Արաբիայի քինդեր–սյուրպրիզը` գահերի խաղի կենտրոնում

МЕЖДУНАРОДНОЕ 29 Июнь, 2017 19:03

Սաուդյան Արաբիայի գահերի խաղում հաղթանակած արքայազն Մուհամմադ բին Սալման Ալ Սաուդը Իսրայել–ԱՄՆ առանցքի ճարտարապետության, արաբական աշխարհը դրան միացնելու, Իրանի հետ դիվանագիտական հարաբերությունները դադարեցնելու, Քաթարի ճգնաժամի, օտարերկրյա ակտիվ դիվանագիտական շփումների ու դավադրությունների հյուսման, ինչպես նաև՝ Եմենում ծավալվող աղետի հիմնական պատասխանատուներից է համարվում: Եվ իսկապես. Եմենը տնքում է խոլերայի համաճարկից, սովից ու մաքուր ջրի պակասից, բայց թագավոր հոր զարմիկի գահը սեփականած՝ Պաշտպանության երիտասարդ նախարարն այս իրավիճակում էլ չի մոռանում հուսիների դեմ իր վրեժխնդրության մասին և որոշում է ավիահարվածներ տեղալ երկրի հարավ–արևմտյան Թաըզ նահանգի Զաբաբ և Վազեիա քաղաքների վրա՝ կոտորելով առանց դրա էլ խոլերայից մեռնող խաղաղ բնակիչներին ու ավերելով հնարավոր ամեն ինչ:

Դա քիչ էր՝ ռազմաշունչ երիտասարդը որոշել է նաև անձամբ Պուտինի դեմ կռիվ տալ տարածաշրջանում՝ իր պաշտոնական դիմումում հայտարարելով, թե Մոսկվան Արաբիայի գլխավոր վտանգն է իրենից ներկայացնում: «Կարծում եմ՝ Սիրիայում շատ են ահաբեկչական խմբավորումները, որոնց պիտի ճնշել: Բայց ռուսները ոչ թե նրանց են ճնշում, այլ ահաբեկչությունը տարածում են ողջ Մերձավոր Արևելքում: Եվ դժվար չէ հասկանալ, թե որքան են ահաբեկիչները ոգևորվում, երբ տեսնում են, թե Ռուսաստանն ինչպես է օգնում իրենց՝ հարձակվելով ոչ թե իրենց, այլ Սիրիայի ազատ բանակի վրա»,– ասել է թագակիր արքայազնը նշելով, թե այդ առիթով պատրաստվում է վերջնագիր ներկայացնել ՌԴ նախագահին:

«Եթե ՌԴ–ն Սիրիայում շարունակի անկանոն ռմբակոծումները, չնայելով դժվարություններին՝ մենք քայլեր կձեռնարկենք, որպեսզի զսպենք այդ ուժին: Ռուսաստանը պիտի հիշի, որ մեր ռազմական հնարավորությունները բավարար են՝ ընդամենը երեք օրում իր ուժերը Սիրիայում ջախջախելու համար»,– ահա այսպիսի ռազմաշունչ հայտարարությամբ է հանդես եկել սելֆիասեր արքայազնը՝ չբացատրելով, թե՝ իսկ ինչո՞ւ մինչև հիմա Արաբիան այդ նույն հնարավորություններով հաջողության չի հասել նույն Սիրիայում, որի ահաբեկիչներն իրենց օգնության ու փողի պակասը երբեք չեն զգացել: Կամ՝ նույնիսկ Եմենում, որտեղ թեպետ միլիոնավոր մարդկանց է գաղթական դարձրել, ավերել երկրի ենթակառուցվածքները և մոտ 120000 մարդկանց մահվան պատճառ դարձել, միևնույն է, չի կարողացել ճնշել հուսիներին ոչ միայն սեփական, այլև արաբական ՆԱՏՕ–ի ուժերով և ԱՄՆ օժանդակությամբ: Բացի այդ, եթե սաուդիներն այդքան հզոր են, ինչո՞ւ է թագակիր արքայազնը թուլության մեջ մեղադրել Արաբիայի ԱԳնախարար Ադել–Ալ–Ջոբայրին՝ հայտարարելով, թե վերջինիս չի հաջողվել Քաթարի նկատմամբ թշնամանք սերմանել Եվրամիության երկրներում, որոնք այս պահին արդեն իսկ պիտի հայտարարած լինեին Արաբիային աջակցելու և ռազմական միջամտության մասին, եթե Քաթարը 10 օրում չկատարի իրեն ներկայացված 13 պահանջները:

Այնպես որ, երիտասարդի ակռաներն, իհարկե, դեռ դեմ կառնեն թթու ազոխին, բայց հետաքրքիր է, որ Իրանի ռադիոյի հաղորդմամբ, Արաբիայում ընդդիմադիր կոալիցիա է ձևավորվել՝ խաղաղ իշխանափոխության նպատակով: Իհարկե, չի բացառվում, որ առանց նրանց էլ հանգուցյալ Ազիզ թագավորի մնացած թոռները չհանդուրժեն նրա 7–րդ որդու՝ ներկայի Սալման թագավորի, 12–րդ զավակի պերճախոս արկածախնդրությունը, և աշխարհը հերթական թավշյա իշխանափոխությանն ականատես լինի: Բայց փաստ է, որ Ալամե իսլամական և Իսլամական ալթաջդիդ կուսակցությունները, Ահրար ջազիրա Ալ–Արաբ հավաքականությունն ու Ալ–Ֆեզուլ խումբը մարտականորեն են տրամադրված ընդհանրապես Ալ–Սաուդ ընտանիքի նկատմամբ և հայտարարել են, որ «Ալեների սաուդական ռեժիմը երկիրը ոչնչացման տանելով՝ Արաբիան վերածվել է իսլամական աշխարհի դեմ չարության աղբյուրի, իսկ հանրությանը՝ լուռ զանգվածի»: Տեսնենք՝ ինչպես կզարգանան իրադարձությունները:

Գոհար Սիմոնյան