Քննարկման փուլում է Երևանում մեկ տոմսի գնով երկու տրանսպորտից օգտվելու հարցը. Դավիթ Խաժակյան

Երևանի հասարակական տրանսպորտի համակարգի բարեփոխումների մասնագիտական աշխատանքային խմբի երկրորդ նիստի ընթացքում տրանսպորտի նոր սակագնի հարցը դեռ չի քննարկվել, որովհետև նախ անհրաժեշտ է միասնական տրանսպորտային ցանց ձևավորել:  

Այս մասին Tert.am-ի հետ զրույցում ասաց մասնագիտական աշխատանքային հանձնաժողովի անդամ, «Ելք» դաշինքից Երևանի ավագանու ղեկավար Դավիթ Խաժակյանը: 

«Պետք է հաշվարկվի, թե այդ ցանցը թվով քանի ավտոբուս պետք է ապահովի և ինչ տեսակի պետք է լինեն ավտոբուսները: Միայն այս նախագիծը ստանալուց հետո պարզ կլինի, թե ինչ կարժենա այն ամբողջությամբ: Կարծում եմ, որ այս դեպքում թե՛ համայնքի, թե՛ կառավարության կողմից պետք է իրականացվի որոշակի սուբսիդավորում, որպեսզի սակագինը գոնե միջին ամսական կտրվածքով պահպանվի նույնը, բայց համակարգը էականորեն բարելավվի»,- նշեց Խաժակյանը:  

Նրա խոսքով՝ բրիտանական խորհրդատվական կազմակերպությունը նիստի ընթացքում ներկայացրել է իր պատկերացումները, թե ինչպիսին պետք է լինի Երևանի տրանսպորտային համակարգը, բայց այն դեռ ամբողջությամբ նախագծված չէ:

«Մենք չենք ցանկանում, որ գործող գծատերերը շարունակեն շահագործել իրենց շարժասարքերը, որովհետև մենք կողմնակից ենք մեկ միանական օպերատորի, որի դեպքում կառավարումը կլինի շատ ավելի արդյունավետ»,- ասաց Դավիթ Խաժակյանը:

Հիշեցնենք, որ 2017 թ. հունվարին Երևանի քաղաքապետարանի և «Դաբլյու Վայ Ջի Ինթերնեյշնլ լիմիթիդ» խորհրդատվական ընկերության միջև պայմանագիր է կնքվել, ըստ որի՝ ընկերությունը մշակելու է երթուղային նոր ցանց, ինչպես նաև ինտեգրված սակագին և տոմսային համակարգ: Երևանի քաղաքապետարանում օրերս տեղի է ունեցել Երևան քաղաքի հասարակական տրանսպորտի համակարգի բարեփոխումների մասնագիտական աշխատանքային խմբի երկրորդ նիստը։ Հանդիպման շրջանակում քննարկվել են խորհրդատու կազմակերպության նախորդ հաշվետվության մասին մասնագիտական խմբի դիտարկումները, ինչպես նաև ներկայացվել են ավտոբուսային նոր երթուղային ցանցի, ինտեգրված սակագնի և տոմսային համակարգի մասին գնումների ընթացակարգերի վերաբերյալ առաջարկներ։

Խաժակյանի խոսքով՝ նախատեսվում երթուղային գծերը մոտ երեք անգամ կրճատել: Դրանք լինելու են միասնական օպերատորի ենթակայության տակ, իսկ գծերի կրճատումից հետո հնարավոր է դառնալու փոխատեղումների միջոցով կազմակերպել ուղևորափոխադրումները:

«Մեկ վարչական շրջանից քաղաքի մյուս ծայրում գտնվող այլ վարչական շրջան տեղափոխվելիս հնարավոր է փոխատեղում արվի՝ մեկ երթուղայինով հասնես հիմնական գիծ, և իրականացվի հիմնական տեղափոխությունը: Միասնական տոմսային համակարգը հենց այստեղ է առաջ գալու այն առումով, որ չի թույլ տալու մարդու կողմից երկու անգամ վճարում նախկին մեկի փոխարեն»,- նշեց նա:

Հարցին՝ ինչպե՞ս է կարգավորվելու այն հարցը, որ քաղաքացին երկու տրանսպորտ է փոխելու, բայց մեկ տոմսի գին է վճարելու, Խաժակյանը պատասխանեց. «Այս պահին հենց այդ հարցն է քննարկման փուլում գտնվում: Նախատեսվում է էլեկտրոնային տոմսի միջոցով այդ գործընթացն իրականացնել: Խոսքը չիպերով քարտերի մասին է»:

Քննարկման փուլում է նաև ըստ կիլոմետրի, ըստ ժամի վճարումների հարցը: «Ելքի» ավագանու անդամի կարծիքով՝ նոր շարժակազմ ձեռք բերելը, նոր համակարգեր գնելը պետք է ներդրողի կողմից արվեն, որից հետո շարունակությունը պետք է ապահովվի գործող սակագների շրջանակներում:

«Չեմ բացառում, որ նոր համակարգը իր ծավալներով ավելի բարձր սակագին կարող է ենթադրել, բայց այդ բեռը չպետք է լինի քաղաքացիների վրա: Եվ մյուս կողմից էլ, եթե այս նոր համակարգը լինի ավելի օպտիմալ, քան գործող ցանցը, այդ պարագայում վերջինիս արժեքը չի կարող գերազանցել նախկինին»,- նշեց նա: