ԼՂ հակամարտությունը գերտերությունների համար լոկալ խնդիր է․ փորձագետը հավանական չի համարում, որ G20-ին խոսվի Հարավային Կովկասի մասին

МЕЖДУНАРОДНОЕ 7 Июль, 2017 22:35

Միջազգային եւ անվտանգության հարցերի հայկական ինստիտուտի ասոցացված փորձագետ Գևորգ Մելիքյանի խոսքով՝ Համբուրգում հուլիսի 7-8-ը տեղի ունեցող G20-ի գագաթաժողովը կարևոր է նրանով, քանի որ աշխարհաքաղաքական և նաև երկրների ներսում կատարվող գլոբալ փոփոխությունների համատեքստում է անցկացվում: Նա Tert.am-ի հետ զրույցում նկատեց, որ G20-ին մասնակից երկրների համար առաջին հերթին շատ կարևոր է դարձել Եվրամիության և ԱՄՆ-ի, ինչպես նաև՝ ԱՄՆ-ի և ՆԱՏՕ-ի միջև հարաբերությունների ճշգրտումը:

«Երեկ Թրամփը դեռևս Վարշավայում շատ հստակ ընդգծեց, թե որոնք են Միացյալ նահանգների առաջնահերթությունները ՆԱՏՕ-ի հետ կապված, և կարծում եմ՝ շատերի համար պարզ դարձավ, որ Միացյալ Նահանգները առավել քան հակված է ՆԱՏՕ-ի հզորությունը պահպանելուն և մի կողմից էլ ավելացնելուն, որովհետև շատերը համարում էին, որ Միացյալ Նահանգները հետ է կանգնում և չի ցանկանում իր պարտավորվածությունները շարունակել ՆԱՏՕ-ի մասով»,- ասաց նա:

Գևորգ Մելիքյանի խոսքով՝ G20-ի երկրներին մտահոգում է նաև Կորեայի, Իրանի հետ կապված զարգացումները, Եվրամիության ներսում Brexit-ը, փախստականների հարցը և նաև՝ Արևմուտքի հետ Ռուսաստանի հարաբերությունները, որոնք ևս պետք է հանդիպումների ընթացքում ճշգրտվեն:

Փորձագետի խոսքով՝ առավել նշանակալի է Ռուսաստանի նախագահ Վլադիմիր Պուտինի և Միացյալ Նահանգների նախագահ Դոնալդ Թրամփի առաջին հանդիպումը, դրան են, ըստ նրա, սպասում բոլորը, քանի որ այդ հանդիպման ընթացքում են հստակեցվելու Ռուսաստանի և Արևմուտքի հարաբերությունները:

«Եվրոպայի համար կարևոր է տեսնել Ռուսաստանին որպես չափավոր և զուսպ: Միացյալ Նահանգները հեռու է Ռուսաստանից, Եվրոպայի սահմաններին է այն մոտ, և Ռուսաստանից եկող ցանկացած սպառնալիքի առաջին թիրախները դառնում են Եվրամիության՝ Մերձբալթյան երկրները: Սա նշանակում է, որ Ռուսաստանն ու Եվրամիությունը իրար հետ քննարկելու շատ բան ունեն, և Թրամփի ներկայությունն ու ակտիվությունը այս մայրցամաքում, շատ կարևոր է եվրոպացիների համար: Եվրոպացիները պետք է հասկանան, թե Թրամփը որքանով է հետաքրքրված այդ հարաբերությունների բարելավմամբ: Եվ դրա հետ կապված և՛ դրական, և՛ բացասական հետևանքները կրելու է Եվրամիությունը»,- ասաց նա՝ հավելելով, որ G20-ը, իսկապես շատ աշխարհաքաղաքական զարգացումների վերաբերյալ ճշգրտումներ անելու է:

Գևորգ Մելիքյանը ափսոսանքով նշեց, որ քիչ հավանական է, որ գերտերությունների ղեկավարներին մի վայրում հավաքող գագաթաժողովին Հարավային Կովկասի, մասնավորապես ԼՂ հիմնախնդրի մասին քննարկումներ լինեն՝ չնայած որ այս օրերին ղարաբաղաադրբեջանական սահմանում իրավիճակը լարված է: «Չեմ կարծում, որ Լեռնային Ղարաբաղի հակամարտությունը շատ կարևոր է Եվրամիության կամ Միացյալ Նահանգների համար: ԵԱՀԿ Մինսկի խմբի ձևաչափը դրա համար է, որ միայն ինքը զբաղվի հիմնախնդրով, և այն դուրս չգա այդ ձևաչափից»,- ասաց նա:

Նրա խոսքով՝ Ղարաբաղյան հիմնախնդիրը գերտերությունների համար լոկալ խնդիր է, և հիմնական սպառողներն ու թիրախները հայկական և ադրբեջանական կողմերն են, մնացած կողմերն իրենց շահերով են առաջնորդվում և ըստ դրան գործողությունների գնում:

«Մենք մտահոգվելու շատ բան ունենք: Հարավային Կովկասն այդպես էլ չդարձավ գերտերությունների համար հետաքրքիր տարածաշրջան: Եվ՛ ռեսուրսների սակավության, և նաև հակամարտությունների առկայության պատճառով, և՛ ժողովրդավարական գործընթացների ձախողման պատճառով, այն հետաքրքիր չդարձավ գերտերությունների համար: Եթե ժամանակին այս տարածաշրջանը հետաքրքիր էր աշխարհին, որովհետև հետխորհրդային փուլ էր, զարգացումները բոլորին էին հետաքրքրում, ինչպես են երկրները, առանց Մոսկվայի կենտրոնական ազդեցության զարգանում, հիմա արդեն դրանք պատմության գրկում են, և բոլորը այդ պետություններն ընկալում են, որպես անկախ, բայց դեռևս չկայացած երկրներ: Գերտերություններն ունեն գլոբալ խնդիրներ, իսկ Լեռնային Ղարաբաղի հիմնախնդիրը առաջնահերթությունների մեջ չի մտնում»,- ասաց նա: