Հավանականություն կա, որ Պոլսո պատրիարքի ընտրություններին Գարեգին Բեքչյանի հետ համագործակցենք․ Սահակ Մաշալյան

Պոլսո պատրիարքարանի Կրոնական ժողովի ատենապետ, Պոլսո պատրիարքի բնական թեկնածու Սահակ Մաշալյանը Tert.am-ին հայտնեց, որ պատրաստվում է  մասնակցել է Պոլսո պատրիարքի ընտրություններին:

«Երբ ընտրությունները սկսվեն, բնական թեկնածուները գրավոր կերպով հայտարարելու են, որ իրենք ցանկանում են մասնակցել ընտրություններին: Ընտրությունների անցկացման համար ստեղծված նախաձեռնակ մարմինների հետ աշխատելով՝ նրանք պետք է ներկայացնեն իրենց պատգամավորներին: Իրենք նաև ներկայացնելու են, թե ինչպես են պատրաստվում մասնակցել ընտրություններին»,- ասաց նա:

Սահակ Մաշալյանը նշեց, որ ինքը դեռ չի որոշել ինչպես է մասնակցելու ընտրություններին, սակայն չբացառեց, որ կհամագործակցի Գերմանիայի թեմի առաջնորդ, Պոլսո պատրիարքի տեղապահ ընտրված պատրիարքի բնական թեկնածու Գարեգին Բեքչյանի հետ:

«Մեծ հավանականություն կա, որ Գարեգին սրբազանի հետ համագործակցենք, բայց թե ինչպիսին կլինի այդ համագործակցությունը դեռ հստակ չէ»,- ասաց նա:

Հիշեցնենք, որ  Պոլսո պատրիարքարանում պատրիարքի ընտրությունների շուրջ զարգացումները սկսվել են նախորդ տարվա հոկտեմբերի 26-ից, երբ Պոլսո Հայոց պատրիարքարանը հայտարարել էր պատրիարք Մեսրոպ Մութաֆյանին անգործունյա ճանաչելու որոշման մասին, ինչը ենթադրում էր նոր պատրիարքի ընտրության մեկնարկ, որի համար անհրաժեշտ էր նախ ընտրել Պոլսո պատրիարքի նոր տեղապահ, որը կղեկավարեր ընտրական գործընթացը:

2017թ.-ի փետրվարին Էջմիածնում կայացված որոշման համաձայն՝ մարտի 15-ին Ստամբուլում տեղի ունեցավ Պոլսո Հայոց պատրիարքի նոր տեղապահի ընտրություն: Ընտրությունից հետո, որում համոզիչ հաղթանակ էր տարել Արամ Աթեշյանի հակառակորդ Գարեգին արքեպիսկոպոս Բեքչյանը, Ստամբուլի նահանգապետարանն անակնկալ կերպով միջամտել էր ընտրություններին: Ստամբուլի նահանգապետի տեղակալը նախքան պատրիարքարանում ընտրությունների սկսվելը գրություն էր ուղարկել, որն իրավաբանորեն անհնար էր համարվել պատրիարքական ընտրությունների գործընթացի մեկնարկը: Այս գրությունը Պոլսո Հայոց պատրիարքի տեղապահի ընտրություններից անմիջապես հետո պատրիարքարանի հոգևորականներին էր ներկայացրել տեղապահի ընտրություններում պարտված փոխանորդ Արամ արքեպիսկոպոս Աթեշյանը և հայտարարել, որ չի հեռանա փոխանորդի պաշտոնից:

Դրանից հետո Ստամբուլի հայ համայնքը ամենատարբեր միջոցներով բոյկոտել է Աթեշյանի մատուցած պատարագներն ու ելույթները, կազմակերպել ստորագրահավաքներ՝ պահանջելով Աթեշյանի հրաժարականը: Քանի որ Արամ Աթեշյանը պաշտոնապես հրաժարականով հանդես չեկավ, Պոլսո պատրիարքարանի կրոնական ժողովը՝ Գարեգին Բեքչյանի գլխավորությամբ նրան պաշտոնանկ արեց: Այդ մասին Պոլսո պատրիարքարանը տեղեկացրել է Ստամբուլի նահանգապետարանին: