Վճռաբեկ դատարանը մերժել է Սուրիկ Խաչատրյանի ազգականների բողոքը

ՀՀ վճռաբեկ դատարանը մերժել է Սյունիքի նախկին մարզպետ Սուրիկ Խաչատրյանի ազգականների բողոքը: 

ՀՀ վճռաբեկ դատարանի քրեական պալատը  նախագահությամբ Ս. Ավետիսյանի, մասնակցությամբ Ե. Դանիելյանի, Ա. Պողոսյանի, Ս. Օհանյանի քննարկել և վարույթ  չի ընդունել ՀՀ վերաքննիչ քրեական դատարանի` 2017 թվականի մարտի 6-ի որոշման դեմ ամբաստանյալներ Դերենիկ  Հակոբյանի, Էյներ Խաչատրյանի ու Մայիս  Խաչատրյանի պաշտպան Արմեն Խաչատրյանի և ամբաստանյալ Յուրի Մանուչարյանի պաշտպան Մարտին Զիլֆուղարյանի վճռաբեկ բողոքները:

Խաչատրյանները, Հակոբյանի, Մանաչուրյանը պահանջում էին բեկանել Վերաքննիչ քրեական դատարանի կայացրած որոշումը, համաձայն որի՝ ՀՀ վերաքննիչ քրեական դատարանը վերաքննիչ բողոքները մասնակիորեն բավարարել է և Սյունիքի մարզի ընդհանուր իրավասության առաջին ատյանի դատարանի` 2016 թվականի սեպտեմբերի 19-ի դատավճիռը` ամբաստանյալներ Շ. Դավթյանի և Ս. Խաչատրյանի նկատմամբ նշանակված պատժի մասով փոփոխել։

Սյունիքի մարզի ընդհանուր իրավասության առաջին ատյանի դատարանի` 2016 թվականի սեպտեմբերի 19-ի դատավճիռը` ամբաստանյալներ Դ. Հակոբյանի, Է. Խաչատրյանի, Մ. Խաչատրյանի և Յու. Մանուչարյանի մասով թողնվել է անփոփոխ։

Նշենք, որ Սյունիքի մարզի ընդհանուր իրավասության առաջին ատյանի դատարանի  դատավճռով  Յուրի Մանուչարյանի նկատմամբ   պատիժ է նշանակվել ազատազրկում` 4  տարի ամիս ժամկետով։

Դերենիկ Հակոբյանի նկատմամբ պատիժ է նշանակվել ազատազրկում` 1   տարի ժամկետով ազատազրկում։  

Էյներ Խաչատրյանի նկատմամբ պատիժ է նշանակվել 1 տարի ազատազրկումը։

Մայիս Խաչատրյանի նկատմամբ՝  2 տարի 6 ամիս։ 

Նույն դատական ակտով դատապարտվել են նաև Շահում Բենիկի Դավթյանը և Սեյրան Սերգեյի Խաչատրյանը։

Այս գործով կալանավորված էր նաև Սուրիկ Խաչատրյանի որդին, որը սակայն 2015թ. հոկտեմբերի 1-ին ազատ է արձակվել, իսկ նրա նկատմամբ քրեական հետապնդումը դադարեցվել է:

Վերոհիշյալ որոշման դեմ վճռաբեկ բողոք է ներկայացրել պաշտպան Արմեն Խաչատրյանը՝ խնդրելով բեկանել Սյունիքի մարզի ընդհանուր իրավասության առաջին ատյանի դատարանի` 2016 թվականի սեպտեմբերի 19-ի դատավճիռը և ՀՀ վերաքննիչ քրեական դատարանի` 2017 թվականի մարտի 6-ի որոշումը, ամբաստանյալներ Դ. Հակոբյանին, Է. Խաչատրյանին ու Մ. Խաչատրյանին ճանաչել անմեղ և հռչակել հանցանքի կատարման մեջ նրանց անմեղությունը այն մեղադրանքով, որով ներգրավվել են որպես մեղադրյալ, ինչպես նաև վերջիններիս մեղսագրվող արարքը որակել ՀՀ քրեական օրենսգրքի 118-րդ հոդվածով և նրանց մասով քրեական գործի վարույթը կարճել՝ ամբաստանյալների հետ տուժող Մուշեղ Զաքարյանի հաշտվելու պատճառաբանությամբ, կամ ամբաստանյալների  նկատմամբ նշանակել ազատազրկման ձևով նվազագույն չափի պատիժ և նշանակված պատիժները պայմանականորեն չկիրառել՝ սահմանելով փորձաշրջան:

Պաշտպան Մարտին Զիլֆուղարյանը կրկին ներկայացրել է վճռաբեկ բողոք` խնդրելով Յուրի Մանուչարյանի մասով ամբողջությամբ բեկանել և փոփոխել ստորադաս դատարանների դատական ակտերը, նրան առաջադրված մեղադրանքը   վերաորակել կամ նրա նկատմամբ կիրառել ՀՀ քրեական օրենսգրքի 70-րդ հոդվածի պահանջները՝ պատիժը պայմանականորեն չկիրառելը:

Սակայն, Վճռաբեկ դատարանը որոշել է ՀՀ վերաքննիչ քրեական դատարանի` 2017 թվականի մարտի 6-ի որոշման դեմ պաշտպանների  վճռաբեկ բողոքները վարույթ ընդունելը մերժել։ 

Tert.am-ի հետ զրույցում պաշտպան Արմեն Խաչատրյանն ասաց, որ Վճռաբեկ դատարանի որոշումը դեռ չի ստացել; Հարցին, թե ներպետական ատյանները սպառելուց հետ ինչ են պատրաստվում անել, Խաչատրյանն ասաց.« Երբ ստանամ Վճռաբեկ դատարանի որոշումը, պաշտպանյալներիս հետ կքննարկեմ հարցը»: