Ժիրայր Սեֆիլյանի եւ մյուսների գործով նիստով դատարան են եկել Արա Զոհրաբյանն ու Կարեն Փոլադյանը

Ժիրայր Սեֆիլյանի եւ մյուսների գործով դատական նիստին այսօր՝ հունիսի 30-ին, դատարան էր եկել Փաստաբանների պալատի նախագահ Արա Զոհրաբյանը եւ Դատական դեպարտամենտի ղեկավար Կարեն Փոլադյանը:

NEWS.am-ի թղթակիցը Երեւանի Շենգավիթ վարչական շրջանի ընդհանուր իրավասության դատարանից հաղորդում է, որ լրագրողների հետ զրույցում Արա Զոհրաբյանը նշեց, որ եկել է փաստաբաններին խուզարկելու հետ կապված ահազանգի հետքերով՝ համոզվելու համար, թե իսկապես խտրական վերաբերմունք կա փաստաբանների նկատմամբ:

Կարեն Փոլադյանը, սակայն, վստահեցրեց, որ փաստաբանները զննության են ենթարկվում օրենքով նախատեսված կարգով, նրանց իրավունքները չեն խախտվում: Տիգրան Հայրապետյանին դատարանի շենք մտնելիս ցանկանում էին զննության ենթարկել, որը դժգոհություն առաջացրեց փաստաբանի մոտ: Տիգրան Հայրապետյանի եւ կարգադրիչների լեզվակռվին լուռ հետեւում էին Կարեն Փալադյանն ու Արա Զոհրաբյանը: Կարեն Փոլադյանը Տիգրան Հայրապետյանին ասաց, որ օրենքով սահմանված զննության պետք է ենթարկվի դատական նիստերի դահլիճ մտնելուց առաջ: Հայրապետյանը հակադարձեց՝ փաստաբանին զննության ենթարկելու փաստը նվաստացուցիչ է եւ իրավունքների խախտում, Կարեն Փոլադյանը, սակայն, վստահեցրեց, որ նիստերի դահլիճ մտնելիս զննության է ենթարկվել նաեւ ինքն ու դատախազները: Արա Զոհրաբյանը միջամտեց Տիգրան Հայրապետյանի եւ Արա Զոհրաբյանի լեզվակռվին` առաջարկելով ոսկե միջինը գտնել, որ փաստաբանը ներս մտնի եւ այլեւս նման խնդիրներ չառաջանան: Ի վերջո, Կարեն Փոլադյանը հայտնեց, որ Տիգրան Հայրապետյանը կարող է մտնել ներս, սակայն, կարգադրիչներին հանձնարարեց ուժեղացված հսկողություն սահմանել փաստաբանի շուրջը` նիստերի դահլիճում:

Արա Զոհրաբյանը նշեց, որ անհրաժեշտ է Դատական դեպարտամենտի սարքավորումների հագեցվածության հարցը լուծել, որ փաստաբանները նման խնդրի առաջ չկանգնեն:

Նշենք, որ այս գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն արվում են արտագնա` Շենգավիթ վարչական շրջանի ընդհանուր իրավասության դատարանում:

Ժիրայր Սեֆիլյանին մեղադրանք է առաջադրվել մի խումբ անձանց հետ նախնական համաձայնությամբ, 24.04.2015 թվականին Երեւան քաղաքում բռնություն գործադրելով, գույք ոչնչացնելով եւ վնասելով, ինչպես նաեւ իշխանության ներկայացուցչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, 2014 թվականի մայիսից դրա կազմակերպմանն ուղղված նախապատրաստական գործողություններ կատարելու համար:

Բացի այդ, ըստ մեղադրանքի, 2015 թվականի նոյեմբերից մինչեւ 2016 թվականի մայիսի 18-ն ընկած ժամանակահատվածում, կազմակերպված խմբի կազմում ապօրինի կերպով ձեռք է բերել, պահել եւ փոխադրել հրազեն եւ ռազմամթերք, նպատակ ունենալով զենքի գործադրմամբ, կյանքի համար վտանգավոր բռնություն գործադրելով զավթել եւ պահել ռազմավարական նշանակության շենքեր, շինություններ, սակայն իր կամքից անկախ հանգամանքներով ավարտին չի հասցվել:  Սեֆիլյանին մեղադրանք է առաջադրվել Քրեական օրենսգրքի 35-225-րդ հոդվածի 1-ին մասով, 35-219-րդ հոդվածի 3-րդ մասի 1-ին կետով: