Ճամբարակի ոսկու խանութի գողության գործով քննիչը հեռախոսն է իրենով արել, իրեղեն ապացույցներից 149 կտոր ոսկին էլ չկա՝ փոխել են. մանրամասներ

Գեղարքունիքի մարզի ընդհանուր իրավասության առաջին ատյանի դատարանում շարունակվում է Ճամբարակի ոսկու խանութից գողության գործով դատավարությունը: Դատական նիստերից մեկի ժամանակ պարզվել է, որ իրեղեն ապացույց ճանաչված 193 կտոր ոսկուց միայն 44 է պատկանում խանութի սեփականատիրոջը, իսկ մնացածը փոխել են և դրա փոխարեն ներկայացրել սովորական մետաղներ:

Այս մասին Tert.am-ի հետ զրույցում ասաց գործով փաստաբան Ինեսսա Պետրոսյանը:

«Իրեղեն ապացույցները, երբ բերեցին դատարան և զննվեցին, տուժողը հայտարարություն կատարեց, որ շուրջ 198 կտոր ոսկուց  ընդամենը 40-ն է, որ իրեն է պատկանում, մնացածը փոխված էին և ոսկի չէին: Ընդամենը 40 կտորը ճանաչեց տուժողը, մնացածն այլ ապրանք էր»,-ասաց Պետրոսյանը:

Պետրոսյանը հայտնեց, որ այդ փաստով  դատավոր Պետրոսյանն այդ օրը դիմել  է Հատուկ քննչական ծառայություն.«40 կտորը, որը տուժողը ճանաչել էր, այլևս չվերադարձվեց, որովհետև նոր քրեական գործ հարուցելու խնդիր ծագեց»:

 Tert.am-ի հարցմանն ի պատասխան,թե արդյոք գործով քննիչներին մեղադրանք առաջադրվե՞լ է իրեղեն ապացույց ոսկիները այլ մետաղներով փոխարինելու փաստի առթիվ, Հատուկ քննչական ծառայությունից հայտնեցին, որ քրեական գործ է հարուցվել պետական հատուկ ծառայություն իրականացնող անձի /անձանց/ կողմից առանձնապես խոշոր չափերով` քրեական գործով իրեղեն ապացույց ճանաչված ոսկյա զարդերի հափշտակության դեպքի առթիվ: 

«Գեղարքունիքի մարզի ընդհանուր իրավասության առաջին ատյանի դատարանի քննվում է նույն մարզի բնակիչ Հ. Հ.-ի վաճառասրահից ավազակային հարձակմամբ ոսկյա զարդերի հափշտակության վերաբերյալ  քրեական գործը: Դատաքննության ժամանակ` 11.05.2017թ.-ին, պարզվել է, որ հիշյալ քրեական  գործով տուժող Հ. Հ.-ին պատկանող և նախաքննության  ընթացքում իրեղեն ապացույց ճանաչված 203 ոսկյա զարդերից դատարան  ներկայացված և հետազոտման համար բացված փաթեթներում փաստացի առկա  են եղել միայն 193-ը: Ընդ որում, տուժողը, նախազգուշացված լինելով սուտ մատնության համար նախատեսված քրեական պատասխանատվության մասին, դատական նիստի ընթացքում հայտարարել է, որ հիշյալ 193 զարդերից միայն 44-ն են ոսկյա, իսկ մնացած զարդերն արծաթից են կամ բիժուտերիա է: 

Այսպիսով, պետական հատուկ ծառայություն իրականացնող անձի /անձանց/ կողմից առանձնապես խոշոր չափերով իրեղեն ապացույցների հափշտակություն կատարելու դեպքի  առթիվ ՀՀ հատուկ քննչական ծառայությունում հարուցվել է քրեական գործ` ՀՀ քրեական օրենսգրքի 177-րդ հոդվածի 3-րդ մասի 1-ին կետի հատկանիշներով»,-հայտնեցին ՀՔԾ-ի մամուլի ծառայությունից, հավելելով, որ կատարվում է նախաքննություն:

Պարզվեց, նույն գործով,բացի այն, որ ոսկիները չկան, գործով քննիչներից  Դավիթ Շահբազյանի դեմ ևս մեղադրանք է առաջադրվել  և արդեն դատավճիռ կա: Քննիչն ամբաստանյալի հեռախոսը չի կցել գործին։


Գործով մեղադրյալ Անդրանիկ Աբրահամյանի պաշտպան Ժորա Պետրոսյանը Tert.am-ի հետ զրույցում ասաց, որ իր պաշտպանյալի հեռախոսը քննիչը չի արձանագրել, ինչի առթիվ էլ հարուցվել է քրեական գործ և Դավիթ Շահբազյանը մեղավոր է ճանաչել ՀՀ քրեական օրենսգրքի  308-րդ հոդվածի 1-ին մասով և դատապարտվել տուգանքի՝ 200.000 ՀՀ դրամի չափով.«Քննիչը վերցրել է 55.000 ՀՀ դրամ արժողությամբ հեռախոսը, հենց այդ պահին փոխել է հեռախոսահամարը և բջջային հեռախոսը շահագործել իր հայեցողությամբ: Դավիթ Շահբազյանն իր պաշտոնեական դիրքն օգտագործել է ծառայության շահերին հակառակ՝ ուրիշի գույքն օգտագործելու անձնական այլ շահագրգռվածությունից ելնելով՝ այն սահմանված կարգով չի արձանագրել, չի առգրավել ու չի կցել քրեական գործի նյութերին»:

Նշենք, որ Դատական տեղեկատվական համակարգի փոխանցմամբ՝  Արտյոմ Աբրահամյանին  և Անդրանիկ Աբրահամյանին մեղադրանք է առաջադրվել այն բանի համար, որ նրանք հանցավոր համաձայնության գալով ավազակային  հարձակմամբ ոսկյա իրեր հափշտակելու նպատակով Երևան քաղաքից գնացել են Ճամբարակ քաղաք և ապօրինի մուտք են գործել Ճամբարակ քաղաքի Տիգրան Մեծ  փողոցի 9 շենք 48 հասցեում գտնվող թանկարժեք մետաղներից պատրաստված իրերի մեծածախ  առևտրի գործունեություն իրականացնող Համբարձում Հարությունյան ԱՁ-ի սրահ ,ավազակային հարձակում են գործել վաճառողուհի  Շուշիկ Պետրոսյանի նկատմամբ՝ հափշտակելով առանձնապես խոշոր չափերի հասնող 9.005.000 ՀՀ դրամ արժողության ոսկյա զարդերը, և միասին դիմել են փախուստի:

Անդրանիկ Աբրահամյանին մեղադրանք է առաջադրվել  ՀՀ ՔՕ-ի 175-րդ հոդվածի 3-րդ մասի 1-ին կետի հատկանիշներով և 325-րդ հոդվածի 2-րդ մասով:

Արտյոմ Աբրահամյանին մեղադրանք է առաջադրվել ՀՀ ՔՕ-ի 175-րդ հոդվածի 3-րդ մասի 1-ին կետի , 325-րդ հոդվածի 2-րդ մասի և 235-րդ հոդվածի 4-րդ մասի հատկանիշներով:

Նշենք, որ բացի քննիչների գործունեության հետևանքով  առաջացած քրեական գործերից, կալանավորված է նաև այն դատավորը, ում վարույթում քրեական գործը քննվում էր: Գեղարքունիքի մարզի դատավոր Աղվան Պետրոսյանը կալանավորված է , նա մեղադրվում  է առանձնապես խոշոր չափերի կաշառք վերցնելու մեջ: Նրա լիազորությունները  կասեցվել են:

Գործն այժմ մակագրվել է դատավոր Վահագն Մելիքյանին։