Աշոտ Բարսեղյան. Խաղալու ենք հաջորդ փուլ անցնելու համար

Եվրոպա լիգայի որակավորման 1-ին փուլի պատասխան խաղում «Գանձասար-Կապանը» հյուրընկալելու Մոնտենեգրոյի «Մլադոստին». խաղի նախօրեին Հայաստանի փոխչեմպիոնի գլխավոր մարզիչ Աշոտ Բարսեղյանը ներկայացել է մամուլի ասուլիսին:

 

Բարսեղյանը նախ խոսել է պատասխան հանդիպման մասին՝ նաև պատասխանելով հարցերին.

 

«Մենք այս թիմի մասին կարծիք չունեինք, դիտել էինք տեսագրությունները: Գիտակցում էինք, որ մեր տեսածից այլ ֆուտբոլ կարող է ստացվել: Իրենք 7-8 նոր ֆուտբոլիստներ ունեին: 

 

Մեզ համար որոշակի պարզ էր, որ ֆիզիկականի վրա են ուշադրություն դարձնելու, ստանդարտներից են շատ խաղալու: Մենք առաջին կեսում առավելություն ունեինք, լավ անցկացրինք այն: 2-րդ խաղակեսում կասկածելի 11 մետրանոց նշանակվեց: Ես շատ եմ զրուցել, շատերն անգամ անհեթեթ են համարում: 11 մետրանոց, ներողություն, անցանք: Դրվագ եղավ, որ մրցավարը կարող էր 11 մետրանոց նշանակել իրենց դարպասին: 3-4 պահերին վտանգավոր իրավիճակ էր մեր դարպասի մոտ, կենտրոնացվածության վերաբերյալ խնդիրներ ունեցանք: Միանշանակ լավ ենք խաղացել, հաշիվը չի համապատասխանում, սակայն արդար լինենք, մրցակիցը լավ պահեր ուներ»:

 

 - Նորեկների մասին ի՞նչ կարծիք ունեք:

 

 - Երբ լեգիոներները գալիս են, տեսնում ենք, որ ֆիզիկական վիճակը լավը չէ: Մեր նոր տղաները լավ որակներ ունեն, բայց որոշակի ժամանակ է հարկավոր ֆունկցիոնալ վիճակը բարելավելու համար:

 

 - Որքա՞ն են հաջորրդ փուլ անցնելու շանսերը:

 

 - Շատ մեծ են: Մենք խաղալու ենք հաջորդ փուլ անցնելու համար: Եթե դրսում գոլ խփեինք, շանսերը շատ ավելի մեծ կլինեին: Այստեղ պետք է մտածենք գոլ չընդունելու համար: Այսօր վերլուծություններ ենք անելու, մեզ պետք չէ ավելորդ շտապողականություն: Մրցակիցը մի քիչ էլ «կեղտոտ» ֆուտբոլ խաղաց, ամեն կերպ Մուսոնդային ցանկանում էին շարքից հանել. Մուսոն իրեն «տղայի նման» պահեց: Մեզ պետք է գոլ խփել՝ ուշադիր լինելով պաշտպանությունում: 1:0-ն լուրջ հաշիվ է, բայց դեռ ոչինչ կորած չէ: 

 

 - Ինչո՞վ էր պայմանավորված, որ Գեղամ Հարությունյանը չխաղաց առաջին հանդիպմանը:

 

 - 1 շաբաթ առաջ վնասվածք է ստացել: Փառք Աստծո, ոտքի կոտրվածք չկար, բայց ոտնաթաթի խնդիր ունի: Նա կամային որակներ ունի, անգամ կաղալով կարող էր օգնել: Հույս ունեմ, որ նույնիսկ ցավելով վաղը նա կօգնի: Այն տղան է, որ կհաղթահարի ամեն ինչ:

 

 - Մտավախություն կա՞, որ 11 մետրանոցի գործոնը կարող է կրկնվել:

 

 - Տղաները մինչև վերջին սուլիչը պայքարելու են. ֆիզիկապես և հոգեբանորեն պատրաստ են: 

 

 - Ասացիք «ներողություն» բառը. մրցավա՞րն է ներողություն խնդրել:

 

 - Չեմ ասում բառացի ներողություն է խնդրել, բայց ես, երբ նյարդայնացած էի, նա ձեռքով արեց, հասկացա վերաբերմունքը: Ախր շատ միանգամից նշանակեց 11 մետրանոցը, առանց խորհրդակցելու:

 

 - Հայկական թիմերից ԵԼ-ում ամենամեծը «Գանձասար-Կապանի» շանսերն են...

 

 - Շատ ենք ցանկանում ուրախացնել ժողովրդին, ձեզ: Մեր ղեկավարությունը մեր կողքին է, շատ է աջակցում մեզ: Ասացին, որ մենք ենք խաղացել, իրենք՝ հաղթել: Ես շատ եմ ուզում հաջողության հասնել՝ ուրախացնելով բոլորին:

 

 - Վաղվա խաղում ճիշտ կլինի արագ գոլ խփե՞լ, թե՞ հակագրոհների վրա կենտրոնանալ:

 

 - Մեզ համբերություն է պետք. կարող ենք 80-րդ րոպեին գոլ խփել, ապա հաղթել: Մրցակիցը արագ է անցնում պաշտպանությունից հարձակում: Սկզբում պետք չէ հնարավորություններ տալ մրցակցին: Լինելու են պահեր: Ավելորդ շտապողականությունը սխալների է հանգեցնելու:

 

 - Իսկ ֆուտբոլիստների նյարդայնությունը չի՞ ավելանա:

 

 - Մինչև 70-րդ րոպեն կարող ենք 7 լավ պահ ունենալ...: Համբերություն: Իհարկե, կգա մի պահ, երբ կորցնելու բան չունենանք, բայց Աստված տա, դրան չհասնի:

 

 - Ֆունկցիոնալ վիճակը բավարար կլինի՞ պրեսինգի համար:

 

 - Պետք է կարողանանք կարճ և միջին փոխանցումներով «ներքևից» գործել: Երկրորդ հարկում առավելությունն իրենցն է:

 

 - Նախապատրաստվե՞լ եք 11 մետրանոց հարվածաշարի:

 

 - Երեկ ֆուտբոլիստները 11 մետրանոցներ են իրացրել: Վաղը կարճ մարզում ենք անցկացնելու, էլի 11 մետրանոցներ կխփենք: 

 

 - Կապանից երկրպագուներ կլինե՞ն:

 

 - Իհարկե, ղեկավարությունը լավ  աշխատում, ավտոբուսներ են տրամադրվել, որպեսզի գան այստեղ: