Նոր սկանդալ Վատիկանում, որը բոլորովին էլ նոր չէ

МЕЖДУНАРОДНОЕ 30 Июнь, 2017 20:08

Որքան էլ Հռոմի Ֆրանցիսկ Պապը մաքրի եկեղեցին, այսպես կոչված, մաֆիոզ ծառայողներից ու մանկապիղծներից, միևնույն է, դժվար է միանգամից կռիվ տալ գոնե 8000 կամ Վատիկանի շուրջ 2%–ը կազմող մանկապիղծների դեմ, որոնցից շատերը ամենաբարձր դիրքեր են գրավում եկեղեցում: Պապը մի անգամ չի այս երևույթը եկեղեցու մարմինը ճարակած ախտ որակել, իսկ վերջին անգամ անցած ամիս էր, երբ հայտարարեց, թե նույնիսկ կոնկրետ անունների համար աղոթք է դնում իր սենյակում դրված Սրբ. Հովսեփի արձանիկի կողքին՝ բարեխոսություն խնդրելով սնամեջ հոգիների համար:

Ավելին՝ կարդինալական վերջին ժողովի ընթացքում Պապը նկատել էր, թե իր համար ցավալի մի փաստ է պարզել, ըստ որի՝ համարյա բոլոր դահիճները երբևէ իրենք են զոհի դերում հայտնվել և արդեն հասուն տարիքում, ասես, փորձել են վրեժ լուծել իրենց հետ պատահածի համար: Պապը նաև հայտարարել էր, թե այնտեղ, որտեղ բռնություն է գործվում՝ անտեսանելիորեն սատանան է ներկա, և, որ հոգևորականները պիտի ուշադիր լինեն, որպեսզի աղոթքով բուժեն իրենց վերքերը, օգնեն խեղելի դիրքում հայտնվածներին, ոչ թե նոր զոհեր, հետևաբար նաև՝ նոր դահիճներ շարեն շուրջբոլորը:

Ի դեպ, Պապն այս թեմային նորից ու նոր անդրադառնալու երկու տխուր առիթ ուներ այս շաբաթ: Նախ՝ մանկապղծության մեղադրանքով Իտալիայում 5 տարվա ազատազրկման ենթարկվեց կարդինալ Մաուրո Ինցոլին, որ հանրության մեջ իր վարքուբարքի արդյունքում Դոն Մերսեդես անունն էր ստացել, ինչից հետո Իտալիայի հյուսիսում մենության մեջ աղոթքի ուղարկված Ինցոլիին Պապը ստիպված զրկեց բոլոր օծումներից: Դրանից հետո պարզ դարձավ, որ Ավստրալիայում ավարտվում է դեռ տարիներ առաջ Սիդնեյի արքայական հատուկ կոմիետի սկսած հետաքննությունը, որով փորձ էր արվում պարզել 1950–2010 թթ. բռնության ենթարկված շուրջ 4440 երեխաների ողբերգության հեղինակներին ու միջադեպերի հանգամանքները:

Ցավալի էր լսել, որ մեղադրյալներից մեկն էլ Վատիկանի խիստ բարձրաստիճան ներկայացուցիչներից մեկն էր՝ Սրբ Աթոռի գանձապահ, ավստրալիական կարդինալ Ջորջ Պելը (ի դեպ, կարդինալի մասին լուրերը դեռ 2012–ից էին պտտվում, բայց ոչ ոք հրապարակավ դրանք չէր հաստատում, և միայն այս փետրվարին Սիդնեյը հայտարարեց բռնություններին՝ նրա անմիջական մասնակցության վերաբերյալ): Վիկտորիա նահանգի ոստիկանությունը հայտարարեց, թե կարդինալի հետ կապված բազում միջադեպեր կան, որոնք դատական կարգով քննության կարիք ունեն և կարդինալին, որն այժմ Վատիկանում է բնակվում, հուլիսի 18–ին հրավիրեց Մելբուրն՝ դատարանի առջև բացատրություններ տալու:

Սիդնեյի արքեպիսկոպոսի գրասենյակը հայտարարություն է տարածել միջադեպի առնչությամբ՝ նշելով, թե հոգևորականը կտրականապես է հերքում իրեն ուղղված մեղադրանքները, իսկ Պապը, ինչպես արդեն ասացինք, ընդհանրական գնահատականներ է տվել երևույթին: Մինչդեռ, ինչպես ասում են, անկրակ ծուխ չի լինում. նույն հատուկ կոմիտեի առջև ժամանակին նաև Պելի հետ նույն տանը բնակված կաթոլիկ հոգևորական Ջերալդ Ռիսդեյլն էր մինչ այդ հերքել 1960–2013 թթ. առնվազն 130 փոքրիկ տղաների պղծելու մեղադրանքները: Բայց վերջը ընդունեց դրանք, և այժմ Պելը նաև նրա գործով պիտի ցուցմունք տա՝ պարզելու, թե ինչ է իրեն հայտնի նաև ծառայակից եղբոր կատարած հանցագործությունների վերաբերյալ:

Ի միջի այլոց, այս տարվա սկզբին Ավստրալիայի կաթոլիկ եկեղեցին ստիպված էր խոստովանել, որ առնվազն 213 մլն դոլարի փոխհատուցում է վճարել իր զոհերին: Բայց, անշուշտ, որևէ գումարով չես փոխհատուցի և՛ այն տառապանքը, որին ենթարկվել են փոքրիկ երեխաները, և՛ եկեղեցու հեղինակությունը: Ի վերջո, եթե Աստծո սպասավորների շրջանում է այսպիսի խայտառակություն տիրում, ի՞նչ ասել, այսպես կոչված, աշխարհիկ այլանդակների մասին: Չխոսենք այլևս այն մասին, որ իր ողջ արատներով հանդերձ՝ Վատիկանն, այնուամենայնիվ, սկսել է բացահայտ խոսել իր ախտերի ու աղտերի մասին այն դեպքում, երբ մնացածը բերանները ջուր են առել այնպես, ասես՝ իրենց ներսում միայն ոտքերն ամպոտ հրեշտակներ են ծառայում…