«Ինձնից հրաժարական կարող է պահանջել միայն իմ ժողովուրդը». «Փաստ»

«Փաստ» օրաթերթը գրում է.

Մամուլում երեկ գրվել է, որ օրերս Սյունիքի մարզպետ Վահե Հակոբյանը իր մոտ է կանչել Գորիսի քաղաքապետ Վաչագան Ադունցին և պահանջել, որպեսզի նա հրաժարական տա՝ հիմնավորելով, թե ցանկանում է ազատվել նախկին մարզպետ Սուրիկ Խաչատրյանի կադրերից: Ըստ մամուլի՝ Վահե Հակոբյանը Գորիսի քաղաքապետի պաշտոնում ուզում է տեսնել խորհրդարանի ընտրություններում ռեյտինգային թեկնածու Առուշ Առուշանյանին:

Հիշեցնենք, որ խորհրդարանի ընտրություններից հետո ՀՀԿ–ից ինքնաբացարկ հայտնածների թվում էր Սյունիքից ՀՀԿ ռեյտինգային թեկնածու, «Առանցք» ընկերության հիմնադիր Գագիկ Առուշանյանի տղան՝ Առուշ Առուշանյանը, ով ստացել էր 6879 ձայն և սպասելի էր, որ Սյունիքի մարզպետ Վահե Հակոբյանի ինքնաբացարկից հետո հենց նա է գնալու խորհրդարան «Ջերմուկ գրուպի» սեփականատեր Աշոտ Արսենյանի հետ: Սակայն ապրիլի 7–ի ուշ երեկոյան երիտասարդ Առուշ Առուշանյանը որոշել էր տոնել սեփական հաղթանակը, ինչն ավարտվել էր Գորիսի բնակիչ Շահում Դավթյանի տանը տեղի ունեցած վեճով, ու ՀՀԿ թեկնածուն հայտնվել էր ոստիկանությունում: Ու թերևս հենց ՀՀԿ ղեկավարության որոշմամբ Առուշանյանը ինքնաբացարկ հայտնեց:

Ներկայացնում ենք «Փաստի» հարցազրույցը Գորիսի քաղաքապետ Վաչագան Ադունցի հետ, ով վերընտրվել է 2016–ին ու քաղաքապետի միակ թեկնածուն էր:

– Պարոն Ադունց, ճի՞շտ է, որ Սյունիքի մարզպետն ուզում է, որ Դուք հրաժարական տաք: Նման պահանջ, ակնարկ եղե՞լ է:

– Ոչ, չի եղել և չի կարող լինել: Ես ընտրվել եմ իմ ժողովրդի կողմից, 87% ձայնով, և ինձնից հրաժարական կարող է պահանջել միայն իմ ժողովուրդը: Նման խնդիր չկա: Ես մինչև 2021 թվականը պարտավորություն ունեմ իմ ժողովրդի հանդեպ: Իսկ հիմա մարզպետի հետ աշխատանքային հարաբերություններում ոչ ակտիվ հարաբերություն է, եթե ուզում եք իմանաք:

– Իսկ ինչո՞վ է մարզպետի հետ աշխատանքային ոչ ակտիվ հարաբերությունը պայմանավորված:

– Չեմ կարող ասել: Ենթադրություններ չունենք: Դուք կարող եք մարզպետից իմանալ՝ ինչու Գորիսի հետ ակտիվ շփումներ չունի:

– Մամուլում գրվել է, որ նոր մարզպետը Ձեզ համարում է Սուրիկ Խաչատրյանի մարդը և ուզում է Ձեզնից ազատվել:

– Իրեն հարցրեք:

– Իսկ Դուք առնչություն ունե՞ք նախին մարզպետի հետ, իր «մա՞րդն» եք, թե՞ դա պատրվակ է խորհրդարանից դուրս մնացած Առուշ Առուշանյանին տեղավորելու համար:

– Ես իմ մարդն եմ ու իմ ժողովրդի մարդն եմ: Բոլորի հետ էլ առնչություն ունեմ: Նախկին մարզպետը գորիսեցի է, մեր լավ ընկերն է, մենք միասին աշխատել ենք: Բնականաբար առնչություն չունենալ չեմ կարող:

– Ասացիք՝ պասիվ են մարզպետի հետ հարաբերությունները, Դուք կկարողանա՞ք լիարժեք աշխատել մարզպետարանի հետ պասիվ հարաբերությունների պարագայում:

– Իհարկե, իհարկե: Ես աշխատում եմ օրենքով, աշխատում եմ օրենքի դաշտում, հարաբերությունները ինքս պահպանում եմ ինչպես կարգն է, և օրենքն ինձ լիարժեք հնարավորություն տալիս է, որ ես կարողանամ իմ համայնքի, իմ բնակչության հոգսը հոգամ ու քաղաքապետի գործառույթները տեղը տեղին իրականացնեմ:

– Իսկ մարզպետի հրահանգով Գորիսում ստուգումներ եղե՞լ են վերջին շրջանում:

– Այո, եղել են մարզպետի նախաձեռնությամբ, եղել է անկախ աուդիտորական կազմակերպության կողմից ստուգում մարզպետի նախաձեռնությամբ, նաև մարզպետարանի վարչական հսկողության ուսումնասիրություն: Մեզ մոտ ուսումնասիրություն է իրականացրել նաև նախագահի վերահսկողական ծառայությունը, պլանային ստուգում է իրականացրել նաև ֆիննախի վերահսկիչ ծառայությունը:

– Ի՞նչ են արձանագրել, խախտումներ եղե՞լ են:

– Իհարկե՝ ոչ: Փետրվարից մինչ այժմ մենք 4 նմանատիպ ստուգումներ ենք անցել: Եվ բոլորի պարագայում էլ լավագույն արդյունք է եղել:

– Ասել է թե՝ համոզված եք, որ մարզպետը չի՞ կարող Ձեզ ստիպել հրաժարական տալ:

– Համայնքի ղեկավարի հրաժարականի պահանջը օրենքով սահմանված է, այսինքն՝ ամեն ինչի համար օրենք կա նախատեսված:

Հ.Գ. «Փաստը» պարզաբանման համար երեկ դիմեց Սյունիքի մարզպետի մամուլի խոսնակ Վազգեն Սաղաթելյանին, սակայն վերջինս ասաց, թե չի կարող այդ առթիվ որևէ պարզաբանում տալ, քանի որ մարզպետը Հայաստանում չէ:

 

Շարունակությունը` «Փաստ» օրաթերթի այսօրվա համարում: