Մամեդյարովը պատրաստ է քննարկել փոխզիջումները, բայց նրան տրված է «խոսող գլխի» դերը. ռուսաստանցի հրապարակախոս

Շատ հեշտ է հասկանալ հայերին, ովքեր հոգնել են կորուստներից: Tert.am-ի հետ զրույցում ասաց ռուս հրապարակախոս, միջազգային իրավունքի ռուսական ասոցիացիայի անդամ Դենիս Դվորնիկովը՝ խոսելով այն հանգամանքի մասին, որ Հայաստանը, երկար տարիներ որդեգրելով պաշտպանողական քաղաքականություն, այսօր արդեն կարծես փոխում է ռազմավարությունը ու կոշտ պատասխաններ տալիս Ադրբեջանին:

«Արցախի ու Հայաստանի Զինված ուժերը երկար տարիներ է, ինչ հավատարիմ են մնում հստակ պաշտպանողական ռազմավարությանը:  Հաճախ մի շարք մարդկանցից, ովքեր տեղեկացված են սահմանային դրության մասին, ստիպված էինք լսել այն մասին, որ մեզ չեն թույլատրում պատասխանել սադրանքներին:  Հայկական ռազմական միավորները շարունակում էին կորցնել երիտասարդ տղաների, բայց միաժամանակ կապված էին կանխարգելիչ հարվածները չթույլատրող հրամաններով: Հիմա համբերությունը հատել է:

Ցավոք, ադրբեջանական կողմը, չի ցանկանում լսել հակամարտությունը խաղաղ կարգավորելու մասին կոչերը, մասնավորապես, ակնհայտ մերժում է Ռուսաստանի ԱԳՆ-ի հայտարարությունները:  Այս իրավիճակում շատ հեշտ է հասկանալ հայերին, ովքեր հոգնել են կորուստներից: Հայաստանին ստիպում են ավելի կոշտ գործողությունների, այն դեպքում, երբ Հայաստանն ու Արցախը հետաքրքրված չեն էսկալացիայով»,- ասաց Դվոնիկովը:

Հրապարակախոսը նշեց, որ իրավիճակը Լեռնային Ղարաբաղի հակամարտության շուրջ շատ տագնապալի է:

Ինչ վերաբերում է այն տեսակետներին, որ լայնամասշտաբ պատերազմի վերսկսումը հավանական է, ապա Դենիս Դվորնիկովն ասաց, որ դա կկործանի երկու երկրներին էլ: «Ինձ շատ դժվար է հասկանալ Բաքվի գործող իշխանությունների տրամաբանությունը: Ադրբեջանում սրվում է ռազմական հիստերիան: Մի բանախոսը փորձում է գերազանցել մյուսին իր ռազմատենչ ձևակերպումներով: Եթե կարդաք ադրբեջանական ԶԼՄ-ների վերնագրերը, տպավորություն է, որ այդ երկրի հասարակությունը «հիվանդացել է պատերազմով»: Ես վստահ եմ, որ պատերազմը կործանարար է երկու կողմի համար էլ: Ավելին, կարծում եմ, որ այն Ադրբեջանի բնակչության շահերից չի բխում»,- շեշտեց նա:

Ռուսաստանցի հրապարակախոսը նշեց, որ Ադրբեջանին կոչ է անում Հայաստանի հետ մրցակցել ոչ թե ռազմական գործում, այլ՝ մշակութային, գիտական, կրթական ոլորտներում ունեցած հաջողություններով: Ըստ նրա՝ դա կլիներ օգտակար մրցակցություն: Միաժամանակ, նա նկատեց, որ «կրակել հրանոթներից ավելի հեշտ է, քան գիտական բացահայտումներ անելը և ցավալի է, որ այդ երկրի ղեկավարությունը առաջնորդում է իր ժողովրդին հեշտ, բայց վտանգավոր ճանապարհով»: Դվոնիկովն ասաց, թե այդկերպ տրամադրված հասարակության առկայության պայմաններում նոր ձգձգված սրացումը շատ հավանական է:

Ինչ վերաբերում է երկու երկրների նախարարների հանդիպմանը, հրապարակախոսն ասաց. «Կարծում եմ, որ Մամեդյարովը իր ազգի թշնամին չէ և կուզեր, որ հակամարտությունը կարգավորվեր դիվանագիտական ճանապարհով: Բայց նա կախված է քաղաքական համակարգից, իր ղեկավարությունից: Ես գիտեմ, որ Մամեդյարովը պատրաստ է քննարկել փոխզիջումները, բայց նրան տրված է «խոսող գլխի» դերը»:

Դ. Դվոնիկովի խոսքով՝ հանդիպումները երկու երկրների միջև, բնականաբար, հարկավոր են, բայց դրանցից պետք չէ մեծ ակնկալիքներ ունենալ: Նա շեշտեց, որ ճգնաժամային դրությունից դուրս գալուն կարող է նպաստել երկու գործոն: Առաջինը, Դենիս Դվորնիկովի համոզմամբ, այն է, որ միջնորդ երկրները, ԵԱՀԿ Մինսկի խմբի եռանախագահները, պետք է տան օբյեկտիվ գնահատական, այդ թվում՝ հետևողական լինեն երկրներից հնչող հայտարարություններին ու ԶԼՄ-ներում տեղ գտած վերնագրերին:

Իսկ երկրորդ գործոնը, հրապարակախոսի կարծիքով, այն է, որ պետք է գործի սահմանային միջադեպերն ուսումնասիրելու օբյեկտիվ ու հստակ մեխանիզմ ոչ միայն ղարաբաղա-ադրբեջանական շփման գծում, այլև՝ Հայաստան-Ադրբեջան սահմանին: