Հուլիսի 19-29-ը Արցախում սպասվում են նախագահական ընտրություններ, «Ազատ հայրենիք»-ից Արայիկ Հարությունյանը չի առաջադրվելու

МЕЖДУНАРОДНОЕ 1 Июль, 2017 0:30

Հուլիսի 19-29-ը Արցախում սպասվում են նախագահական ընտրություններ, նախագահին ընտրելու է Ազգային ժողովը․ այս մասին Tert.am-ին հայտնեց Արցախի Հանրապետության նախագահի մամուլի խոսնակ Դավիթ Բաբայանը:

«Չնայած որ նոր սահմանադրությամբ նախագահին պետք է ընտրի ժողովուրդը, մինչև 2020 թվական՝ անցումային շրջանի համար նախագահին կընտրի Ազգային ժողովը: Սա բացառիկ է, կարծեմ երկրորդ անգամն է, որ Ազգային ժողովն է ընտրում Հանրապետության նախագահին, առաջին անգամ եղել է 1995 թվականին, երբ նորից անցումային շրջան էր»,- ասաց նա:

Նրա խոսքով՝ մինչ 2020 թվականը Արցախը կղեկավարի Ազգային ժողովի կողմից ընտրված նախագահը, որի հետո արդեն կլինեն համաժողովրդական ընտրություններ, ինչպես որ կարգն է:

«Ըստ նոր սահմանադրության՝2020-ին լինելու են նոր համաժողովրդական ընտրություններ, Ազգային ժողովը և նախագահն ընտրվելու են մեկ օրվա ընթացքում․մարդիկ քվեարկելու են և՛ նախագահի, և Ազգային ժողովի համար»,- ասաց նա:

Ըստ Դավիթ Բաբայանի՝ Ազգային ժողովի կողմից նախագահ ընտրելուց հետո՝ սեպտեմբերին, նոր կառավարությունն է ձևավորվելու․ վարչապետ չի լինելու, լինելու են պետական նախարարը և նախարարները, կառավարության ղեկավարն է լինելու նախագահը:

Արցախի խորհրդարանի «Հայրենիք» խմբակցության ղեկավար, «Ազատ հայրենիք» կուսակցության փոխնախագահ Արթուր Թովմասյանը Tert.am-ի հետ զրույցում նշեց, որ իրենց խմբակցությունը, որպես խորհրդարանում մեծամասնություն կազմող ուժ, քննարկումներ է իրականացրել Արցախի ժողովրդավարական և Հայ հեղափոխական դաշնակցություն կուսակցությունների հետ:

««Հայրենիք» խմբակցությունն ամենամեծն է խորհրդարանում իր թվաքանակով: Հետևաբար, ապագա նախագահի հարցը, առանց «Հայրենիք» խմբակցության, հնարավոր չէ նախագահ ընտրել: Չկան խորհրդարանում ուժեր, որ հաշվի չառնեն «Ազատ հայրենիք» կուսակցությանը, մասնավորապես «Հայրենիք» խմբակցությանը: Դա բոլորն էլ գիտակցում են, որ մենակ մի կուսակցությամբ չենք կարող նախագահ ընտրել, անհրաժեշտ պատգամավորների թիվը միայն մենք ունենք խորհրդարանում»,- ասաց նա՝ նշելով, որ իրենք, վերոնշյալ կուսակցությունների հետ համագործակցելով,արդեն ունեն անհրաժեշտ ձայները նախագահ ընտրելու համար:

Արթուր Թովմասյանի խոսքով ՝ հուլիսի սկզբին տեղի է ունենալու «Ազատ հայրենիք» խմբակցության համագումարը, որտեղ կուսակցության ղեկավար մարմին ընտրելուց բացի, համագումարի պատվիրակները պետք է լիազորեն խորհրդարանի պատգամավորներին, թե ում սատարեն նախագահի պաշտոնում: Նա չցանկացավ նշել, թե ում են պատրաստվում նրանք սատարել:

«Համագումարին մենք նաև ընտրելու ենք մեր կուսակցության նախագահին, և արդեն որոշել ենք ՝Արայիկ Հարությունյանն է լինելու, սակայն նա չի առաջադրվելու ընտրություններին: Արայիկ Հարությունյանն ունի նախընտրելի թեկնածու, ով ընդունելի է նաև կուսակցության պատգամավորների համար»,- ասաց նա:

Արթուր Թովմասյանը նշեց, որ ինքը տեղյակ չէ, թե բացի իրենց նախընտրելի թեկնածուից, այլ թեկնածուներ կան, թե՝ ոչ: Միայն նշեց, որ եթե այլ թեկնածուներ էլ լինեն, հավանական չէ, որ կընտրվեն, քանի որ խորհրդարանի մեծամասնությունը իրենք են, ընդդիմությունը չի կարողանա ապահովել նախագահ ընտրելու համար անհրաժեշտ ձայները: