Սեյրան Օհանյանը չի ասում՝ պետք է իշխանափոխություն. իրենց կողմից կոնկրետ առաջարկ չկա. Արամ Սարգսյան

«Ժառանգություն» կուսակցության առաջնորդ Րաֆֆի Հովհաննիսյանը իշխանափոխության չգնաց՝ հայտարարելով, որ  չէր ցանկանում արյունահեղություն, սակայն թավշա հեղափոխությունը նույնպես ենթադրում է արյունահեղության ռիսկեր։ Այս մասին NEWS.am–ի հետ զրույցում ասաց «Ելք» դաշինքի պատգամավոր Արամ Սարգսյանն՝ անդրադառնալով «Ժառանգություն» կուսակցության առաջնորդի թավշյա հեղափոխություն անելու կոչերին:

Արամ Սարգսյանի գնահատմամբ՝ թե Րաֆֆի Հովհաննիսյանը, թե «Օհանյան-Րաֆֆի-Օսկանյան» դաշինքում իր գործընկերները իշխանափոխության կոնկրետ բանալի չեն առաջարկում. «Րաֆֆի Հովհաննիսյանը ասում է՝ ես չգնացի հեղափոխության, որ արյունահեղություն չլինի, բայց թավշա հեղափոխոթյունը պարունակում է արյունահեղության ռիսկեր, հետեւաբար հարց է ծագում՝ Րաֆֆի Հովհաննիսյանը համապատասխան իրավիճակում առ Աստված դիմելո՞ւ է, թե՞ շարունակելու է՝ ասել, որ չի գնալու արյունահեղության։ Այդ թիմը միասնական չէ, այդ թիմը նախ պիտի լուծի իր միասնականութան խնդիրը, որից հետո իրենք փորձեն գտնել քաղաքական դաշտին առաջարկելու բանալին»։

Ինչ վերաբերվում է հանուն իշխանափոխության միավորվելու կոչերին, պատգամավորը պատասխանեց. «Միավորվել հանուն միավորման, իմ համար չի, ես էդպիսի միավորումների  երեք անգամ մասնակցել եմ, անօգուտ է։ Պիտի լուծում առաջարկես, որը տարբերվում է նախորդներից, նման առաջարկ չկա։ Հիմա դա քննարկելը անիմաստ եմ համարում։ Ինչ վերաբերում է Սեյրան Օհանյանի դիրքորոշմանը, ես շատ ուշադիր հետեւել եմ իր ելույթին, որտեղ ինքը իրավիճակի գնահատական է տալիս, էս իրավիճակից դուրս գալու, երկիրը վերականգնելու հայրենասիրական գնահատականներ է առաջարկում, բայց քաղաքական  իրավիճակից դուրս գալու լուծում չի առաջարկում։ Չի ասում՝ պետք է իշխանափոխություն։ Ես քննարկում եմ կոնկրետ առաջարկներ, իրենց կողմից կոնկրետացված առաջարկություն չկա»։

Արամ Սարգսյանն ընդգծեց, որ այդ ստեղծվելիք ճակատի քաղաքական գործիչների՝ Սեյրան Օհանյանի եւ Րաֆֆի Հովհաննիսյանի դիրքորոշումների միջեւ անգամ հակասություն կա, իսկ Վարդան Օսկանյանն ընդհանրապես դիրքորոշում չի հայտնել։

Դիտարկմանը՝  միգուցե Սեյրան Օհանյանը կաշկանդված է իր զբաղեցրած նախկին  պաշտոնով եւ այդ պատճառով խուսափում է ռադիկալ քայլերից, Արամ Սարգսյանն արձագանքեց. «Ես Սեյրան Օհանյանին գիտեմ չկաշկանդվող, խիզախ մարդ, եւ վստահ եմ, որ եթե Սեյրան Օհանյանը մարտի 1–ին մեր թիմից լիներ, տանը չէր մնա, մինչեւ վերջ կմնար մեր հետ, նույնը չեմ կարող ասել մնացածի մասին»։

Հիշեցնենք, որ Րաֆֆի Հովհաննիսյանը կուսակցության համագումարում հայտարարել էր, որ եթե 2018 թվականից հետո Սերժ Սարգսյանը շարունակի ղեկավարել երկիրը, թավշյա հեղափոխություն է իրականացնելու։  Նա խոսել էր նաեւ քաղաքական ուժերին համախմբելու եւ միասնական ճակատով իշխանության դեմ պայքարելու մասին։ Ենթադրվում է, որ այդ ճակատում լինելու են «Համախմբում»  կուսակցության առաջնորդ Վարդան Օսկանյանը եւ պաշտպանության նախկին նախարար Սեյրան Օհանյանը: