Լ. Սարգսյանը:

Դրանից բացի նա ակտիվորեն զբաղվում է քաղաքականությամբ, հետևում է ԱԺ–ի նիստերին, քննարկումներին և չի պատրաստվում քաղաքականությունից հեռանալ: Լ. Սարգսյանի կարծիքով՝ վարչապետի գնալ–մնալու մասին խոսակցությունները կշարունակվեն մինչև 18 թիվը, բայց մինչև ՀՀ նախագահի ժամկետի ավարտը այդ հարցի շուրջ որևէ հստակություն չի լինի:

«Բայց կարծում եմ, որ Կարեն Կարապետյանը կշարունակի պաշտոնավարել նաև 18 թվականից հետո, եթե, իհարկե, կարողանա մինչ այդ որոշակի տեղաշարժ գրանցել մեր տնտեսության առաջընթացի հարցում: Եթե դա չհաջողվի, կարծում եմ, որ ինքը նույնպես չի ցանկանա մնալ վարչապետի պաշտոնում, բայց ցավալի կլինի, եթե այդպես լինի»,– ասաց Լ. Սարգսյանը:

Նրա համար ամենակարևորը երկրի առաջընթաց ու ժողովրդի համար բարեկեցիկ կյանք ապահովելն է: Լ. Սարգսյանը համոզված է, որ միայն այդ դեպքում մարդիկ Հայաստանում ապագա կտեսնեն և ամենահիմնական մարտահրավերի՝ արտագաղթի տեմպերը հնարավոր կլինի որորշ չափով կանգնեցնել: Քաղաքական գործչի կարծիքով՝ երկրի խնդիրներն ախտորոշելուց բացի կարևոր է նաև բուժման ճանապարհները գտնելն ու դրանց մասին բարձրաձայնելը:

«Ինձ համար շատ ավելի կարևոր է, որ իշխանությունները հասկանան, թե ինչու է մեր տնտեսությունը հիվանդացել: Մինչև դա չհասկանան, բուժման մեթոդները գտնելը շատ դժվար կլինի: Այն ծրագիրը, որը կառավարությունը ներկայացրեց, իմ կարծիքով, դժվար թե շատ մեծ առաջընթաց ապահովի, բայց գոնե իրավիճակը կկայունացնի և մեկ–երկու տարի հետո հստակ զարգացում կապահովի, տնտեսական աճը հասցնելով մինչև 8–10%–ի »,– ասաց Լ. Սարգսյանը:

Մեկնաբանելով իշխանական դաշտում առկա պառակտումների մասին տեղեկությունները, նա նշեց, որ բոլոր ժամանակներում էլ իշխող քաղաքական կուսակցություններում մշտապես մրցակցություն և շահերի բախումներ եղել են ու կլինեն, բայց իշխանությունը պահելու ընդհանուր շահը թույլ չի տա, որ բախումները խորանան: Իսկ ներիշխանական տարաձայնությունները կհարթվեն մեկ նպատակի՝ իշխանությունը պահպանելու և դիրքերն ամրապնդելու համար:

Թե որքանով է գործող վարչապետին պաշտոնավարման ժամկետի մասին հարց ուղղելը կոռեկտ, քաղաքական գործիչը դժվարացավ պատասխանել, բայցև ընդգծեց, որ մեր երկրում այնքան արագ են իրադարձությունները զարգանում, որ նույնիսկ դժվար է իմանալ, թե մեկ ամիս հետո ում դիրքերն ինչ չափով կամրապնդվեն կամ կթուլանան:

«Եթե մեր երկրում ինչ–որ բան ընդհանրապես կարելի է նորմալ համարել, ապա ամեն ինչ նորմալ է և անկախ ամեն ինչից ունենք այն իշխանությունը, ինչ ունենք: Եվ փաստորեն ժողովուրդն իր քվեն տվեց Հանրապետական կուսակցությանը, իսկ թե ինչ ճանապարհով տվեց դա արդեն այլ խոսակցության առիթ է: Ես համակարծիք եմ այն մտքի հետ, որ եթե Կարեն Կարապետյանը չլիներ ՀՀԿ–ում, ապա այդ կուսակցությունն այդքան ձայն չէր կարողանա հավաքել: Եվ դա շատ լավ են հասկանում նաև իշխող կուսակցությունում, դրա համար էլ Կարեն Կարապետյանն էր կուսակցության հիմնական քարոզարշավը տանում: Իհարկե, այլ գործոններ էլ աշխատեցին և շատ–շատ ռեյտինգային թեկնածուներ կարողացան ընտրողների ձայները առնել: Բացի այդ, մեր ժողովուրդը կայունություն և անվտանգություն է սիրում, որը տեսնում են գործող նախագահի մեջ»,– ասաց Լ. Սարգսյանը:

Նրա կարծիքով՝ այս ամենով հանդերձ ՀՀ նախագահ Սերժ Սարգսյանը բանական մարդ է, և ինքն էլ է հասկանում, որ ՀՀԿ–ի իշխանական դիրքերը պահելու համար պետք է կարողանա գոհացնել ժողովրդին: Իսկ գոհացնելու տարբերակը մեկն է՝ բարեփոխել երկրի սոցիալ–տնտեսական իրավիճակը և ստեղծել անվտանգություն և ստեղծագործ աշխատանքի հնարավորություն:

«ՀՀԿ–ն պարզապես դատապարտված է բարեփոխումների ճանապարհով գնալ: Հարկավոր է զինվել համբերությամբ և սպասել դրան»,– ասաց Լ. Սարգսյանը:

Շարունակությունը` «Փաստ» օրաթերթի այսօրվա համարում