Հայ և վրացի գործարարները քննարկում են համագործակցության հնարավորությունները

Հայկական 120, իսկ վրացական շուրջ 40 կազմակերպություններ Հայաստանում անցկացնում են լիագումար նիստեր, կլոր սեղան-քննարկումներ և B2B հանդիպումներ: «Արմենպրես»-ի հաղորդմամբ` հայ-վրացական բիզնես ֆորումին մասնակցեցին երկու երկրների նախարարները, առևտրաարդյունաբերական պալատների նախագահները, պաշտոնատար այլ այրեր, գործարարներ:

Հայաստանի առևտրաարդյունաբերականպալատի նախագահ Մարտին Սարգսյանի խոսքով` բիզնես ֆորումին գործարարները հնարավորություն են ունենալու քննարկելու համագործակցության հարցեր:

«Ներկայացնելու ենք Սյունիքի ազատ տնտեսական գոտու հնարավորությունները, որտեղ մեր վրացի գործընկերները կկարողանան ներդրումներ կատարել և մուտք գործել ԵԱՏՄ և Իրանի շուկաներ: Կարևորում ենք երկկողմ զբոսաշրջային հնարավորությունները: Այսինքն` եթե զբոսաշրջիկներն այցելում են Վրաստան, ապա այնպիսի ծրագրեր մշակենք, որ այցելեն նաև Հայաստան, և հակառակը: Գործարար համաժողովի ավարտին պետք է ձևավորվեն ցանկություններ, մտքեր համատեղ ձեռնարկությունների ստեղծման համար»,- ասաց Սարգսյանը` հավելելով, որ երկու երկրները կարող են տարբեր շուկաներում միասնական հանդես գալ սննդի արդյունաբերության ոլորտում: Նրա խոսքով` բարձր տեխնոլոգիաների ոլորտում Հայաստանը մի փոքր առաջ է Վրաստանից` հատկապես ծրագրավորման գործընթացներում, և այդ ոլորտում մենք կարող ենք օգնել վրացիներին՝ զարգացնելու ոլորտը:

ՀՀ տնտեսական զարգացման և ներդրումների նախարար Սուրեն Կարայանը, ողջունելով հայ-վրացական գործարար համաժողովի բոլոր մասնակիցներին, նշեց, որ շատ ուրախ է Երևանում հյուրընկալել Վրաստանի իրենց գործընկերներին: Նա կարևորեց գործարար համաժողովն ինչպես երկու երկրների բարեկամական հարաբերությունների և տնտեսական համագործակցության հետագա ընդլայնման, այնպես էլ մեր գործարարների համար նոր հնարավորություններ բացահայտելու տեսանկյունից:

«Հայ և վրացի ժողովուրդները բարեկամական հարաբերություներ ունեն անհիշելի ժամանակներից, և մենք միասին փոխհարաբերվելու, տնտեսական կապեր ձևավորելու և ամենատարբեր համագործակցելու փորձ ունենք: Տարիներ շարունակ աշխատելով համատեղ թե երկկողմ, թե բազմակողմ հարթակներում աշխարհին ներկայանալով, որպես մեկ տարածաշրջան, մենք անցել ենք իրադարձություններով լի ուղի, բազմապատկել և սերտացրել ենք այն կապերը, որոնք ժառանգել ենք պատմությունից»,- ասաց նախարարը:

Վրաստանի էկոնոմիկայի և կայուն զարգացման նախարար Գիորգի Գախարիան հույս հայտնեց, որ նման հանդիպումներն առավել հաճախակի կայանան և լինեն արդյունավետ: «Այսօր շատ քննարկումներ ունեցանք, և համոզվեցինք, որ երկու երկրների միջև չկա ոչ մի քաղաքական խնդիր: Մենք գործընկերներ ենք, հարևաններ ենք և բարեկամներ: Այժմ մենք պետք է մեր ամբողջ ուժը ներդնենք տնտեական հարաբերությունների էլ ավելի սերտացման գործում»,- ասաց նախարարը: